ವಿಜಯಪುರದ ಸೈನಿಕ ಶಾಲೆಯಲ್ಲಿ ನಡೆದ ಅಖಿಲ ಭಾರತ ಸೈನಿಕ ಶಾಲೆಗಳ ರಾಷ್ಟ್ರೀಯ ಕ್ರೀಡಾಕೂಟ 2026 ರ ಸಮಾರೋಪ ಸಮಾರಂಭದಲ್ಲಿ ಭಾಗವಹಿಸಿದ ರಕ್ಷಾ ರಾಜ್ಯ ಮಂತ್ರಿ

ರಕ್ಷಾ ರಾಜ್ಯ ಮಂತ್ರಿ (RRM) ಶ್ರೀ ಸಂಜಯ್ ಸೇಠ್ ಅವರು ನವೆಂಬರ್ 07, 2026 ರಂದು ವಿಜಯಪುರದ ಸೈನಿಕ ಶಾಲೆಯಲ್ಲಿ ನಡೆದ ಅಖಿಲ ಭಾರತ ಸೈನಿಕ ಶಾಲೆಗಳ ರಾಷ್ಟ್ರೀಯ ಕ್ರೀಡಾಕೂಟದ 2026ರ ಸಮಾರೋಪ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದರು. ಅವರು ವಿಜೇತ ತಂಡಗಳ ಅತ್ಯುತ್ತಮ ಸಾಧನೆ ಮತ್ತು ಸಮರ್ಪಣೆಯನ್ನು ಗುರುತಿಸಿ ಪದಕಗಳು ಹಾಗೂ ಟ್ರೋಫಿಗಳನ್ನು ಪ್ರಧಾನ ಮಾಡಿದರು.

ಜ್ಯೂನಿಯರ್ ಬಾಲಕರ ಬಾಸ್ಕೆಟ್‌ಬಾಲ್‌ನಲ್ಲಿ ಸೈನಿಕ ಶಾಲೆ ಘೋರಾಖಾಲ್ ಚಾಂಪಿಯನ್ ಆಗಿ ಹೊರಹೊಮ್ಮಿದರೆ, ವಿಕಾಸ ಸೈನಿಕ ಶಾಲೆಯು ಜ್ಯೂನಿಯರ್ ಬಾಲಕಿಯರ ಬಾಸ್ಕೆಟ್‌ಬಾಲ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿತು. ಜ್ಯೂನಿಯರ್ ಬಾಲಕರ ವಾಲಿಬಾಲ್ ಚಾಂಪಿಯನ್‌ಷಿಪ್ ಅನ್ನು ಸೈನಿಕ ಶಾಲೆ ಅಮರಾವತಿನಗರ ಗೆದ್ದುಕೊಂಡಿತು. ಸೈನಿಕ ಶಾಲೆ ಝಾನ್ಸಿ ಚರ್ಚಾ ಸ್ಪರ್ಧೆಯ ಚಾಂಪಿಯನ್‌ಷಿಪ್ ಗೆದ್ದರೆ, ಸೈನಿಕ ಶಾಲೆ ಕಪುರ್ಥಲಾ ರಸಪ್ರಶ್ನೆ ಸ್ಪರ್ಧೆಯಲ್ಲಿ ವಿಜಯಿಯಾಗಿ ಹೊರಹೊಮ್ಮಿತು.

"ನಿಮ್ಮ ಮಿತಿಗಳನ್ನು ಮೀರಿ ಶ್ರಮಿಸಿ, ಎಂದಿಗೂ ಸೋಲೊಪ್ಪಿಕೊಳ್ಳಬೇಡಿ ಮತ್ತು ಶ್ರೇಷ್ಠತೆಯನ್ನು ಸಾಧಿಸುವ ಹಂಬಲವನ್ನು ಉಳಿಸಿಕೊಳ್ಳಿ," ಎಂದು ಯುವ ಕೆಡೆಟ್‌ಗಳನ್ನು ಉದ್ದೇಶಿಸಿ ಮಾತನಾಡಿದ ನೌಕಾಪಡೆಯ ಮುಖ್ಯಸ್ಥರಾದ ಅಡ್ಮಿರಲ್ ಕೃಷ್ಣ ಸ್ವಾಮಿನಾಥನ್ ಅವರು ಸ್ಪರ್ಧಿಗಳಿಗೆ ಶ್ರೇಷ್ಠತೆಯನ್ನು ಸಾಧಿಸಲು ಪ್ರೋತ್ಸಾಹಿಸಿದರು. ವಿಜಯಪುರದ ಸೈನಿಕ ಶಾಲೆಯಲ್ಲಿನ ತಮ್ಮ ಆರಂಭಿಕ ದಿನಗಳನ್ನು ಅವರು ಆತ್ಮೀಯವಾಗಿ ಸ್ಮರಿಸಿಕೊಂಡರು ಮತ್ತು ತಮ್ಮ ವ್ಯಕ್ತಿತ್ವ ಹಾಗೂ ಸಾಧನೆಗಳನ್ನು ರೂಪಿಸುವಲ್ಲಿ ಈ ಸಂಸ್ಥೆಯ ಅಮೂಲ್ಯ ಕೊಡುಗೆಯನ್ನು ಒಪ್ಪಿಕೊಂಡರು.

2026 ರ ನವೆಂಬರ್ 03 ರಿಂದ 07 ವರೆಗೆ ಆಯೋಜಿಸಲಾದ ಎಐಎಸ್‌ಎಸ್‌ಎನ್‌ಜಿ (AISSNG) ರಾಷ್ಟ್ರೀಯ ಏಕೀಕರಣ, ಸಾಂಸ್ಕೃತಿಕ ವಿನಿಮಯ ಮತ್ತು ಪರಸ್ಪರ ತಿಳುವಳಿಕೆಗೆ ಒಂದು ರೋಮಾಂಚಕ ವೇದಿಕೆಯಾಗಿ ಹೊರಹೊಮ್ಮಿತು. ಇದು ವಿವಿಧ ಪ್ರದೇಶಗಳ ವಿದ್ಯಾರ್ಥಿಗಳಿಗೆ ಜ್ಞಾನ, ಸಂಸ್ಕೃತಿಗಳು, ಭಾಷೆಗಳು, ನಂಬಿಕೆಗಳು ಮತ್ತು ಆಲೋಚನೆಗಳನ್ನು ವಿನಿಮಯ ಮಾಡಿಕೊಳ್ಳಲು ಅವಕಾಶವನ್ನು ಒದಗಿಸಿತು, ಜೊತೆಗೆ ಶಾಶ್ವತ ಸ್ನೇಹ, ಸೌಹಾರ್ದತೆ ಮತ್ತು ರಾಷ್ಟ್ರೀಯ ಹೆಮ್ಮೆಯ ಹಂಚಿಕೆಯ ಭಾವನೆಯನ್ನು ಬೆಳೆಸಿತು. ಈ ವರ್ಣರಂಜಿತ ಸಮಾರೋಪ ಸಮಾರಂಭದಲ್ಲಿ ಹಾಲಿ ಮತ್ತು ನಿವೃತ್ತ ರಕ್ಷಣಾ ಅಧಿಕಾರಿಗಳು, ಸಚಿವರು, ಸಾರ್ವಜನಿಕ ಪ್ರತಿನಿಧಿಗಳು ಹಾಗೂ ಹಿರಿಯ ಆಡಳಿತಗಾರರ ಗಣ್ಯ ಸಭೆ ಉಪಸ್ಥಿತರಿದ್ದರು.

*****