ବିଆରଇ ସମ୍ମିଳନୀ ଓ ପ୍ରଦର୍ଶନୀରେ ୧.୧୭ ଲକ୍ଷ କୋଟି ଟଙ୍କା ମୂଲ୍ୟର ୧୮ଟି ଏମଓୟୁ ସ୍ୱାକ୍ଷର କଲା ଓଡ଼ିଶା

ନୂଆଦିଲ୍ଲୀର ଭାରତ ମଣ୍ଡପମଠାରେ ଭାରତ ଅକ୍ଷୟ ଶକ୍ତି ସମ୍ମିଳନୀ ଏବଂ ପ୍ରଦର୍ଶନୀ ୨୦୨୬ର ଦ୍ୱିତୀୟ ଦିନରେ ଆଜି ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ଉପ-ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହ ଦେଓଙ୍କ ଉପସ୍ଥିତିରେ ଓଡ଼ିଶାରେ ୧୮ଟି ବୁଝାମଣାପତ୍ର ସ୍ୱାକ୍ଷର କରିଛି । ଏହାଦ୍ୱାରା ରାଜ୍ୟରେ ପ୍ରାୟ ୧.୧୭ ଲକ୍ଷ କୋଟି ଟଙ୍କାର ପୁଞ୍ଜି ନିବେଶ ପ୍ରସ୍ତାବ ଆସିଛି ।

ଆଜିର କାର୍ଯ୍ୟକ୍ରମରେ କେନ୍ଦ୍ର ନୂତନ ଓ ଅକ୍ଷୟ ଶକ୍ତି ମନ୍ତ୍ରୀ ପ୍ରହଲ୍ଲାଦ ଜୋଶୀ, କେନ୍ଦ୍ର ଶକ୍ତି ଓ ଗୃହ ନିର୍ମାଣ ଓ ସହରାଞ୍ଚଳ ବ୍ୟାପାର ମନ୍ତ୍ରୀ ମନୋହର ଲାଲ ଖଟ୍ଟର, ନୂତନ ଏବଂ ନୂତନ ଓ ଅକ୍ଷୟ ରାଷ୍ଟ୍ରମନ୍ତ୍ରୀ ଶ୍ରୀପଦ ୟେସୋ ନାଏକ ଯୋଗ ଦେଇଥିଲେ । ଅନ୍ତର୍ଜାତୀୟ ସୌର ମେଣ୍ଟ, ସିଇଇଡବ୍ଲୁ ଏବଂ ଏନର୍ଜିଭା ଭେଞ୍ଚର୍ସ ଦ୍ୱାରା ଆହୂତ ଏକ ଉଚ୍ଚସ୍ତରୀୟ ଅଧିବେଶନ "ଦି ନେକ୍ସଟ୍ ଟେରାୱାଟ୍"ର ମନ୍ତ୍ରୀସ୍ତରୀୟ ଆଲୋଚନାରେ ମନ୍ତ୍ରୀମାନେ ଅଂଶଗ୍ରହଣ କରିଥିଲେ। ଆଗାମୀ ଦଶନ୍ଧି ପାଇଁ ଅନ୍ତର୍ଜାତୀୟ ସ୍ତରରେ ଅକ୍ଷୟ ଶକ୍ତି କାର୍ଯ୍ୟକାରିତା ଢାଞ୍ଚାର ରୂପରେଖ ପ୍ରସ୍ତୁତ କରିବା ଲକ୍ଷ୍ୟ ନେଇ ବରିଷ୍ଠ ସରକାରୀ ଏବଂ ଶିଳ୍ପ ପ୍ରତିନିଧିମାନେ ଏହି ଅଧିବେଶନରେ ବିଚାରବିମର୍ଶ କରିଥିଲେ ।

ଅଧିବେଶନରେ ବିଶ୍ୱ ଅକ୍ଷୟ ଶକ୍ତି ପ୍ରସାରଣର ପରବର୍ତ୍ତୀ ପର୍ଯ୍ୟାୟକୁ ଆଗେଇ ନେବା ଲାଗି ଗୁରୁତ୍ୱପୂର୍ଣ୍ଣ ହୋଇଥିବା ୪ଟି ପ୍ରମୁଖ ପ୍ରାଥମିକତା କ୍ଷେତ୍ର ଉପରେ ଆଲୋଚନା କରାଯାଇଥିଲା । ଏହି ୪ଟି କ୍ଷେତ୍ର ହେଲା ସମନ୍ୱିତ ଶକ୍ତି ଯୋଜନା, ଯୋଗାଣ ଓ ସଂରକ୍ଷଣ; ଶକ୍ତି ଭିତ୍ତିଭୂମି ପ୍ରସାର ଓ ସ୍ଥିରତା; ପ୍ରକଳ୍ପ ଓ ଇକୋସିଷ୍ଟମର ଟେରାୱାଟ୍-ସ୍କେଲ ପାଣ୍ଠି ଯୋଗାଣ; ଏବଂ ସୁରକ୍ଷିତ ଓ ସୁଲଭ ଶକ୍ତି ପାଇଁ ଡିଜିଟାଲାଇଜେସନ୍ ଓ ଏଆଇ । ୨୦୪୭ ସୁଦ୍ଧା ବିକଶିତ ଭାରତ ଦୃଷ୍ଟିକୋଣ ଅନୁରୂପ ୨୦୫୦ ପର୍ଯ୍ୟନ୍ତ ଏକ ରଣନୀତିକ ରୂପରେଖ ଆଲୋଚନା ସମୟରେ ଉପସ୍ଥାପନ କରାଯାଇଥିଲା ।

ବିଆରଇ ସମ୍ମିଳନୀ ଓ ପ୍ରଦର୍ଶନୀ ୨୦୨୬ରେ ୧୩୦ରୁ ଅଧିକ ଦେଶର ପ୍ରତିନିଧି ଅଂଶଗ୍ରହଣ କରିଛନ୍ତି । ଏମାନଙ୍କ ମଧ୍ୟରେ ୪୦ରୁ ଅଧିକ ମନ୍ତ୍ରୀ, ବରିଷ୍ଠ ନୀତି ନିର୍ଦ୍ଧାରକ, ନିବେଶକ, ଆର୍ଥିକ ପ୍ରତିଷ୍ଠାନ ଏବଂ ଶିଳ୍ପପତି ସାମିଲ ଅଛନ୍ତି । ଅଷ୍ଟ୍ରେଲିଆ, ଡେନମାର୍କ, ୟୁରୋପୀୟ ସଂଘ, ଫ୍ରାନ୍ସ, ଜର୍ମାନୀ, ନେଦରଲ୍ୟାଣ୍ଡସ, ନରୱେ, ସ୍ୱିଡେନ ଏବଂ ବ୍ରିଟେନ ଅଂଶୀଦାର ଦେଶ ଭାବରେ ଯୋଗ ଦେଇଛନ୍ତି । ଏହା ସ୍ୱଚ୍ଛ ଶକ୍ତି ମୂଲ୍ୟ ଶୃଙ୍ଖଳରେ ଦ୍ୱିପାକ୍ଷିକ ସହଯୋଗକୁ ସୁଦୃଢ଼ ​​କରିବା ଏବଂ ନିବେଶ ଓ ପ୍ରଯୁକ୍ତିବିଦ୍ୟା ସହଭାଗୀତାକୁ ସହଜ କରିବା ପାଇଁ ସୁଯୋଗ ପ୍ରଦାନ କରୁଛି ।

ତେରଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ମଧ୍ୟ ସେମାନଙ୍କର ଅକ୍ଷୟ ଶକ୍ତି ସମ୍ଭାବନା, ପ୍ରକଳ୍ପ ଯୋଜନା, ଉତ୍ପାଦନ କ୍ଷମତା ଏବଂ ନୀତିଗତ ପଦକ୍ଷେପ ପ୍ରଦର୍ଶନ କରୁଛନ୍ତି, ଯାହା ସାରା ଭାରତରେ ନିବେଶ ସୁଯୋଗର ବ୍ୟାପକତା ଏବଂ ବିବିଧତାକୁ ଉଲ୍ଲେଖ କରୁଛି । ଆଜିର ଅଧିବେଶନରେ ବ୍ଲୁମବର୍ଗଏନଇଏଫ ସହ ସହଭାଗୀତାରେ ଶକ୍ତି ସୁରକ୍ଷା ଏବଂ ଏଜେଣ୍ଡା ୨୦୪୭ ନିବେଶକଙ୍କ ବିଚାର ଉପରେ ପ୍ରଥମ ପର୍ଯ୍ୟାୟ ଆଲୋଚନା ହୋଇଥିଲା। ଏଥିରେ ଉଦ୍ୟୋଗୀ ଏବଂ ଶିଳ୍ପପତିମାନେ ସାମିଲ ହୋଇ ନିଜର ନିଜର ପ୍ରସ୍ତାବ ଏବଂ ବିଚାର ରଖିଥିଲେ ।

ଭାରତର ଅକ୍ଷୟ ଶକ୍ତି ପ୍ରସାର ପାଇଁ ଉତ୍ପାଦନ କ୍ଷମତା, ଶକ୍ତି ସଂରକ୍ଷଣ, ପରିବହନ ନେଟୱାର୍କ, ଘରୋଇ ଉତ୍ପାଦନ ଏବଂ ସହାୟକ ଭିତ୍ତିଭୂମିରେ ନିରନ୍ତର ପୁଞ୍ଜିନିବେଶ ଆବଶ୍ୟକ । ଏହି ସମ୍ମିଳନୀ ସରକାରୀ ଓ ଘରୋଇ କ୍ଷେତ୍ରର ଅଂଶୀଦାରମାନଙ୍କୁ ଅଭିନବ ଆର୍ଥିକ ମଡେଲ ଅନୁସନ୍ଧାନ କରିବା, ନିବେଶ ସହଭାଗୀତାକୁ ସୁଦୃଢ଼ ​​କରିବା ଏବଂ ପ୍ରକଳ୍ପ କାର୍ଯ୍ୟକାରିତାକୁ ତ୍ୱରାନ୍ୱିତ କରିବା ପାଇଁ ସମାଧାନ ଚିହ୍ନଟ କରିବା ସକାଶେ ଏକ ମଞ୍ଚ ପ୍ରଦାନ କରୁଛି ।

********

PS