ہاؤسنگ اور شہری امور کی وزارت نے صاف ستھری دہلی کے لیے ایک ساجھا لائحہ عمل وضع  کرنے کی غرض سے شمولیتی ورکشاپ کا اہتمام کیا

ہاؤسنگ اور شہری امور کی وزارت (ایم او ایچ یو اے) کے محکمہ برائے کیپٹل ڈیولپمنٹ نے 'سوچھ بھارت مشن-دیہی'  کے اشتراک سے "پلاننگ اے شیئرڈ روڈ میپ فار کلین دہلی"  (صاف ستھری دہلی کے لیے مشترکہ لائحہ عمل کی منصوبہ بندی) کے موضوع پر ایک ورکشاپ کا انعقاد کیا۔ اس ورکشاپ میں سینی ٹیشن انسپکٹرز، سپروائزرز، شہری بلدیاتی اداروں کے حکام اور اہم شراکت داروں کو ایک پلیٹ فارم پر لایا گیا تاکہ قومی دارالحکومت کو زیادہ صاف ستھرا، صحت مند اور رہنے کے قابل بنانے کے لیے عملی حل تلاش کرنے پر اجتماعی طور پر غور و خوض کیا جا سکے۔ محترمہ ڈی تھارا، سکریٹری، محکمہ برائے کیپٹل ڈیولپمنٹ، ایم او ایچ یو اے نے این ڈی ایم سی، ایم سی ڈی، ڈی ڈی اے اور ہاؤسنگ اور شہری امور کی وزارت کے سینئر حکام کے ہمراہ اس ورکشاپ میں شرکت کی۔

"پلاننگ اے شیئرڈ روڈ میپ فار کلین دہلی" نامی ورکشاپ کا تصور اس مقصد کے تحت پیش کیا گیا تھا کہ تمام شراکت داروں کو ایک جگہ اکٹھا کیا جائے تاکہ ان چیلنجوں کو سمجھا جا سکے اور مل کر عملی حل تیار کیے جا سکیں۔ تاریخ میں پہلی بار، اعلیٰ ترین سطح سے لے کر نچلی ترین سطح تک کے اہلکار اہم مسائل پر غور و خوض کرنے اور صاف ستھری دہلی کی جانب ایک اجتماعی راستہ متعین کرنے کے لیے ایک مشترکہ پلیٹ فارم پر اکٹھے ہوئے۔

صفائی ستھرائی کا عملہ، فرنٹ لائن پر خدمات فراہم کرنے کی وجہ سے، روزمرہ کے آپریشنل چیلنجوں کے بارے میں براہِ راست معلومات فراہم کرنے کی صلاحیت رکھتا ہے، جس سے شراکت داروں کے لیے پالیسی کی سطح پر اقدامات کے ساتھ ساتھ عملی اور زمینی حل تلاش کرنے کے لیے غور و خوض کرنا اور نئے خیالات پیش کرنا ممکن ہو جاتا ہے۔ دہلی میں صفائی ستھرائی کو متاثر کرنے والے اہم چیلنجوں کی نشاندہی کرنے اور نچلی سطح پر کام کرنے والے شراکت داروں سے معلومات حاصل کرنے کے لیے شرکاء کے درمیان ایک آن لائن ڈیجیٹل پول کرایا گیا۔ اس مشق سے آپریشنل خامیوں، شہریوں کے رویے، خدمات کی فراہمی میں درپیش چیلنجوں اور بہتری کے امکانات کے بارے میں قیمتی سجھاؤ حاصل ہوئے۔

شہری صفائی ستھرائی کے لیے ان کی مثالی خدمات کے اعتراف میں، مدعو کیے گئے سینی ٹیشن انسپکٹرز اور سپروائزرز کو پورے شہر میں صفائی برقرار رکھنے کے لیے ان کی انتھک اور مخلصانہ کوششوں پر اعزاز سے نوازا گیا۔ ورکشاپ کا آغاز برہما کماریز کے ممتاز روحانی پیشوا بی کے حسین کے ایک متاثر کن اور تحریکی خطاب سے ہوا۔

ورکشاپ کی ایک اہم خصوصیت ایک تفصیلی اور انٹرایکٹو بحث تھی جو دس اہم سوالات کے گرد گھومتی تھی، جن کا مقصد صاف ستھری دہلی کے لیے ایک اجتماعی لائحہ عمل تیار کرنا تھا۔ ان مذاکرات میں شہری صفائی ستھرائی کے چند انتہائی سنگین چیلنجوں پر توجہ مرکوز کی گئی، جن میں وہ وجوہات شامل تھیں جن کی وجہ سے دہلی بڑی سرمایہ کاری اور کوششوں کے باوجود ظاہری صفائی کے معاملے میں مشکلات کا شکار ہے؛ کچرے کے ڈبوں سے مبرا شہر کی جانب منتقلی کے لیے حکمتِ عملی جس میں گھر گھر سے زیادہ مؤثر اور تواتر کے ساتھ کچرا جمع کیا جائے؛ بار بار بننے والے ایسے مقامات جہاں کچرا جمع ہو جاتا ہے گاربیج ولنیرایبل پوائنٹس (جی وی پیز) اور کچرا پھیلانے اور اسے پانی کے ذخائر میں جانے سے روکنے کے اقدامات؛ اور اس بات کو یقینی بنانا کہ عوامی بیت الخلا سارا دن صاف، محفوظ اور فعال رہیں۔ ان مباحثوں میں شہریوں کی شکایات کے ازالے کے نظام کو بہتر بنانے کے طریقوں پر بھی غور کیا گیا۔ اس دوران بہترین طریقوں کو کامیابی کی کہانیوں کے طور پر اجاگر کیا گیا، اور ساتھ ہی ایسی تصاویر اور واقعات بھی شیئر کیے گئے جن کے لیے مربوط کوششوں اور ہدف پر مبنی اقدامات کی ضرورت ہے۔

ان مذاکرات نے صفائی ملازمین، انسپکٹرز، سپروائزرز، شہری بلدیاتی اداروں کے نمائندوں اور پالیسی سازوں کے نقطہ ہائے نظر کو ایک جگہ اکٹھا کیا، جس سے شہری صفائی ستھرائی کے نظام کو مضبوط بنانے اور دہلی میں ظاہری صفائی کو بہتر بنانے کے لیے جوابدہی کو بڑھانے پر ایک شراکتی مکالمے کو فروغ ملا۔

اجتماع سے خطاب کرتے ہوئے، محترم ڈی تھارا، سکریٹری، ڈی او سی ڈی، ایم او ایچ یو اے نے سینیٹیشن انسپکٹرز اور سپروائزرز کو پوری دہلی میں صفائی کے معیار کو بہتر بنانے کے لیے ان کی انتھک کوششوں اور عزم پر مبارکباد دی۔ انہوں نے کہا، "کسی بھی میونسپلٹی کا سب سے اہم حصہ اس کا سینیٹیشن ورک فورس — یعنی سینیٹیشن انسپکٹرز اور صفائی کا عملہ ہوتا ہے۔ جہاں ایک ڈاکٹر تشخیص کے بعد دوا فراہم کرتا ہے، وہیں ہم وہ ٹیم ہیں جو ڈاکٹر سے پہلے کام کرتی ہے۔ سب کے لیے صفائی ستھرائی کو یقینی بنا کر، ہم بیماریوں کو روکتے ہیں۔ ہم معاشرے کو صحت دینے والے حقیقی لوگ ہیں، کیونکہ ہمارا صفائی کا کام بیماریوں کو کم کرتا ہے اور شہریوں کو ایک صحت مند اور بہتر معیارِ زندگی گزارنے کے قابل بناتا ہے۔

ورکشاپ کا اختتام تمام شراکت داروں کے اس مشترکہ عزم کے ساتھ ہوا کہ وہ ایسے عملی، عوام دوست اور نتیجہ خیز اقدامات کو نافذ کرنے کے لیے مل کر کام کریں گے جو دہلی کو مزید صاف ستھرا بنانے میں معاون ثابت ہوں گے۔

*****

 (ش ح –ا ب ن)

U.No:7017