پوسٹ کرنے کی تاریخ:
29 OCT 2026 7:55PM by PIB Delhi
آسام کے گوہاٹی میں خانپارہ کے فارم گیٹ پر منعقد آٹھ روزہ شِلپ سنگم میلہ 2026 کامیابی کے ساتھ اختتام پذیر ہوا۔ میلے کو زائرین، مقامی برادریوں اور شرکت کرنے والے دستکاروں کی جانب سے بھرپور پذیرائی حاصل ہوئی۔
حکومت ہند کی سماجی انصاف اور تفویض اختیارات کی وزارت کے زیر اہتمام منعقد اس میلے نے روایتی دستکاروں کو اپنی وراثتی دستکاری پیش کرنے، صارفین سے براہ راست رابطے قائم کرنے اور سماجی و اقتصادی خود کفالت کو فروغ دینے کے لیے ایک متحرک پلیٹ فارم فراہم کیا۔
گوہاٹی میں منعقدہ میلہ مالی سال 2026-27 کے لیے شِلپ سنگم سیریز کا دوسرا پروگرام تھا۔ اس سے قبل سیریز کا افتتاحی پروگرام 19 اکتوبر کو کرناٹک کے میسور میں کامیابی کے ساتھ اختتام پذیر ہوا تھا۔
وزارت کے ایک سینئر افسر نے کہا کہ آٹھ روزہ میلے نے کاروباری سرگرمیوں کو فروغ دینے، بازار تک رسائی بڑھانے اور درج فہرست ذاتوں، دیگر پسماندہ طبقات، صفائی متروں اور ڈی نوٹیفائیڈ قبائل سمیت ہدف شدہ طبقات سے تعلق رکھنے والے دستکاروں کے لیے پائیدار روزگار کے مواقع فراہم کرنے کے اپنے بنیادی مقاصد کامیابی کے ساتھ حاصل کیے۔
گوہاٹی میں منعقدہ میلے میں مجموعی طور پر 75 دستکاروں نے شرکت کی، جن میں 31 خواتین دستکار بھی شامل تھیں۔ انہوں نے زائرین کے لیے ہاتھ سے بنے کپڑوں اور دستکاری کی تقریباً 40 مختلف اقسام کی مصنوعات پیش کیں۔
نمائش میں شمال مشرقی ریاستوں کی علاقائی دستکاری کے ساتھ ملک بھر کے روایتی فنون کو بھی پیش کیا گیا، جن میں آسامی میخلا چادر، کین اور بانس کی دستکاری، بلاک پرنٹ شدہ کپڑے، کڑھائی، چمڑے کی دستکاری اور ہاتھ سے بنے کپڑے شامل تھے۔
صارفین کے ساتھ براہ راست رابطے سے دستکاروں کو ممکنہ کاروباری تعلقات قائم کرنے، بازار سے متعلق قیمتی معلومات حاصل کرنے اور براہ راست فروخت کے ذریعے خاطر خواہ آمدنی حاصل کرنے میں مدد ملی۔
میلے کی ایک اہم خاص بات سماجی انصاف اور تفویض اختیارات کی وزارت کے سکریٹری جناب سدھانش پنت کا دورہ تھا۔ ان کے ہمراہ این ایس ایف ڈی سی (نیشنل شیڈیولڈ کاسٹس فنانس اینڈ ڈیولپمنٹ کارپوریشن) کے چیئرمین اور منیجنگ ڈائریکٹر جناب پربھات تیاگی اور تینوں ایپیکس کارپوریشنز کے سینئر افسران بھی موجود تھے۔
اپنے تفصیلی دورے کے دوران جناب پنت نے مختلف اسٹالز اور وزارت کے پویلین کا معائنہ کیا اور دستکاروں سے ملاقات کرکے ان کی مہارتوں اور بازار میں دستیاب مواقع کے بارے میں معلومات حاصل کیں۔
انہوں نے کہا کہ یہ پہل معزز وزیراعظم جناب نریندر مودی کے ’’سب کا ساتھ، سب کا وکاس‘‘ کے نظریے کے مطابق ہے، جس کے تحت دستکاروں کو اپنی روایتی دستکاری کو پائیدار معاشی خود کفالت میں تبدیل کرنے کے لیے عملی مواقع فراہم کیے جا رہے ہیں۔
میلے کے دوران بھارت۔ٹیولپ (روایتی دستکاروں کی ترقی اور روزگار کا پروگرام) کے فروغ پر خصوصی توجہ دی گئی، جس کے تحت فزیکل آؤٹ لیٹس اور ای کامرس پلیٹ فارمز کے ذریعے دستکاروں کو بازار تک رسائی فراہم کی جاتی ہے۔ روایتی مہارتوں کو جدید صارفین کے ذرائع سے جوڑ کر یہ پروگرام بازار سے روابط کو مضبوط بنانے اور دستکاروں کو اپنی کاروباری سرگرمیوں کو وسعت دینے میں مدد فراہم کرتا ہے۔
وزارت کے خصوصی پویلین نے عوامی رابطے کے ایک اہم مرکز کے طور پر کام کیا، جہاں انٹرایکٹو ایل ای ڈی ڈسپلے کے ذریعے زائرین کو وزارت کی تین قومی کارپوریشنوں، نیشنل درج فہرست ذاتوں کے فنانس اور ترقی کی کارپوریشن (این ایس ایف ڈی سی)، نیشنل بیک ورڈ کلاسز فنانس اینڈ ڈیولپمنٹ کارپوریشن (این بی سی ایف ڈی سی) اور نیشنل صفائی کرمچاریوں کے فنانس اور ترقی کی کارپوریشن (این ایس کے ایف ڈی سی) کے زیر انتظام فلاحی، مالی امداد اور ہنرمندی کی ترقی سے متعلق اسکیموں کے بارے میں معلومات فراہم کی گئیں۔
شمال مشرقی خطے کی روایتی موسیقی اور لوک رقص پر مشتمل روزانہ ثقافتی پروگراموں نے بھی میلے کی عوامی کشش میں نمایاں اضافہ کیا۔ عوامی شرکت کو فزیکل مقام سے آگے بڑھانے کے لیے ان ثقافتی پروگراموں کو آٹھوں دن براہ راست آن لائن نشر کیا گیا۔
وزارت کے ایک افسر نے کہا کہ عوام کی جانب سے پُرجوش ردعمل اور شریک دستکاروں کے مضبوط تجارتی نتائج اس بات کا ثبوت ہیں کہ براہ راست بازار تک رسائی، عوامی بیداری اور ثقافتی فروغ کو یکجا کرنا مؤثر ثابت ہوتا ہے۔ شِلپ سنگم میلے جیسی پہل کے ذریعے وزارت پسماندہ طبقات کو بااختیار بنانے اور ہندوستان کی مالامال ہینڈلوم اور دستکاری کے ورثے کے تحفظ کے اپنے عزم کو مسلسل آگے بڑھا رہی ہے۔
***********
ش ح ۔ م د ۔ م ص
(U :6931 )