نیشنل کیریئر سروس سینٹرز برائے معذورین دیوالی میلے میں معذور افراد کی ہنرمندی اور کاروباری صلاحیتوں کا مظاہرہ

وزارت محنت و روزگار کے ڈائریکٹوریٹ جنرل آف ایمپلائمنٹ کے تحت کام کرنے نیشنل کیریئر سروس سینٹرز برائے معذورین نے ایک پررونق دیوالی میلے کا انعقاد کیا۔ اس میلے کا مقصد ملک بھر میں قائم ان مراکز سے تربیت یافتہ معذور افراد کی تیار کردہ ہاتھ کی مصنوعات، ہنرمندی اور پیشہ ورانہ مہارتوں کو اجاگر کرنا تھا۔

اس میلے میں دہلی، ترواننت پورم، دہرادون، بھونیشور، کولکتہ اور ممبئی میں واقع نیشنل کیریئر سروس سینٹرز برائے معذورین مراکز کے زیر تربیت اور سابقہ تربیت یافتہ معذور افراد کی تیار کردہ مصنوعات پیش کی گئیں۔ نمائش میں ہاتھ سے بنی اور مہارت پر مبنی مصنوعات کی ایک وسیع رینج شامل تھی، جن میں جوٹ اور کپڑے کے تھیلے، موم بتیاں، الیکٹرانک اشیاء، پینٹنگز، صابن، کروشیا کا کام، ملبوسات اور ٹیکسٹائل کی مصنوعات، بُنائی، کڑھائی، لکڑی کا کام اور تہواروں سے متعلق آرائشی اشیاء شامل تھیں۔

ان اسٹالز نے شرکاء کو اپنی تخلیقی صلاحیتوں کے اظہار، زائرین کے ساتھ براہ راست بات چیت کرنے، آراء (فیڈ بیک) حاصل کرنے، اور فروخت، خود روزگار اور مارکیٹ تک رسائی کے مواقع تلاش کرنے کے لیے ایک بہترین پلیٹ فارم فراہم کیا۔ یہ مصنوعاتنیشنل کیریئر سروس سینٹرز فار ڈفرنٹلی ایبلڈ مراکز میں فراہم کی جانے والی روایتی ہنرمندی اور جدید پیشہ ورانہ تربیت، دونوں کی عکاسی کرتی تھیں۔

اس موقع پر گفتگو کرتے ہوئے، وزارت محنت و روزگار کے سیکرٹری ڈاکٹر چندرا بھوشن کمار نے کہا کہ یہ میلہ معذور افراد کو مہارتوں کی ترقی، محنت کے وقار اور معاشی خود مختاری کے ذریعے بااختیار بنانے کے لیے وزارت کے عزم کی عکاسی کرتا ہے۔ یہ اقدام ثابت کرتا ہے کہ مناسب تربیت اور مواقع ملنے پر، معذور افراد ماہر کاریگروں اور کاروباری افراد کے طور پر نمایاں ہو سکتے ہیں اور قومی معیشت میں اپنا اہم کردار ادا کر سکتے ہیں۔

دیوالی میلے کا بنیادی مقصد ان تربیتی پروگراموں کے ذریعے پروان چڑھنے والی ہنرمندی کو ایک پلیٹ فارم پر اکٹھا کرنا، معذور کاریگروں اور زیر تربیت افراد کی صلاحیتوں کا جشن منانا، اور جامع معاشی ترقی  میں ان کے تعاون کو تسلیم کرنا تھا۔ اس تقریب کا مقصد معذور افراد کی تیار کردہ مصنوعات کے معیار، افادیت اور مارکیٹ میں ان کی مانگ کے امکانات کے بارے میں بیداری پیدا کرنا بھی تھا۔

وزارت کا منصوبہ ہے کہ وہ دیوالی میلے کو بتدریج وسعت دے کر ایک بڑے قومی سطح کے پلیٹ فارم میں تبدیل کرے۔ مستقبل کے ایڈیشنز میں، مختلف ریاستوں اور مرکز کے زیر انتظام علاقوں میں قائم نیشنل کیریئر سروس سینٹرز برائے معذورین مراکز کی تیار کردہ دستکاری کی مصنوعات اور ہنر مندی کے نمونوں کی نمائش متوقع ہے۔ اس سے معذور افراد پر مشتمل تربیت حاصل کرنے والوں اور دستکاروں کو زیادہ نمایاں ہونے، مارکیٹ تک رسائی کے مواقع ملنے اور شناخت حاصل کرنے میں مدد ملے گی۔

نیشنل کیریئر سروس سینٹرز برائے معذورین مراکز، وزارتِ محنت و روزگار کے ایک خصوصی شعبے کے طور پر، پورے ہندوستان میں معذور افراد کی پیشہ ورانہ بحالی کے لیے کام کرتے ہیں۔ فی الحال، ملک بھر میں قائم  نیشنل کیریئر سروس سینٹرز برائے معذورین 24 مراکز کیریئر کونسلنگ، پیشہ ورانہ رہنمائی، غیر رسمی پیشہ ورانہ تربیت، روزگار کے حصول میں معاونت اور دیگر متعلقہ خدمات فراہم کرتے ہیں۔ یہاں مختلف شعبوں میں تربیت دی جاتی ہے، جن میں لباس کی تیاری، سلائی کڑھائی، بنائی، لکڑی کا کام، کمپیوٹر ایپلی کیشنز، الیکٹرانکس، جنرل میکینکس اور روزگار کے حصول میں مددگار دیگر ہنر شامل ہیں۔

دیوالی میلہ، معذور افراد کے لیے قابلِ رسائی مہارتوں کی فراہمی، سب کو شامل کرنے والے روزگار اور کاروباری مواقع کو فروغ دینے کی حکومتی کوششوں کی ایک عمدہ مثال ہے۔

***

(ش ح۔اص)

UR No 6923