Posted On:
27 OCT 2026 6:06PM by PIB Chandigarh
ਵਰਤਮਾਨ ਵਿੱਚ ਜਾਰੀ ਵਿਸ਼ੇਸ਼ ਅਭਿਆਨ 6.0 ਦੇ ਤਹਿਤ ਕੇਂਦਰੀ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਨੇ ਕਰਤਵਯ ਭਵਨ-1 ਵਿੱਚ ਸਫਾਈ ਮਿੱਤਰਾਂ ਲਈ ਸਿਹਤ ਜਾਂਚ ਕੈਂਪ ਅਤੇ ‘ਸੰਵਾਦ’ ਪ੍ਰੋਗਰਾਮ ਆਯੋਜਿਤ ਕੀਤਾ। ਮੰਤਰਾਲੇ ਦੀਆਂ ਕਾਇਆਕਲਪ ਗਤੀਵਿਧੀਆਂ ਦੇ ਤਹਿਤ ਆਯੋਜਿਤ ਇਨ੍ਹਾਂ ਪਹਿਲਕਦਮੀਆਂ ਦਾ ਉਦੇਸ਼ ਸਫਾਈ ਮਿੱਤਰਾਂ ਦੀ ਸਿਹਤ ਅਤੇ ਭਲਾਈ ਨੂੰ ਹੁਲਾਰਾ ਦੇਣਾ, ਸਵੱਛ ਕਾਰਜ ਸਥਾਨ ਬਣਾਏ ਰੱਖਣ ਵਿੱਚ ਉਨ੍ਹਾਂ ਦੇ ਯੋਗਦਾਨ ਨੂੰ ਸਨਮਾਨ ਦੇਣਾ ਅਤੇ ਸਵੱਛਤਾ ਦੇ ਸੱਭਿਆਚਾਰ ਨੂੰ ਮਜ਼ਬੂਤ ਕਰਨਾ ਸੀ।
ਕੇਂਦਰੀ ਸਿਹਤ ਅਤੇ ਪਰਿਵਾਰ ਭਲਾਈ ਰਾਜ ਮੰਤਰੀ ਅਤੇ ਆਯੁਸ਼ ਮੰਤਰਾਲਾ ਰਾਜ ਮੰਤਰੀ (ਸੁਤੰਤਰ ਚਾਰਜ) ਸ਼੍ਰੀ ਪ੍ਰਤਾਪਰਾਓ ਜਾਧਵ ਨੇ ਸਿਹਤ ਜਾਂਚ ਕੈਂਪ ਦਾ ਦੌਰਾ ਕੀਤਾ ਅਤੇ ਸਫਾਈ ਮਿੱਤਰਾਂ ਨਾਲ ਗੱਲਬਾਤ ਕੀਤੀ। ਇਸ ਦੌਰਾਨ ਉਨ੍ਹਾਂ ਨੇ ਉਨ੍ਹਾਂ ਦੀ ਸਿਹਤ ਅਤੇ ਤੰਦਰੁਸਤੀ ਬਾਰੇ ਜਾਣਕਾਰੀ ਲਈ ਅਤੇ ਮੰਤਰਾਲਾ ਕੈਂਪਸ ਵਿੱਚ ਸਾਫ-ਸਫਾਈ ਅਤੇ ਸਵੱਛਤਾ ਬਣਾਏ ਰੱਖਣ ਲਈ ਉਨ੍ਹਾਂ ਦੇ ਸਮਰਪਿਤ ਯਤਨਾਂ ਦੀ ਸ਼ਲਾਘਾ ਕੀਤੀ। ਇਸ ਮੌਕੇ ‘ਤੇ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੇ ਸਿਹਤ ਸੰਭਾਲ ਡਾਇਰੈਕਟਰ ਜਨਰਲ ਡਾ. ਐੱਲ. ਜੀ. ਕ੍ਰਿਸ਼ਨਾ ਵੀ ਮੌਜੂਦ ਰਹੇ।
ਵਿਸ਼ੇਸ਼ ਅਭਿਆਨ 6.0 ਦੇ ਤਹਿਤ ਸ਼੍ਰੀ ਪ੍ਰਤਾਪਰਾਓ ਜਾਧਵ ਨੇ ਮੰਤਰਾਲੇ ਦੇ ਦਫ਼ਤਰੀ ਪਰਿਸਰ ਦਾ ਨਿਰੀਖਣ ਵੀ ਕੀਤਾ ਅਤੇ ਉੱਥੇ ਸਾਫ-ਸਫਾਈ ਦੀ ਸਥਿਤੀ ਦਾ ਜਾਇਜ਼ਾ ਲਿਆ। ਇਸ ਦੌਰਾਨ ਉਨ੍ਹਾਂ ਨੇ ਦਫ਼ਤਰੀ ਪਰਿਸਰ ਦੀ ਸਵੱਛਤਾ ਦੀ ਸਮੀਖਿਆ ਕੀਤੀ ਅਤੇ ਕਾਰਜ ਸਥਾਨ ਦੇ ਰੱਖ-ਰਖਾਅ ਦੀ ਸਥਿਤੀ ਦਾ ਨਿਰੀਖਣ ਕੀਤਾ।
ਸਿਹਤ ਜਾਂਚ ਕੈਂਪ ਵਿੱਚ ਸਫਾਈ ਮਿੱਤਰਾਂ ਨੂੰ ਜ਼ਰੂਰੀ ਸਿਹਤ ਜਾਂਚ ਅਤੇ ਡਾਕਟਰੀ ਸਲਾਹ-ਮਸ਼ਵਰੇ ਦੀਆਂ ਸੁਵਿਧਾਵਾਂ ਉਪਲਬਧ ਕਰਵਾਈਆਂ ਗਈਆਂ। ਇਨ੍ਹਾਂ ਵਿੱਚ ਲੰਬਾਈ ਅਤੇ ਵਜ਼ਨ ਦੇ ਅਧਾਰ ‘ਤੇ ਬਾਡੀ ਮਾਸ ਇੰਡੈਕਸ (ਬੀਐੱਮਆਈ) ਦਾ ਮੁਲਾਂਕਣ, ਬਲੱਡ ਪ੍ਰੈਸ਼ਰ ਦੀ ਜਾਂਚ, ਬਲੱਡ ਸ਼ੂਗਰ ਟੈਸਟ ਅਤੇ ਹੀਮੋਗਲੋਬਿਨ ਦੀ ਜਾਂਚ ਸ਼ਾਮਲ ਸੀ। ਇਸ ਤੋਂ ਇਲਾਵਾ, ਉਨ੍ਹਾਂ ਦੀ ਸਿਹਤ ਦੀ ਸਥਿਤੀ ਦਾ ਮੁਲਾਂਕਣ ਕਰਨ ਅਤੇ ਸੰਭਾਵਿਤ ਸਿਹਤ ਸਮੱਸਿਆਵਾਂ ਦੀ ਸ਼ੁਰੂਆਤੀ ਪਛਾਣ ਲਈ ਆਮ ਮੈਡੀਕਲ ਸਲਾਹ-ਮਸ਼ਵਰਾ, ਅੱਖਾਂ ਦੀ ਬੁਨਿਆਦੀ ਜਾਂਚ ਅਤੇ ਕੰਨ, ਨੱਕ ਅਤੇ ਗਲੇ (ਈਐੱਨਟੀ) ਦੀ ਜਾਂਚ ਵੀ ਕੀਤੀ ਗਈ।
ਵਿਸ਼ੇਸ਼ ਅਭਿਆਨ 6.0 ਦੀਆਂ ਗਤੀਵਿਧੀਆਂ ਦੇ ਤਹਿਤ ਮੰਤਰਾਲੇ ਨੇ ਕਾਰਜ ਸਥਾਨਾਂ ਨੂੰ ਸਵੱਛ ਅਤੇ ਸਾਫ ਬਣਾਏ ਰੱਖਣ ਵਿੱਚ ਸਫਾਈ ਮਿੱਤਰਾਂ ਦੀ ਮਹੱਤਵਪੂਰਨ ਭੂਮਿਕਾ ਨੂੰ ਸਵੀਕਾਰ ਕਰਨ ਲਈ ‘ਸੰਵਾਦ’ ਪ੍ਰੋਗਰਾਮ ਵੀ ਆਯੋਜਿਤ ਕੀਤਾ। ਸੰਯੁਕਤ ਸਕੱਤਰ ਇਲਾਂਗਬਾਮ ਰੌਬਰਟ ਸਿੰਘ ਨੇ ਸਫਾਈ ਮਿੱਤਰਾਂ ਨਾਲ ਗੱਲਬਾਤ ਕੀਤੀ ਅਤੇ ਉਨ੍ਹਾਂ ਦੀ ਸਮਰਪਿਤ ਸੇਵਾਵਾਂ ਲਈ ਧੰਨਵਾਦ ਪ੍ਰਗਟ ਕੀਤਾ। ਉਨ੍ਹਾਂ ਨੇ ਰੋਜ਼ਾਨਾ ਦੇ ਜੀਵਨ ਵਿੱਚ ਸਵੱਛਤਾ ਨੂੰ ਅਨਿੱਖੜਵਾਂ ਹਿੱਸਾ ਬਣਾਉਣ, ਆਲੇ-ਦੁਆਲੇ ਦੇ ਵਾਤਾਵਰਣ ਨੂੰ ਸਾਫ-ਸੁਥਰਾ ਰੱਖਣ ਅਤੇ ਇਨ੍ਹਾਂ ਕਦਰਾਂ-ਕੀਮਤਾਂ ਨੂੰ ਆਉਣ ਵਾਲੀਆਂ ਪੀੜ੍ਹੀਆਂ ਵਿੱਚ ਵਿਕਸਿਤ ਕਰਨ ਦੇ ਮਹੱਤਵ ‘ਤੇ ਜ਼ੋਰ ਦਿੱਤਾ। ਇਸ ਪ੍ਰੋਗਰਾਮ ਵਿੱਚ ਸਫਾਈ ਮਿੱਤਰਾਂ ਨੂੰ ਆਪਣੇ ਅਨੁਭਵ, ਪ੍ਰਤੀਕਿਰਿਆ ਅਤੇ ਸੁਝਾਅ ਸਾਂਝੇ ਕਰਨ ਦਾ ਮੌਕਾ ਵੀ ਮਿਲਿਆ।
ਵਿਸ਼ੇਸ਼ ਅਭਿਆਨ 6.0 ਦੇ ਤਹਿਤ ਆਯੋਜਿਤ ਇਨ੍ਹਾਂ ਪਹਿਲਕਦਮੀਆਂ ਨੇ ਸਵੱਛਤਾ ਨੂੰ ਹੁਲਾਰਾ ਦੇਣ ਦੇ ਨਾਲ-ਨਾਲ ਉਨ੍ਹਾਂ ਲੋਕਾਂ ਦੀ ਸਿਹਤ, ਗਰਿਮਾ ਅਤੇ ਭਲਾਈ ਦੇ ਪ੍ਰਤੀ ਮੰਤਰਾਲੇ ਦੀ ਵਚਨਬੱਧਤਾ ਨੂੰ ਰੇਖਾਂਕਿਤ ਕੀਤਾ, ਜੋ ਕਾਰਜ ਸਥਾਨਾਂ ਨੂੰ ਸਵੱਛ ਅਤੇ ਸਾਫ ਬਣਾਏ ਰੱਖਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ। ਸਵੱਛਤਾ ਦੀ ਸਮੀਖਿਆ, ਨਿਵਾਰਕ ਸਿਹਤ ਸੇਵਾਵਾਂ, ਯੋਗਦਾਨ ਦੇ ਸਨਮਾਨ ਅਤੇ ਸੰਵਾਦ ਨੂੰ ਇਕੱਠੇ ਜੋੜ ਕੇ ਮੰਤਰਾਲੇ ਨੇ ਸਵੱਛ, ਸਿਹਤਮੰਦ ਅਤੇ ਸਮਾਵੇਸ਼ੀ ਕਾਰਜ ਸਥਾਨ ਬਣਾਉਣ ਲਈ ਸਮੂਹਿਕ ਜ਼ਿੰਮੇਵਾਰੀ ਅਤੇ ਨਿਰੰਤਰ ਯਤਨਾਂ ਦੇ ਮਹੱਤਵ ਨੂੰ ਦੁਹਰਾਇਆ।
***********
ਐੱਸਆਰ/ਏਕੇ