Ha ka:
20 OCT 2026 9:51AM by PIB Shillong
Ka Indian Institute of Corporate Affairs (IICA), kawei na ki shlem treikam ba laitluid kaba hapoh jong ka tnat Corporate Affairs jong ka sorkar India, ka la pynlong ïa ka program Capacity Building ba shi sngi halor ka rukom pyntreikam ïa ka Corporate Social Responsibility (CSR) ha ka 16 tarik u Risaw 2026 ha Shillong, Meghalaya. Ba la pynlong da ka School of Business Environment (SBE), IICA, na ka bynta ka Meghalaya Integrated Development Centre of Excellence (MiDCE) kaba hapoh jong ka IICA Shillong, kane ka prokram lah pynbit pynbiang da ka Department of Commerce & Industries bad ka Department of Planning, Investment Promotion & Sustainable Development, jong ka sorkar Meghalaya.
Ïa kane ka prokram la pynlong hapoh ka jingïalam lynti jong u Shri Gyaneshwar Kumar Singh, u Director General & CEO, jong ka IICA, da ka jingthmu ban pynkhlaiñ ïa ka rukom pyntreikam ïa ka CSR bad ban kyntiew ïa ki rukom kiban pynbha ïa ka jingpynkhreh jong ka, ka jingpynurlong, ka jingbuddien bad ka jingbishar bniah, ha kata ka rukom kaban ïahap bad ki bynta ba ha khmat duh eh jong ka roi ka par ha Meghalaya bad ka thaiñ shatei lam mihngi hi baroh kawei.
Ka Sorkar Meghalaya ka la shim ïa ka bynta kaba kongsan eh ha kaban pynbit pynbiang ïa kane ka prokram lyngba ki tnat kiba dei khmih. Kane ka sienjam ka pynphalang ïa ka jingdonkam jong ka jingïasnohktilang hapdeng ka sorkar jylla bad ki shlem treikam bakyrpang jong ka Ri ha kaban pynkhlaiñ ïa ki sap bad ki bor treikam bad ban kyntiew ïa ki sienjam CSR kiba wanlam ïa ka roi ka par.
Ka jingseng ïa ka MiDCE da ka sorkar Meghalaya hapoh jong ka IICA Shillong, jong ka tnat Corporate Affairs, ka plielad ïa ka rynsan na ka bynta ki shlem ban ïatreilang bad ki tnat bapher bapher jong ka sorkar, ki kynhun seng kam lajong bad kiwei kiwei ki nongïadonbynta lang ha ka roi ka par.
U Bah M. L. Wanshnong, u Director, jong ka Directorate of Industries, jong ka sorkar Meghalaya, ha ka jingai jingkren jong u, u la kdew ïa ka jingdonkam jong ka CSR kum ka jingïatreilang kaba la pynkhreh bad kaba don ïa ka thong, na ka bynta ka roi ka par jong ka Jylla. U la ban jur ba ka jingkiew jong ki karkhana bad ka roi ka par jong ka imlang sahlang, ki long ki mat ba ïasnoh iwei ha iwei bad ba ki mar ki mata jong ki kynhun seng kam, ki jingpyntbit, ka teknoloji bad ka jingshem thymmai ki lah ban nohsynñiang don jingmut bha sha ki jingangnud jong ki paidbah jong ka Meghalaya.
U Bah Wanshnong u la pynpaw ba ka jingriewspah jong ka Meghalaya ha ka jingdon ki mar poh khyndew, ki kynhun ba pynroi ïa ka khaïi ka pateng, ka jinghiar pateng jong ki riti ki dustur bad ka jingbun jong ki samla ka plie ïa ki lad bakongsan na ka bynta ka jingkiew ha ka ïoh ka kot kaba kynthup lang ïa baroh. U la ban jur shuh shuh ba ka jingjop jong ka roi ka par ha ka liang ki karkhana dei ban da bishar ym tang ha ki kyndon jong ki jingbei tyngka ba ka khring, hynrei lyngba ki longïing longsem ba ka la kyrshan, ki sap treikam ba ka la kyntiew bad ki jaitbynriew ba ka la pynkhamti bor.
Ha kaba kdew ïa ki bynta bakongsan ba ki kynhun seng kam ki lah ban ïasnohktilang, u la ithuh ba ka jingpyntbit ïa ka sap bad ka jingaikam ïa ki samla, ka jingseng kam seng jam bad ka jingpynroi ïa ka jingseng kam ha ka thaiñ, ka jingpynkupbor ïa ki kynthei bad ki lad kamai jakpoh jong ka imlang sahlang, bad ka jingpynneh ïa ka Mariang, ki long kum ki bynta bakongsan eh ha kaba ki sienjam CSR kiba bit ki lah ban kyrshan ïa ki thong bakongsan jong ka Jylla ha kaban kyntiew ïa ka roi ka par. U la kdew ba ka jingïashimbynta jong kine ki kynhun seng kam ha ki jingai jinghikai ba ïadei bad ki karkhana, ki jingpule ba ïadei bad ki sap ki phong, ka seng kam seng jam, ka jingpynroi ïa ka seng kam ha ka thaiñ, bad ki sienjam jingpynneh ïa ka Mariang ki lah ban ïarap ban pynkhlaiñ ïa ki lad kamai jakpoh bad ai jingkyrshan ïa ka jingkiew kaba ïabiang lang katkum ka nongrim treikam jong ka CSR ba lah ban pynurlong.
U Shri Sanjay Gupta, u Regional Director, jong ka Ministry of Corporate Affairs, jong ka Sorkar India u la ai ka jingkren kaba kyrpang bad pynpaw ïa ka jingdonkam jong ka jingpyntreikam kaba seisoh jong ka CSR ha kaban kyntiew ïa ka roi ka par kaban neh ïa baroh lang ha baroh jong ka thaiñ shatei lam mihngi.
Da kaba kdew ïa ka jingriewspah jong ka thaiñ ha ka liang ka kolshor, ka jingdonkam jong ki jingïadei ha ka mariang bad ka jinglah ban ïohpdiang ïa ka roi ka par, u la ban jur ïa ka jingdonkam jong ka sienjam CSR ban shimkhia ïa ki jingdonkam bakongsan jong ka thaiñ. U la khot ruh shakhmat ïa ki kynhun seng kam, ban pynbha ïa ka jingïatreilang bad ki jaka ha nongkyndong bad ki kynhun jaitbynriew ba kham pajih na sor ha kylleng jong ki jylla ka thaiñ shatei lam mihngi, da kaba shimkhia ba ki sienjam treikam jong ka CSR kin long katkum ka jingdonkam jong ki briew ha ka thaiñ bad ba kin nohsynñiang sha ka roi ka par kaba ïaryngkat lang ha ka thaiñ.
Da kaba kdew ïa ka jingdonkam jong ka jingïasnohktilang hapdeng ki kynhun seng kam, ki shlem sorkar, ki tnat treikam ba ju pynlong ïa ki prokram bad ki Seng imlang sahlang u la ong ba ka jingpyntreikam ïa ka CSR ba seisoh ka lah ban don ïa ka bynta kaba kongsan eh ha kaban pynkhlaiñ ïa ka jingïashimbynta jong ki shnong ki thaw, bad ban thaw ïa ki lad kamai jakpoh kiba neh. U la kyntu ïa baroh ki nongïadonbynta ban khmih ïa ka bynta shatei lam mihngi kum ka thaiñ kaba dap kyrhai da ki jingkyrmen bad ki kabu ksiar, ha kaba ka jingïatreilang ba kitkhlieh jong ki kynhun seng kam ka lah ban nohsynñiang shibun sha ka jingkiew jong baroh bad ka jingïohi jngai jong ka roi ka par ha ka Ri baroh kawei.
Ka Prof. Garima Dadhich, Head, School of Business Environment, IICA, ha ka jingkren jong ka, ka la kdew ïa ka bynta jong ka SBE ha kaban kyrshan ïa ki kynhun seng kam ha ka liang jong ki ESG, CSR bad ka rukom pynïaid ïa ka khaïi ka pateng ba dap da ka jingkitkhlieh. Ka la pynpaw ïa ka jingdonkam ban ailad ïa ki kynhun seng kam ba kin pynkhlaiñ ïa ka jingsngewthuh jong ki halor ki rukom khaïi kiba don jingkitkhlieh bad ban kyrshan ïa ki ha kaban pynlong ïa ki kyndon jingdonkam bad ki bynta bakongsan ha ka jingpynneh sha ki sienjam ba lah ban pynurlong bad ba seisoh.
Ka Prof. Dadhich ka la kdew ruh ïa ka jinglah jong ka Meghalaya ban wanlam halade ïa ka roi ka par bad ha ka thaiñ shatei lam mihngi hi baroh kawei, da kaba banjur ïa ka jingdonkam jong ki lad ki lynti kiba ïadei katkum ki jingdonkam jong ka thaiñ bad ki briew ba shong ha ka. Ka la pynpaw ïa ka bynta jong ki shlem ba tei ïa ki sap treikam, ka jingkyrshan ha ka liang ka jingnang jingtip, bad ka jingïasnohktilang jong ki nongïohbynta ha kaban pynkhlaiñ ïa ki rukom khaïi kiba don jingkitkhlieh bad ban pynbha ïa ka jingmih jong ka roi ka par na ki sienjam kynhun seng kam.
U Shri Debarun Kalita, Officer on Special Duty, IICA Shillong, ha ka jingkren jong u, u la kdew ïa ka jingdonkam jong ka jingdon ka IICA ha ka thaiñ lyngba ka IICA Shillong. U la pynpaw ïa ka bynta jong ka IICA Shillong ha kaban pynïasnoh ïa ka jingduna hapdeng ki jingpyntbit ha ka kyrdan jong ka Ri bad ki bynta bakongsan jong ka roi ka par ha ka thaiñ da kaba pynsuk ïa ka jingïashimbynta hapdeng ki shlem sorkar, ki shnat seng kam bad kiwei ki nongïadonbynta. Ka jingdon jong ka IICA ha ka thaiñ ka plie ïa ka lad ban pynkhlaiñ ïa ka jingïatreilang, ban kyntiew ïa ka jingsam ïa ki jingtip bad ka pynshlur ïa ki lad jingïasnohktilang ha kaban pynïoh ïa ki jingdonkam jong ka roi ka par ha ka thaiñ shatei lam mihngi.
Ki jingkren bad ki jingai jinghikai ba kham bniah ki kynthup ïa ka nongrim jong ka CSR ha India, ki nongrim treikam katkum ka aiñ bad ki jingdonkam ban bud katkum ki kyndon ban pyndonkam hok ïa ka CSR na ka bynta ka roi ka par ha ka thaiñ, ka jingpynkhreh bad ka jingpyntreikam ïa ka CSR, ka jingbuddien, ka jingbishar bniah bad ka jinglum jingthoh, bad ka bynta jong ki nongïadonbynta ha kaban tei ïa ka jingïasnohktilang ha ka CSR ba seisoh. Ïa kine ki jingkren la ai da ka Prof. Garima Dadhich, Head, School of Business Environment (SBE), IICA; ka Ms. Shubhangi Singh, Senior Research Associate, SBE, IICA; bad ka Ms. Annu Yadav, Senior Research Associate, SBE, IICA. Ka Ms. Sangeeta Boruah ruh ka la nohsynñiang lang sha kane ka prokram. Kine ki jingkren la pynleit jingmut ha kaban pynkhlaiñ ïa ka jingsngewthuh jong ki nongïashimbynta halor ka rukom treikam jong ka CSR bad ka jingkyntiew ïa ki rukom ba ïahap bad ka jingpynkhreh ïa ka projek, ka jingpynurlong, ka jingbuddien bad ka jingïatreilang jong ki nongïadonbynta.
Ki jingïakren baroh ki la pynpaw ïa ka jingdonkam ban pynwan ïa ka sienjam ka CSR bad ki jingdonkam jong ka roi ka par ha ka thaiñ, ka jingpynkhlaiñ ïa ki projek design bad ka jingpynurlong, bad ka jingseng ïa ki lad jingkhmih bad jingbishar bniah ban peit ïa ka jingmih. Ka prokram ka la pynpaw ruh ïa ka bynta jong ki tnat jong ki ophis sorkar, ki kompeni, ki Seng treikam, bad ki kynhun ha kaban tei ïa ka jingïatreilang kaba seisoh bad ban kyntiew ïa ka jingkitkhlieh ha ki sienjam CSR.
Ka jingïadei jong ka CSR na ka bynta ka Jylla Meghalaya bad ka thaiñ shatei lam mihngi hi baroh kawei ka long ka bynta bakongsan jong ka jingpynleit jingmut ha ka prokram. Ka jinglong jingman bad ka imlang sahlang bapher jong ka thaiñ ka pynpaw ïa ka jingdonkam jong ki sienjam treikam pynroi kiba ïahap bad ki jingdonkam jong ki paidbah ha ka thaiñ bad ka jingïatrei ba ïasnohktilang jong ki nongïadonbynta. Ka jingpynkhreh ïa ka CSR ba seisoh ka lah ban kyrshan ïa ki sienjam ba biang ha ka liang ka pule puthi, ka koit ka khiah, ka jingpynroi sap, ka jingkyntiew ïa ka kamai jakpoh bad ka jingpynneh ïa ka Mariang, katkum ki kyndon ba la pyntreikam jong ka Companies Act, 2013, bad ka Companies (CSR Policy) Rules, 2014.
Lyngba ka IICA Shillong bad ka School of Business Environment, ka IICA ka thmu ban pynkhlaiñ ïa ka jingïatreilang jong ki shlem bad ka jingtei ïa ki sap treikam ha ka thaiñ bad ban kyntiew ïa ka lad ka lynti sha ka CSR kaba kham suk, kaba don ïa ka thong bad kaba don ïa ka jingmih. Kane ka prokram ka pynkhlaiñ ruh shuh shuh ïa ka jingkut jingmut jong ka IICA, hapoh ka jingïalam jong u Shri Gyaneshwar Kumar Singh, u Director General & CEO, ban pynpoi sha ka rukom long jong ka khaïi pateng kaba don jingkitkhlieh bad ban kyrshan ïa ka roi ka par kaba neh bad ïa baroh, lyngba ki jingïasnohktilang bad ki shlem treikam bad ki sienjam ba don jingtip.
Khyndiat halor ka Indian Institute of Corporate Affairs (IICA)
Ka Indian Institute of Corporate Affairs ka dei ka shlem treikam ba laitluid hapoh jong ka Ministry of Corporate Affairs, jong ka Sorkar India. Ka ju pynlong ïa ki jingwadbniah, ki training, ki capacity building bad ka jingpynroi ïa ka jingtip ha ki bynta kiba ïadei bad ka kam ki kynhun seng kam lajong, ka rukom pynïaid jong ki, ka Corporate Social Responsibility bad ka rukom pynïaid ïa ka Khaïi pateng ba don jingkitkhlieh.
Halor ka School of Business Environment (SBE), IICA
Ka School of Business Environment, IICA, ka trei ha ki bynta jong ka Corporate Social Responsibility, ka ESG, ka jingpynneh bad ka rukom pynïaid ïa ka Khaïi pateng ba don jingkitkhlieh. Lyngba ki jingwadbniah, ki jingai jinghikai, ki capacity building bad ki jingïasnohktilang bad ki nongïadonbynta kane ka skul ka kyrshan ïa ka roi ka par bad ka jingpynurlong ïa ki rukom khaïi pateng ba don jingkitkhlieh
Shaphang ka Meghalaya Integrated Development Centre of Excellence (MiDCE)
La Seng ïa ka Meghalaya Integrated Development Centre of Excellence da ka
sorkar Meghalaya hapoh jong ka IICA Shillong, Ministry of Corporate Affairs, jong ka sorkar India. Ka plielad ïa ka rynsan na ka bynta ki shlem treikam ban ïasnohktilang bad ban tei ïa ki sap treikam ban kyrshan ïa ka jingïatreilang ba wanlam ïa ka roi ka par ha Meghalaya.
*****