سنگاپور-بھارت میری ٹائم دو طرفہ مشق (سمبیکس-2026) کے 33 ویں ایڈیشن کا اختتام

سنگاپور-بھارت بحری دوطرفہ مشق (سمبیکس-2026) کا 33 واں ایڈیشن، جس کی میزبانی بھارتی بحریہ نے وشاکھاپٹنم میں کی، 26 اکتوبر 2026 کو اختتام پذیر ہوا۔ اس مشق نے بھارتی بحریہ اور جمہوریہ سنگاپور کی بحریہ (آر ایس این) کے درمیان دیرینہ بحری تعاون اور عملی اشتراک کو مزید مستحکم کیا۔

دو طرفہ روابط کے ایک حصے کے طور پر، آر ایس این کے فلیٹ کمانڈر کرنل برٹرم آنگ نے مشرقی بیڑے کے فلیگ آفیسر کمانڈنگ، ریئر ایڈمرل وشال بشنوئی سے ملاقات کی اور دونوں ممالک کے درمیان بحری تعاون کو مضبوط بنانے سے متعلق پیشہ ورانہ امور پر تبادلۂ خیال کیا۔ اس ملاقات میں باہمی دلچسپی کے امور پر گفتگو کا موقع بھی فراہم ہوا۔

سمبیکس-2026 دو مراحل میں منعقد کی گئی۔ بندرگاہی مرحلے میں موضوعاتی ماہرین کے تبادلے (ایس ایم ای ای)، ایک دوسرے کے بحری جہازوں کے دورے، پیشہ ورانہ تبادلۂ خیال، کھیلوں کی سرگرمیاں اور منصوبہ بندی سے متعلق کانفرنسیں شامل تھیں۔ ان سرگرمیوں سے عملی معلومات کے تبادلے میں سہولت ملی اور باہمی افہام و تفہیم میں اضافہ ہوا۔ خلیج بنگال میں منعقدہ سمندری مرحلے میں بحری مداخلت کی کارروائیوں، آبدوز شکن جنگ (اے ایس ڈبلیو)، فضائی دفاعی جنگ اور سطحِ آب پر جنگی کارروائیوں کی مشقیں، بحری جہاز رانی سے متعلق عملی مشقیں اور ایک دوسرے کے بحری جہازوں سے طیاروں کی پروازوں کی کارروائیاں شامل تھیں۔ ان سرگرمیوں سے شریک افواج کے درمیان تال میل اور باہمی عملی مطابقت میں اضافہ ہوا۔

اس مشق میں آر ایس این کے بحری جہاز آر ایس ایس سپریم نے حصہ لیا، جو فارمڈیبل کلاس کا اسٹیلتھ فریگیٹ ہے اور اس پر ایس ایچ-70 بی ہیلی کاپٹر تعینات تھا۔ بھارتی بحریہ کی نمائندگی ملک میں تیار کردہ اسٹیلتھ فریگیٹ آئی این ایس نیلگیری، آبدوز شکن کارویٹ آئی این ایس کامورتا اور شریک ہوابازی کے اثاثوں نے کی، جن میں پی-8 آئی اور ڈورنیئر بحری گشتی طیارے، ہاک ایڈوانسڈ جیٹ ٹرینرز اور ایم ایچ-60 آر ہیلی کاپٹر شامل تھے۔

سمبیکس بھارت اور سنگاپور کے درمیان دو طرفہ بحری تعاون، عملی باہمی مطابقت اور پیشہ ورانہ روابط کو مستحکم کرنے کے لیے ایک اہم پلیٹ فارم کے طور پر خدمات انجام دیتی رہی ہے۔ اس مشق نے بحرِ ہند کے خطے (آئی او آر) میں بحری سلامتی کو بہتر بنانے اور استحکام کو فروغ دینے کے لیے دونوں ممالک کے عزم کا بھی مظاہرہ کیا۔

***********

ش ح۔ ف ش ع

 U: 6792