ماحولیات، جنگلات اور موسمیاتی تبدیلی کی وزارت
پوسٹ کرنے کی تاریخ:
23 OCT 2026 7:32PM by PIB Delhi
این سی آر اور اس کے قریبی علاقوں میں فضائی معیار کے انتظام کے کمیشن (سی اے کیو ایم) کے چیئرپرسن کی قیادت میں ایک اعلیٰ سطحی ٹیم نے ریاست پنجاب کے اضلاع روپڑ، ہوشیار پور اور امرتسر میں تھرمل پاور اور سی بی جی پلانٹس، کرشی وگیان کیندر، زرعی کھیتوں اور بائیو ماس پلانٹ کا دورہ کیا۔ ٹیم نے دھان کی کٹائی کے جاری سیزن کے دوران پرالی کے مؤثر انتظام اور پرالی جلانے کے واقعات کو روکنے کے لیے زمینی سطح پر نافذ کیے جانے والے مختلف ان-سیٹو یعنی کھیت کے اندر اور ایکس-سیٹو یعنی کھیت سے باہر اقدامات کی تیاریوں کا جائزہ لیا اور ان کا معائنہ کیا۔ سی اے کیو ایم نے ریاستی حکام کو ہدایت دی کہ وہ فضائی آلودگی کے ضوابط کی تعمیل کو یقینی بنانے پر خصوصی توجہ دیتے ہوئے تھرمل پاور پلانٹس میں کو-فائرنگ کے اہداف کو حاصل کریں۔ کرشی وگیان کیندر کے دورے کے دوران، ٹیم نے ان-سیٹو اور ایکس-سیٹو استعمال کے لیے مشینری کا عملی مظاہرہ بھی دیکھا۔
ٹیم نے کاشتکاروں کو دھان کی باقیات کے انتظام میں سہولت فراہم کرنے کے لیے مشینری کی دستیابی اور اس کے کافی ہونے کا بھی جائزہ لیا۔ مزید برآں، ٹیم نے ایکس-سیٹو انتظام کے ایک حصے کے طور پر، تھرمل پاور پلانٹس اور دھان کی پرالی کا استعمال کرنے والے بائیو ماس پلانٹس میں پرالی کے زیادہ سے زیادہ استعمال کے لیے کیے گئے انتظامات اور موجودہ طریقہ کار کا معائنہ کیا۔
دھان کی کٹائی میں تیزی آنے کے پیشِ نظر، کمیشن نے تمام متعلقہ حکام کی جانب سے تیز تر اور مربوط کوششوں کی ضرورت پر زور دیا تاکہ یہ یقینی بنایا جا سکے کہ کسانوں کو وقت پر سی آر ایم مشینری تک مناسب رسائی حاصل ہو۔ کمیشن نے ہدایت دی کہ کسانوں کو زیادہ سے زیادہ سہولت فراہم کی جائے، جس میں خاص توجہ کٹائی کی مصروفیت کے دنوں کے دوران ابھرتی ہوئی ضرورتوں کے مطابق مشینری کی دستیابی اور اس کے مؤثر استعمال کو یقینی بنانے پر مرکوز ہو۔
کمیشن نے ریاستی حکام کو ہدایت دی کہ وہ پرالی جلانے کے واقعات کو کم سے کم کرنے کے لیے دھان کی پرالی کے انتظام کے ان نظاموں کو مزید مضبوط بنائیں۔ دھان کی پرالی کے انتظام کے جاری اقدامات پر مؤثر طریقے سے عمل درآمد کو یقینی بنانے کے لیے زمینی سطح پر پیشگی نگرانی اور آپریشنل خامیوں کو بروقت دور کرنے کی ضرورت پر بھی زور دیا گیا۔
******
(ش ح –ا ب ن)
U.No:6614