ایس ٹی پی آئی نے اتراکھنڈ کے ٹیکنالوجی اور اسٹارٹ اپ ایکو سسٹم کو مضبوط بنانے کے لیے دہرادون میں نئی انکیوبیشن سہولت کا افتتاح کیا

وزارت الیکٹرانکس اور اطلاعاتی ٹیکنالوجی (میتی)، حکومت ہند کے تحت ایک اہم سائنس و ٹیکنالوجی ادارے سافٹ ویئر ٹیکنالوجی پارکس آف انڈیا (ایس ٹی پی آئی) نے اتراکھنڈ کے دہرادون میں سہسترادھارا روڈ واقع آئی ٹی پارک میں اپنی نئی انکیوبیشن سہولت کا افتتاح کیا۔اس سہولت کا افتتاح حکومت ہند کے الیکٹرانکس اور انفارمیشن ٹیکنالوجی اور کامرس و صنعت کے وزیر مملکت جناب جتن پرساد نے کیا۔ اس موقع پر حکومت اتراکھنڈ کے آئی ٹی اور گڈ گورننس کے وزیر جناب پردیپ بترا اور زراعت کے وزیر جناب گنیش جوشی بھی موجود تھے۔نئی سہولت کا مقصد ٹیکنالوجی کمپنیوں اور اسٹارٹ اپس کو جدید بنیادی ڈھانچہ فراہم کرکے ریاست کے آئی ٹی/آئی ٹی ای ایس ایکو سسٹم کو مضبوط بنانا ہے۔ اس کے ساتھ ہی یہ جدت طرازی، کاروباری سرگرمیوں، مصنوعات کی تیاری اور روزگار کے مواقع پیدا کرنے کو بھی فروغ دے گی۔

چار منزلوں پر تقریباً 30 ہزار مربع فٹ رقبے میں پھیلی نئی انکیوبیشن سہولت میں نیم فرنشڈ دفتری جگہیں، تیز رفتار انٹرنیٹ کنکٹیویٹی، ایئر کنڈیشنڈ اور ماحول دوست کام کرنے کا ماحول، ایک آڈیٹوریم، دو میٹنگ روم، دو کانفرنس روم اور نیٹ ورک آپریشنز سینٹر (این او سی) شامل ہیں۔ یہ سہولت ٹیکنالوجی سے وابستہ کاروباری اداروں کے لیے سازگار کام کا ماحول فراہم کرنے کے مقصد سے تیار کی گئی ہے، جس سے باہمی تعاون، کاروباری ترقی اور توسیع کو فروغ ملے گا۔

خطاب کرتے ہوئے حکومت ہند کے الیکٹرانکس اور انفارمیشن ٹیکنالوجی اور کامرس و صنعت کے وزیر مملکت جناب جتن پرساد نے کہا، ’’ہندوستان کے ترقی یافتہ ملک بننے کے سفر کو دو اہم عوامل، ٹیکنالوجی اور تجارت، آگے بڑھا رہے ہیں۔ تیزی سے باہم مربوط ہوتی دنیا میں ٹیکنالوجی کے شعبے میں خودکفالت اس بات کو یقینی بنانے کے لیے ضروری ہے کہ ملک سیمی کنڈکٹر جیسی اہم ٹیکنالوجیز کے لیے بیرونی ذرائع پر انحصار نہ کرے۔ کووڈ-19 وبا نے ظاہر کیا کہ چپس کی قلت کس طرح پوری صنعتوں کو متاثر کر سکتی ہے، جس سے ملک میں مینوفیکچرنگ کی صلاحیتیں پیدا کرنے کی اہمیت اجاگر ہوتی ہے۔ سیمی کنڈکٹر اور الیکٹرانکس مینوفیکچرنگ ایکو سسٹم کو مضبوط بنانے پر ہماری توجہ کا مقصد دنیا کے ساتھ مسلسل روابط برقرار رکھتے ہوئے اور عالمی بہترین طریقہ کار اپناتے ہوئے ہندوستان کے تکنیکی مستقبل کو محفوظ بنانا ہے۔‘‘

انہوں نے مزید کہا، ’’دہرادون میں ایس ٹی پی آئی کی نئی انکیوبیشن سہولت ایک ایسا متحرک ماحول فراہم کرے گی جہاں اسٹارٹ اپس اور ٹیکنالوجی سے وابستہ کاروباری ادارے باہمی تعاون، خیالات کے تبادلے اور اختراعی حل تیار کرنے کے لیے مل کر کام کر سکیں گے۔ اتراکھنڈ میں پہلے ہی 1700 سے زائد رجسٹرڈ اسٹارٹ اپس موجود ہیں اور اس طرح کے اقدامات ریاست کے کاروباری ایکو سسٹم کو مزید مضبوط بنا سکتے ہیں۔ الیکٹرانکس مینوفیکچرنگ، بشمول پرزہ جات کی تیاری اور کاشی پور میں الیکٹرانکس مینوفیکچرنگ کلسٹر کی ترقی کو فروغ دینے کی کوششوں کے ساتھ یہ سہولت سرمایہ کاری کو راغب کرنے، روزگار پیدا کرنے اور نوجوان صلاحیتوں کے لیے مواقع پیدا کرنے میں مدد دے گی۔ ہمارا مقصد ایسا خودکفیل ہندوستان تشکیل دینا ہے جو عالمی سطح پر مسابقت کے لیے تیار ہو اور وِکست بھارت کے وژن میں بامعنی کردار ادا کرے۔‘‘

حکومت اتراکھنڈ کے آئی ٹی اور گڈ گورننس کے کابینی وزیر جناب پردیپ بترا نے کہا، ’’2047 تک وِکست بھارت کا وژن صرف بنیادی ڈھانچے کی ترقی تک محدود نہیں ہے، بلکہ اس کے لیے ہماری سوچ، ہماری امنگوں اور ملک کے تئیں ہماری وابستگی میں تبدیلی ضروری ہے۔ ہمارا دیوبھومی اتراکھنڈ اپنے عوام کی صلاحیتوں اور لگن کے بل پر مزید ترقی کی بے پناہ صلاحیت رکھتا ہے۔ ریاست میں سیاحوں اور کاروباری اداروں کی بڑھتی ہوئی دلچسپی کے پیش نظر بنیادی ڈھانچے کو مضبوط بنانا اور جدید سہولتوں تک رسائی بہتر بنانا ان امنگوں کو پورا کرنے کے لیے ضروری ہوگا۔ دہرادون میں ایس ٹی پی آئی کی نئی انکیوبیشن سہولت جیسے اقدامات ٹیکنالوجی، جدت طرازی اور کاروبار کے لیے سازگار ماحول پیدا کرنے میں مدد کریں گے اور اتراکھنڈ کی ترقی کے ساتھ ساتھ ترقی یافتہ ملک کے ہندوستان کے وسیع تر وژن میں بھی اپنا کردار ادا کریں گے۔‘‘

حکومت اتراکھنڈ کے زراعت کے وزیر جناب گنیش جوشی نے کہا، ’’وزیراعظم جناب نریندر مودی کے وِکست بھارت کے وژن سے تحریک لیتے ہوئے ہمیں روایتی آئی ٹی مراکز سے آگے اپنے نوجوانوں کے لیے مواقع پیدا کرنے چاہئیں۔ دہرادون، جو پہلے ہی ایک تعلیمی مرکز کے طور پر اپنی شناخت بنا چکا ہے، بنگلورو اور حیدرآباد کی طرح ایک نمایاں آئی ٹی مرکز بننے کی صلاحیت رکھتا ہے۔ مجھے یقین ہے کہ یہ نیا مرکز ترقی کے نئے راستے کھولے گا، اتراکھنڈ کے ٹیکنالوجی ایکو سسٹم کو مضبوط کرے گا اور آئندہ پانچ برسوں میں نوجوانوں کے لیے مزید مواقع پیدا کرے گا۔‘‘

حکومت اتراکھنڈ کے آئی ٹی سکریٹری جناب پنکج پانڈے نے کہا، ’’ایس ٹی پی آئی کی نئی انکیوبیشن سہولت اتراکھنڈ کے ٹیکنالوجی ایکو سسٹم میں ایک اہم اضافہ ہے۔ یہ نوجوان کاروباری افراد کو بنیادی ڈھانچے اور معاونت فراہم کرے گی، جس میں سینٹر آف انٹرپرینیورشپ جیسے اقدامات بھی شامل ہیں، تاکہ وہ اپنی مہارت کو کامیاب کاروبار میں تبدیل کر سکیں۔ کاروباری سرگرمیوں کو فروغ دینے کے ساتھ ساتھ اتراکھنڈ ڈیجیٹل گورننس کو بھی آگے بڑھا رہا ہے اور تقریباً ایک ہزار خدمات آن لائن فراہم کی جا رہی ہیں۔ یہ دونوں کوششیں مل کر ریاست کی ڈیجیٹل موجودگی کو مضبوط، جدت طرازی کو فروغ اور اتراکھنڈ کے نوجوانوں کے لیے نئے مواقع پیدا کرنے میں مدد کریں گی۔‘‘

ایس ٹی پی آئی کے ڈائریکٹر جنرل جناب اروند کمار نے کہا، ’’ایس ٹی پی آئی کی اہم طاقتوں میں سے ایک اس کا ملک گیر نیٹ ورک ہے، جو اسٹارٹ اپس کو اپنے فوری ایکو سسٹم سے آگے پورے ملک میں سرمایہ کاروں، ماہرین اور ٹیکنالوجی کے حل تک رسائی فراہم کرتا ہے۔ دہرادون میں نئی انکیوبیشن سہولت ان ابھرتے ہوئے آئی ٹی/آئی ٹی ای ایس اداروں کو بنیادی ڈھانچہ فراہم کرے گی جو اپنی سرگرمیاں شروع یا توسیع دینا چاہتے ہیں۔ اس کے علاوہ رہنمائی، صنعت سے روابط اور سائبر سکیورٹی سمیت حقیقی دنیا کے مسائل کے حل پر توجہ مرکوز کرنے والے سینٹرز آف انٹرپرینیورشپ کے ذریعے اسٹارٹ اپس کو بھی معاونت فراہم کی جائے گی۔ یہ سہولت اتراکھنڈ میں ٹیکنالوجی پر مبنی کاروباری اداروں کے لیے ایک جامع معاون ایکو سسٹم تشکیل دینے میں مدد دے گی۔ ریاستی حکومت کی جانب سے آئی ٹی/آئی ٹی ای ایس اور اسٹارٹ اپ پالیسیوں پر توجہ مضبوط کیے جانے کے ساتھ ہمیں یقین ہے کہ اتراکھنڈ اپنے ٹیکنالوجی اور اسٹارٹ اپ ایکو سسٹم کی ترقی کو تیز کرنے کے لیے اچھی پوزیشن میں ہے۔‘‘

حکومت اتراکھنڈ کی معاونت سے 2001 میں قائم ایس ٹی پی آئی دہرادون انکیوبیشن خدمات اور ایس ٹی پی، نان ایس ٹی پی اور ای ایچ ٹی پی اسکیموں کے نفاذ کے ذریعے ریاست کی آئی ٹی/آئی ٹی ای ایس صنعت کو فروغ دینے اور معاونت فراہم کرنے کے لیے کام کر رہا ہے۔ دہرادون کے آئی ٹی پارک میں موجود انکیوبیشن سہولت تقریباً 19,533 مربع فٹ سپر بلٹ اپ رقبہ پر مشتمل ہے، جس سے متعدد آئی ٹی/آئی ٹی ای ایس یونٹس فی الحال فائدہ اٹھا رہے ہیں۔ نئی سہولت خطے میں ٹیکنالوجی سے وابستہ کاروباری اداروں کے لیے دستیاب بنیادی ڈھانچے کو مزید وسعت دے گی۔

ایس ٹی پی آئی دہرادون کی سرگرمیوں میں اسٹارٹ اپ کی ترقی اور مالی معاونت بھی شامل ہے۔ نیکسٹ جنریشن انکیوبیشن اسکیم (این جی آئی ایس) کے تحت چیلنج پروگراموں کے ذریعے 52 اسٹارٹ اپس کا انتخاب کیا گیا ہے، جن میں سے 17 کو 4.25 کروڑ روپے کی سیڈ فنڈنگ فراہم کی گئی ہے، جبکہ 26 سے زائد اسٹارٹ اپس کو 90،000 روپے فی کس کے وظیفے دیے گئے ہیں۔ یہ اقدامات ٹیکنالوجی میں جدت طرازی کی حوصلہ افزائی، ابھرتے ہوئے کاروباری افراد کی معاونت اور قابل توسیع مصنوعات و حل کی تیاری کو فروغ دینے کے لیے ایس ٹی پی آئی کی وسیع تر کوششوں کا حصہ ہیں۔

اس سہولت کا افتتاح انکیوبیشن بنیادی ڈھانچے تک رسائی بہتر بنانے اور حکومت، صنعت، تعلیمی اداروں اور کاروباری افراد کے درمیان تعاون کو فروغ دے کر اتراکھنڈ کے ٹیکنالوجی ایکو سسٹم کو مضبوط بنانے کی جانب ایک مزید قدم ہے۔ متعلقہ فریقوں کے ساتھ مسلسل رابطے کے ذریعے ایس ٹی پی آئی کا مقصد آئی ٹی/آئی ٹی ای ایس اداروں کی ترقی میں معاونت، جدت طرازی اور دانشورانہ ملکیت کی تخلیق کو فروغ دینا اور ریاست میں ٹیکنالوجی پر مبنی اقتصادی ترقی و روزگار کے مواقع پیدا کرنے میں اپنا کردار ادا کرنا ہے۔

ایس ٹی پی آئی کے بارے میں:

سافٹ ویئر ٹیکنالوجی پارکس آف انڈیا (ایس ٹی پی آئی)، وزارت الیکٹرانکس اور انفارمیشن ٹیکنالوجی (میتی) کے تحت ایک اہم سائنس و ٹیکنالوجی ادارہ ہے، جو آئی ٹی/آئی ٹی ای ایس صنعت، جدت طرازی، تحقیق و ترقی، اسٹارٹ اپس اور ابھرتی ہوئی ٹیکنالوجی کے شعبوں میں مصنوعات اور دانشورانہ ملکیت کی تخلیق کو فروغ دینے کے لیے کام کرتا ہے۔ ان شعبوں میں انٹرنیٹ آف تھنگز، بلاک چین، مصنوعی ذہانت، مشین لرننگ، کمپیوٹر وژن، روبوٹکس، آگمینٹڈ اور ورچوئل رئیلٹی، اینیمیشن اور ویژول ایفیکٹس، ڈیٹا سائنس اور اینالیٹکس شامل ہیں۔ ایس ٹی پی آئی گیمنگ، فن ٹیک، ایگری ٹیک، میڈ ٹیک، خودکار اور مربوط نقل و حرکت، ای ایس ڈی ایم، سائبر سکیورٹی، انڈسٹری 4.0 اور ڈرونز سمیت مختلف شعبوں میں جدت طرازی کی معاونت کرتا ہے۔

*****

ش ح ۔   م  د ۔  م  ص

(U : 6601 )