پوسٹ کرنے کی تاریخ:
22 OCT 2026 3:47PM by PIB Delhi
محکمۂ سائنس و ٹیکنالوجی (ڈی ایس ٹی) محکمۂ انتظامی اصلاحات و عوامی شکایات (ڈی اے آر پی جی) کی ہدایات کے مطابق خصوصی مہم 6 پر عمل درآمد کر رہا ہے۔ اس مہم میں محکمہ، اس کے خودمختار اداروں، ماتحت دفاتر، فیلڈ دفاتر، ٹیکنالوجی اختراعی مراکز (ٹی آئی ایچز)، مشنز اور دیگر متعلقہ تنظیموں نے سرگرمی سے حصہ لیا ہے۔
مہم کے آغاز پر صفائی مہم کے لیے 315 مقامات کی نشاندہی کی گئی تھی۔ بعد ازاں، 5 اکتوبر کو جوائنٹ سکریٹری (انتظامیہ) اور خصوصی مہم 6 کے نوڈل افسر کی صدارت میں تمام خودمختار اداروں، ماتحت دفاتر، فیلڈ دفاتر، ٹیکنالوجی اختراعی مراکز، مشنز اور دیگر متعلقہ تنظیموں کے ساتھ جائزہ اجلاس منعقد ہوا۔ اس اجلاس میں تمام تنظیموں کو مہم میں سرگرمی سے حصہ لینے اور اس موقع سے فائدہ اٹھاتے ہوئے صفائی مہم چلانے، زیرِ التوا ریکارڈ اور ناکارہ سامان کو ٹھکانے لگانے، عوامی شکایات کا ازالہ کرنے اور کام کی جگہوں کے مجموعی انتظام کو بہتر بنانے کی ترغیب دی گئی۔
ان مسلسل کوششوں کے نتیجے میں صفائی مہم کے لیے نشان زد مقامات کی تعداد 315 سے بڑھ کر نمایاں طور پر 401 ہو گئی۔ ان 401 مقامات میں سے اب تک 397 مقامات پر صفائی مہم چلائی جا چکی ہے، جو محکمہ کے فعال رویے اور اس سے وابستہ تنظیموں میں بڑھتی ہوئی شرکت کی عکاسی کرتی ہے۔
توقع ہے کہ مہم کے بقیہ عرصے میں اس کی رفتار مزید تیز ہوگی۔ 31 اکتوبر 2026 کو مہم کے اختتام تک صفائی مہم کے مقامات کی مجموعی تعداد تقریباً 800 تک پہنچنے کی امید ہے۔
زیرِ التوا معاملات کو نمٹانے کے سلسلے میں بھی نمایاں پیش رفت ہوئی ہے۔ عوامی شکایات کی 135 درخواستوں میں سے 99 نمٹا دی گئی ہیں، جب کہ عوامی شکایات سے متعلق 23 اپیلوں میں سے 9 کا ازالہ کر دیا گیا ہے۔ مزید برآں، اراکینِ پارلیمنٹ سے موصول ہونے والے 12 حوالوں میں سے 7 کو نمٹا دیا گیا ہے۔
ریکارڈ کے انتظام کے تحت نظرثانی کے لیے مقررہ 7,000 کاغذی فائلوں میں سے 6,280 کا جائزہ لیا جا چکا ہے، جب کہ شناخت شدہ 2,598 فائلوں کو تلف کر دیا گیا ہے۔ ای فائلوں کے معاملے میں نظرثانی کے لیے پیش کی گئی 1,900 فائلوں میں سے 1,791 کا جائزہ لیا گیا ہے، جن میں سے 949 ای فائلیں بند کی جا چکی ہیں۔
خصوصی مہم 6 کے تحت سامان کو ٹھکانے لگانے اور صفائی مہم کی سرگرمیوں کے ذریعے مجموعی طور پر 61,888 مربع فٹ جگہ خالی کرائی گئی ہے، جب کہ ناکارہ سامان کو ٹھکانے لگانے سے 8,25,696 روپے کی آمدنی حاصل ہوئی ہے۔
مقررہ مدت کے اندر مہم کی تمام باقی سرگرمیاں مکمل کرنے کے لیے مسلسل اور مرکوز کوششیں کی جا رہی ہیں۔ محکمہ مہم کی پیش رفت پر قریبی نظر رکھے ہوئے ہے اور خصوصی مہم 6 کے اختتام تک تمام نشان زد سرگرمیوں کو بروقت مکمل کرنے اور مقررہ اہداف حاصل کرنے کے لیے پُرعزم ہے۔
مذکورہ کامیابیاں مہم کے وسطانی مرحلے تک حاصل ہونے والی پیش رفت کی عکاسی کرتی ہیں۔ تمام متعلقہ تنظیموں کی جانب سے مہم کی سرگرمیاں جاری رکھنے اور صفائی کے لیے نئے مقامات کی باقاعدگی سے نشاندہی کیے جانے کے پیشِ نظر، محکمہ کو توقع ہے کہ باقی مدت میں اس کی کارکردگی مزید بہتر ہوگی۔
خصوصی مہم 6 کے تحت بیداری پیدا کرنے اور عوام تک رسائی بڑھانے کے لیے محکمۂ سائنس و ٹیکنالوجی نے پریس انفارمیشن بیورو (پی آئی بی) کے تین بیانات جاری کیے ہیں اور ایکس (سابقہ ٹوئٹر) کے ذریعے مہم کی پیش رفت اور کامیابیوں کو اجاگر کرنے کے لیے 72 ٹویٹس بھی شیئر کیے ہیں۔ ایکس کے علاوہ فیس بک اور لنکڈ اِن جیسے عوامی رابطے کے پلیٹ فارمز سے بھی مؤثر طور پر استفادہ کیا گیا ہے، تاکہ مہم کے پیغام کو زیادہ سے زیادہ لوگوں تک پہنچایا جا سکے۔
*******
ش ح۔ ع ح۔ ت ع
UN-NO-6485