منشیات کی مانگ میں کمی کے قومی لائحۂ عمل (این اے پی ڈی ڈی آر) کے تحت، وزارتِ سماجی انصاف و تفویضِ اختیارات، نشہ آور اشیا کے استعمال سے متاثرہ افراد کو علاج، مشاورت، بحالی اور معاشرے میں دوبارہ انضمام کی خدمات فراہم کرنے کے لیے معاونت فراہم کرتی ہے۔

نشے کی لت سے چھٹکارے کے علاج، بحالی اور مستقل نفسیاتی مدد تک رسائی، افراد کو مادی انحصار سے نجات پانے اور اپنی زندگیوں کو نئے سرے سے سنوارنے میں اہم کردار ادا کر سکتی ہے۔

امت کمار (بدلا ہوا نام)، جن کی عمر 47 سال ہے، کا تعلق دیگر پسماندہ طبقات (او بی سی) برادری سے ہے اور وہ اتر پردیش کے ضلع گورکھپور کے رہائشی ہیں۔ وہ اپنا ذاتی کاروبار کرتے تھے، لیکن منشیات کی لت کی وجہ سے انہیں شدید ذاتی، سماجی اور معاشی چیلنجوں کا سامنا کرنا پڑا۔ بری صحبت اور ذہنی دباؤ کے زیرِ اثر، انہیں سگریٹ نوشی اور نشہ آور اشیاء کے استعمال کی عادت پڑ گئی۔ وقت گزرنے کے ساتھ، ان کی اس لت نے ان کی جسمانی اور ذہنی صحت کو بری طرح متاثر کیا، ان کے خود اعتمادی کو کم کیا اور باقاعدہ کام کاج اور صحت مند سماجی تعلقات برقرار رکھنے میں مشکلات پیدا کیں۔ ایک معاشی طور پر پسماندہ خاندان سے تعلق رکھنے کی وجہ سے، غیر مستقل روزگار کے باعث انہیں معاشی تنگی اور غیر مستحکم آمدنی کا سامنا کرنا پڑا۔ سماجی بدنامی نے ان کی تنہائی کو مزید بڑھا دیا، جبکہ خاندان کے ساتھ خراب تعلقات نے ان کی مشکلات میں اور زیادہ اضافہ کر دیا۔

ان تمام چیلنجوں کے باوجود، امیت کمار اپنی لت پر قابو پانے، اپنی خود داری کو دوبارہ بحال کرنے، ایک صحت مند زندگی گزارنے اور اپنے خاندان کی معاشی کفالت کرنے کے خواہشمند تھے۔ وہ اس سے قبل 2018 میں بھی علاج کروا چکے تھے اور ان کی حالت میں بہتری آئی تھی، لیکن بعد میں وہ دوبارہ اس لت کا شکار ہو گئے۔ صحت یاب ہونے اور اپنی زندگی کو نئے سرے سے سنوارنے کے پختہ ارادے کے ساتھ، انہوں نے ایک بار پھر علاج کے لیے رجوع کیا اور خود کو اس بحالی کے عمل کے لیے وقف کر دیا۔

13 اگست 2021 کو امیت کمار کو اتر پردیش کے ضلع گورکھپور میں واقع باسو دیو تیواری سیوا سنستھان کے منشیات کی لت کے شکار افراد کے لیے پُنرجنم مربوط بازآبادکاری مرکز (آئی آر سی اے) کے ذریعے منشیات کی مانگ میں کمی کے قومی لائحہ عمل(این اے پی ڈی ڈی آر) کے تحت مدد فراہم کی گئی۔ مرکز نے نشے کی لت سے چھٹکارا پانے کے لیے مفت علاج، طبی نگہداشت، تجویز کردہ ادویات، نفسیاتی مشاورت اور حوصلہ افزائی کی سہولت فراہم کی۔ باقاعدہ مشاورتی نشستوں اور بعد از علاج نگہداشت نے انہیں نشے کی لت سے وابستہ مشکلات کا سامنا کرنے اور صحت یابی کے لیے اپنے عزم پر قائم رہنے میں مدد دی۔ خاندانی مشاورت اور جذباتی تعاون نے بھی ان کے اعتماد کو بحال کرنے، خاندانی تعلقات کو بہتر بنانے اور انہیں دوبارہ معاشرے کا حصہ بنانے میں اہم کردار ادا کیا۔

مرکز کی مسلسل مدد اور اپنے پختہ عزم کی بدولت، امیت کمار نے کامیابی کے ساتھ سگریٹ نوشی اور منشیات کا استعمال ترک کر دیا۔ صحت یابی کے بعد، انہوں نے دوبارہ کام کاج شروع کیا اور اپنا آٹو ریکشا چلا کر روزگار کا ایک ذریعہ قائم کیا۔ اب وہ تقریباً 30,000 روپے ماہانہ کماتے ہیں، جو کہ ان کے غیر مستقل کام اور غیر مستحکم آمدنی والی ماضی کی صورتحال کے مقابلے میں ایک نمایاں بہتری ہے۔ ان کی اس کمائی نے ان کے خاندان کی معاشی حالت کو بہتر بنانے میں مدد کی ہے اور انہیں گھر کے اخراجات میں زیادہ باقاعدگی کے ساتھ تعاون دینے کے قابل بنایا ہے۔ علاج، کاؤنسلنگ، بحالی اور بعد میں ملنے والی مسلسل مدد کے اس امتزاج نے انہیں ایک صحت مند، زیادہ ذمہ دار اور معاشی طور پر مستحکم زندگی کی طرف بڑھنے میں مدد فراہم کی ہے۔

امت کمار کا یہ سفر منشیات پر انحصار کرنے والے افراد کی صحت یابی، بحالی اور سماجی و معاشی شمولیت نو میں منشیات کی مانگ میں کمی کے قومی لائحۂ عمل  (این اے پی ڈی ڈی آر) کے اہم کردار کو اجاگر کرتا ہے۔ 'پُنرجنم آئی آر سی اے'  کے ذریعے فراہم کردہ امداد نے انہیں اپنا خود اعتمادی بحال کرنے، تعمیری کام کاج دوبارہ شروع کرنے اور مالی طور پر خود کفیل ہونے کی سمت میں آگے بڑھنے میں مدد دی۔ ان کا یہ تجربہ ظاہر کرتا ہے کہ کس طرح بروقت علاج، نفسیاتی مدد اور خاندان کی شمولیت افراد کو لت سے چھٹکارا پانے، خاندانی تعلقات کو دوبارہ استوار کرنے اور ایک باوقار زندگی گزارنے کے مواقع فراہم کر سکتی ہے۔

منشیات کی لت اور معاشی غیر یقینی صورتحال سے صحت یابی اور روزگار کے تحفظ تک امیت کمار کی یہ تبدیلی، حوصلے اور ایک نئی امید کی ایک حوصلہ افزا مثال ہے۔ ان کا یہ سفر اس بات پر زور دیتا ہے کہ کس طرح آسان رسائی پر مبنی نشہ مکتی خدمات اور مسلسل بحالی کی امداد، افراد کو اپنی زندگیوں کو دوبارہ سنوارنے، اپنے خاندانوں کو مضبوط بنانے اور ایک صحت مند اور زیادہ محفوظ مستقبل کی طرف بڑھنے میں مدد فراہم کرنے کے لیے اہم ہیں۔

**********

 (ش ح –ا ب ن)

U.No:6032

(ریلیز آئی ڈی: 2323013) وزیٹر کاؤنٹر : 6