وزارتِ توانائی کے سکریٹری جناب پنکج اگروال نے آج نئی دہلی میں یورپی کمیشن کے ڈائریکٹر جنرل برائے ٹیکسیشن اینڈ کسٹمز یونین مسٹر گیراسیموس تھامس کے ساتھ باہمی ملاقات کا اہتمام کیا۔ ملاقات میں ہونے والی گفتگو کا بنیادی محور بھارت کی کاربن مارکیٹ کی ترقی، یورپی یونین کے کاربن بارڈر ایڈجسٹمنٹ میکانزم (سی بی اے ایم) اور باہمی تکنیکی تعاون کو بڑھانے کے مواقع تھے۔

سکریٹری (پاور) نے کاربن کریڈٹ ٹریڈنگ اسکیم (سی سی ٹی ایس) کے تحت بھارت کی پیش رفت کو اجاگر کیا، جس میں 490 صنعتی اکائیوں کے لیے اخراج کی شدت میں کمی کے اہداف کا نوٹیفیکیشن اور ملکی کاربن مارکیٹ کی ترقی شامل ہیں۔ انہوں نے بجلی پیدا کرنے کی صلاحیت میں غیر حجری وسائل کا حصہ بڑھانے میں بھارت کی پیش رفت پر بھی روشنی ڈالی اور بتایا کہ ملک کی مجموعی تنصیب شدہ صلاحیت 558 گیگا واٹ میں سے 308 گیگا واٹ حصہ غیر حجری وسائل کا ہے۔

یورپی یونین کی جانب سے اپنی کاربن مارکیٹ تیار کرنے میں بھارت کی پیش رفت کو سراہا گیا اور کاربن بارڈر ایڈجسٹمنٹ میکانزم کے نفاذ سے متعلق ہونے والی پیش رفت سے آگاہ کیا گیا۔ دونوں فریقوں نے کاربن کی قیمتوں کے تعین کے طریقہ کار کی منظوری، مانیٹرنگ، رپورٹنگ اور ویریفیکیشن (ایم آر وی) کے نظام اور صلاحیت سازی کے شعبوں میں باہمی تکنیکی تعاون کو جاری رکھنے کی خواہش کا اظہار کیا۔

دونوں فریقوں نے کاربن مارکیٹس، سی بی اے ایم سے متعلق طریقہ کار اور باہمی دلچسپی کے دیگر شعبوں پر تعاون کو مضبوط بنانے اور مسلسل بات چیت کو فروغ دینے پر اتفاق کیا۔

**********

 (ش ح –ا ب ن)

U.No:5052

(ریلیز آئی ڈی: 2322539) وزیٹر کاؤنٹر : 7