କେନ୍ଦ୍ର ସଂଚାର ଏବଂ ଉତ୍ତର-ପୂର୍ବାଞ୍ଚଳ କ୍ଷେତ୍ର ଉନ୍ନୟନ ମନ୍ତ୍ରୀ ଶ୍ରୀ ଜ୍ୟୋତିରାଦିତ୍ୟ ଏମ୍. ସିନ୍ଧିଆ ଇଣ୍ଡିଆ ମୋବାଇଲ୍ କଂଗ୍ରେସ-୨୦୨୬ର ୧୦ମ ସଂସ୍କରଣ ସମ୍ପର୍କରେ ଗଣମାଧ୍ୟମ ସହ ଆଲୋଚନା କରିଛନ୍ତି। ଏହି ଆଲୋଚନା ସମୟରେ ସେ ଡିଜିଟାଲ୍ ସଂଯୋଗୀକରଣର ପ୍ରସାରଠାରୁ ଆରମ୍ଭ କରି ସ୍ୱଦେଶୀ ପ୍ରଯୁକ୍ତିବିଦ୍ୟାର ବିକାଶ ଏବଂ ବିଶ୍ୱ ଟେଲିକମ୍ କ୍ଷେତ୍ରରେ ନିଜର ସ୍ଥିତିକୁ ସୁଦୃଢ଼ କରିବା ପର୍ଯ୍ୟନ୍ତ ଭାରତର ରୂପାନ୍ତରଣ ଉପରେ ଆଲୋକପାତ କରିଥିଲେ। ଭାରତର ଟେଲିକମ୍ କ୍ଷେତ୍ରର ପରବର୍ତ୍ତୀ ପର୍ଯ୍ୟାୟରେ ଦେଶ ମଧ୍ୟରେ ପ୍ରଯୁକ୍ତିର ଡିଜାଇନ୍, ବିକାଶ ଓ ଉତ୍ପାଦନ କରି ଘରୋଇ ତଥା ଅନ୍ତର୍ଜାତୀୟ ବଜାରରେ ପହଞ୍ଚାଇବା ଉପରେ ଗୁରୁତ୍ୱ ଦିଆଯିବ ବୋଲି ସେ କହିଛନ୍ତି। ଏଥିପାଇଁ ସରକାର ଓ ଶିଳ୍ପ କ୍ଷେତ୍ର ମଧ୍ୟରେ ଅଧିକ ସମନ୍ୱୟ ଓ ସହଯୋଗ ଉପରେ ମଧ୍ୟ ସେ ଗୁରୁତ୍ୱାରୋପ କରିଛନ୍ତି।

ବିଗତ ଦଶନ୍ଧିର ଯାତ୍ରା ସମ୍ପର୍କରେ ଉଲ୍ଲେଖ କରି କେନ୍ଦ୍ର ମନ୍ତ୍ରୀ କହିଥିଲେ ଯେ ଗତ ଦଶନ୍ଧି ଡିଜିଟାଲ୍ ସଂଯୋଗୀକରଣର ପ୍ରସାର ଦ୍ୱାରା ଚିହ୍ନିତ ହୋଇଥିବା ବେଳେ, ଆଗାମୀ ଦଶନ୍ଧି ସ୍ୱଦେଶୀ ପ୍ରଯୁକ୍ତିବିଦ୍ୟା କ୍ଷମତା ନିର୍ମାଣ, ନବସୃଜନର ପ୍ରୟୋଗକୁ ତ୍ୱରାନ୍ୱିତ କରିବା ଏବଂ ଭାରତୀୟ ଉତ୍ପାଦଗୁଡ଼ିକର ବିଶ୍ୱସ୍ତରୀୟ ପହଞ୍ଚକୁ ବିସ୍ତାର କରିବା ଉପରେ କେନ୍ଦ୍ରୀଭୂତ ହେବା ଆବଶ୍ୟକ।

 

ସଂଚାର ମନ୍ତ୍ରାଳୟର ଟେଲିକମ୍ୟୁନିକେସନ୍ ବିଭାଗ (ଡିଓଟି) ଏବଂ ସେଲୁଲାର୍ ଅପରେଟର୍ସ ଆସୋସିଏସନ୍ ଅଫ୍ ଇଣ୍ଡିଆ (ସିଓଏଆଇ)ର ମିଳିତ ଆନୁକୂଲ୍ୟରେ ଇଣ୍ଡିଆ ମୋବାଇଲ କଂଗ୍ରେସ (ଆଇଏମ୍‍ସି)-୨୦୨୬ ନୂଆଦିଲ୍ଲୀର ୟଶୋଭୂମିଠାରେ ଆୟୋଜନ ହେଉଛି। “ସୀମା ବିହୀନ ସମ୍ପ୍ରସାରଣ” ହେଉଛି ଏହି ସମ୍ମିଳନୀର ବିଷୟବସ୍ତୁ। ଆଇଏମ୍‍ସିର ଯାତ୍ରା ଉପରେ ଆଲୋକପାତ କରି ଶ୍ରୀ ସିନ୍ଧିଆ କହିଥିଲେ, “ଆଇଏମ୍‍ସି ଏହି ସମୟରେ ଏସିଆର ଏକ ନମ୍ବର ଡିଜିଟାଲ୍ ଏବଂ ଟେଲିକମ୍ ସମ୍ମିଳନୀ ପାଲଟିଛି, ଏବଂ ଆମେ ଆଗାମୀ ଦିନରେ ଏହାକୁ ବିଶ୍ୱ ସ୍ତରକୁ ନେବାକୁ ଆଶା ରଖିଛୁ।”

ଆଇଏମସି ୨୦୨୬: ପ୍ରଯୁକ୍ତିବିଦ୍ୟା ଏବଂ ନବସୃଜନ ପାଇଁ ଏକ ବିଶ୍ୱସ୍ତରୀୟ ମଞ୍ଚ

ଦଶମ ସଂସ୍କରଣର କଳେବର ଏହାର ୬୦,୦୦୦ ବର୍ଗ ମିଟର ବିଶିଷ୍ଟ ପ୍ରଦର୍ଶନୀ କ୍ଷେତ୍ର, ୧୦୦ ରୁ ଅଧିକ ଦେଶର ଭାଗିଦାରୀ, ୨,୦୦୦ ରୁ ଅଧିକ ପ୍ରଯୁକ୍ତିବିଦ୍ୟା ବ୍ୟବହାର କ୍ଷେତ୍ର, ୪୦୦ ରୁ ଅଧିକ ଷ୍ଟାର୍ଟଅପ୍ ଏବଂ ୯୦୦ରୁ ଅଧିକ ଚିନ୍ତାନାୟକଙ୍କ ସମେତ ଶିଳ୍ପ ସହଯୋଗୀ, ପ୍ରଦର୍ଶକ, ନିବେଶକ, ଇନ୍‌କ୍ୟୁବେଟର ଏବଂ ଆକ୍ସିଲେରେଟରଙ୍କ ଉପସ୍ଥିତିରୁ ପ୍ରତିଫଳିତ ହୁଏ। ଆଇଏମସିର ମୂଲ୍ୟ ଅଂଶଗ୍ରହଣ ସଂଖ୍ୟାଠାରୁ ଅନେକ ଅଧିକ ବୋଲି ଦର୍ଶାଇଥିଲେ କେନ୍ଦ୍ରମନ୍ତ୍ରୀ । ଚିନ୍ତାଧାରାକୁ ଉତ୍ପାଦରେ, ସହଯୋଗିତାକୁ ନିବେଶରେ ଏବଂ ପ୍ରଯୁକ୍ତିବିଦ୍ୟାର ଅଗ୍ରଗତିକୁ ନାଗରିକଙ୍କ ଜୀବନରେ ସୁଧାର ଆଣୁଥିବା ସମାଧାନରେ ରୂପାନ୍ତରିତ କରିବା ଏହାର ଉଦ୍ଦେଶ୍ୟ ବୋଲି ସେ କହିଥିଲେ।

ଗବେଷଣାଗାର ଏବଂ ପାଇଲଟ୍ ପ୍ରକଳ୍ପରୁ ଆଗକୁ ବଢ଼ି କିପରି ପ୍ରଯୁକ୍ତି ବିଦ୍ୟା ଉଦ୍ୟୋଗ, ଜନସେବା ଏବଂ ଦୈନନ୍ଦିନ ବ୍ୟବହାର କ୍ଷେତ୍ରକୁ ଆସୁଛି ତାହାକୁ ଏହି ପ୍ରଦର୍ଶନୀରେ ଠିକଣା ଭାବେ ଦର୍ଶାଯାଇଛି। ଏହି ମଞ୍ଚ ନବସୃଜନକାରୀ ସମାଧାନର ବିକାଶ, ବ୍ୟବସାୟୀକରଣ ଏବଂ ପ୍ରୟୋଗକୁ ତ୍ୱରାନ୍ୱିତ କରିବା ପାଇଁ ସରକାର, ଶିଳ୍ପ ଜଗତ, ଶିକ୍ଷାନୁଷ୍ଠାନ ଏବଂ ଷ୍ଟାର୍ଟଅପ୍ ପରିବେଶ ମଧ୍ୟରେ ସହଯୋଗ ପାଇଁ ସୁଯୋଗ ମଧ୍ୟ ପ୍ରଦାନ କରେ।

ସଂଯୋଗୀକରଣରୁ ସ୍ୱଦେଶୀ ପ୍ରଯୁକ୍ତିବିଦ୍ୟା କ୍ଷମତା

କେନ୍ଦ୍ରମନ୍ତ୍ରୀ ଶ୍ରୀ ସିନ୍ଧିଆ କହିଛନ୍ତି ଯେ ଭାରତର ଟେଲିକମ୍ ରୂପାନ୍ତରଣ ତିନୋଟି ମୁଖ୍ୟ କ୍ଷେତ୍ରରେ ଅଗ୍ରଗତି କରିଛି: ସଂଯୋଗୀକରଣର ବିସ୍ତାର, ସ୍ୱଦେଶୀ ପ୍ରଯୁକ୍ତିବିଦ୍ୟା କ୍ଷମତାର ବିକାଶ ଏବଂ ଘରୋଇ ଉତ୍ପାଦନ କ୍ଷମତାର ସୁଦୃଢ଼ୀକରଣ। ଦେଶ ବ୍ରଡ୍‌ବ୍ୟାଣ୍ଡ ଭିତ୍ତିଭୂମିର ବିସ୍ତାର କରିଛି, ସାରା ଦେଶରେ ଦ୍ରୁତ ଫାଇବ୍‍-ଜି ସେବାର ଶୁଭାରମ୍ଭ କରିଛି, ଏକ ସ୍ୱଦେଶୀ ଏଣ୍ଡ-ଟୁ-ଏଣ୍ଡ ଫୋର-ଜି ପ୍ରଯୁକ୍ତିବିଦ୍ୟା ଷ୍ଟାକ୍ ବିକଶିତ କରିଛି ଏବଂ ଏହାର ଟେଲିକମ୍ ଓ ଇଲେକ୍ଟ୍ରୋନିକ୍ସ ଉତ୍ପାଦନ ପରିବେଶକୁ ସୁଦୃଢ଼ କରିଛି।

ଭାରତର ବିକାଶଶୀଳ ଆକାଂକ୍ଷାକୁ ଉଲ୍ଲେଖ କରି କେନ୍ଦ୍ରମନ୍ତ୍ରୀ “ମେଡ୍ ଇନ୍ ଇଣ୍ଡିଆ”ରୁ ଆଗକୁ ବଢ଼ି “ଡିଜାଇନ୍, ଡେଭଲପ୍ଡ ଆଣ୍ଡ ମେଡ୍ ଇନ୍ ଇଣ୍ଡିଆ” ଅର୍ଥାତ୍ ଭାରତରେ ଡିଜାଇନ୍, ବିକଶିତ ଓ ଉତ୍ପାଦିତ ପ୍ରଯୁକ୍ତିକୁ ବିଶ୍ୱ ବଜାରରେ ପହଞ୍ଚାଇବା ଉପରେ ଗୁରୁତ୍ୱାରୋପ କରିଛନ୍ତି। ଡିଜିଟାଲ୍ ସଂଯୋଗ ପାଇଁ ଆବଶ୍ୟକ ପ୍ରଯୁକ୍ତିର ଡିଜାଇନ୍, ବିକାଶ, ଉତ୍ପାଦନ ଓ ପ୍ରୟୋଗ କ୍ଷେତ୍ରରେ ଭାରତର ବଢ଼ୁଥିବା କ୍ଷମତା ଏହି ପରିବର୍ତ୍ତନକୁ ପ୍ରତିଫଳିତ କରୁଛି। ଏହାଦ୍ୱାରା ବିଶ୍ୱସ୍ତରରେ ଏକ ପ୍ରଯୁକ୍ତି ସୃଷ୍ଟିକର୍ତ୍ତା ଓ ବିଶ୍ୱସନୀୟ ସହଯୋଗୀ ଭାବେ ଭାରତର ସ୍ଥିତି ଆହୁରି ସୁଦୃଢ଼ ହେବ।

କେନ୍ଦ୍ର ମନ୍ତ୍ରୀ ଶ୍ରୀ ସିନ୍ଧିଆ ଡିଓଟିର ଏକ ବିଶ୍ୱସ୍ତରୀୟ ପୁରସ୍କାରପ୍ରାପ୍ତ ପଦକ୍ଷେପ 'ସମୃଦ୍ଧ ଗ୍ରାମ'ର ସ୍ୱତନ୍ତ୍ରତା ବିଷୟରେ ଉଲ୍ଲେଖ କରିଥିଲେ ଏବଂ ଡିଜିଟାଲ୍ ସଂଯୋଗୀକରଣ ଓ ସ୍ୱଦେଶୀ ନବସୃଜନ କିପରି ସନ୍ତୁଳିତ ବିକାଶକୁ ସମର୍ଥନ କରିପାରିବ ଏବଂ ଜନସେବା ଯୋଗାଣରେ ସୁଧାର ଆଣିପାରିବ ତାହା ପ୍ରଦର୍ଶନ କରିଥିଲେ। ଏହି ପଦକ୍ଷେପ ଅଧୀନରେ ଥିବା ସମୃଦ୍ଧି କେନ୍ଦ୍ରଗୁଡ଼ିକ ସରକାରୀ ସେବା, ସ୍ୱାସ୍ଥ୍ୟସେବା, ଶିକ୍ଷା, କୃଷି ଏବଂ ସ୍ଥାନୀୟ ଉଦ୍ୟୋଗଗୁଡ଼ିକୁ ଯୋଡ଼ି ଗ୍ରାମୀଣ ସମୁଦାୟର ରୂପାନ୍ତରଣ ପାଇଁ ଏକୀକୃତ ଡିଜିଟାଲ୍ ଭିତ୍ତିଭୂମିର ସମ୍ଭାବନାକୁ ପ୍ରଦର୍ଶିତ କରନ୍ତି।

ସଂଚାର କେନ୍ଦ୍ର ମନ୍ତ୍ରୀ ଗବେଷଣା ଏବଂ ବୌଦ୍ଧିକ ସମ୍ପତ୍ତି ବିକାଶରୁ ଉତ୍ପାଦ ନିର୍ମାଣ, ବ୍ୟବସାୟିକ ପ୍ରୟୋଗ ଏବଂ ବିଶ୍ୱ ବଜାରକୁ ପହଞ୍ଚ ପାଇଁ ଏକ ସହଜ ପଥ ସ୍ଥାପନ କରିବାର ଗୁରୁତ୍ୱ ଉପରେ ମଧ୍ୟ ଆଲୋକପାତ କରିଥିଲେ। ଆସ୍ପାୟାର ଏବଂ ସି-ଡଟ ଭଳି ପଦକ୍ଷେପ ଓ ଅନୁଷ୍ଠାନଗୁଡ଼ିକ, ବିଶ୍ୱବିଦ୍ୟାଳୟ, ଷ୍ଟାର୍ଟଅପ୍ ଏବଂ ଶିଳ୍ପ ସହଯୋଗୀମାନଙ୍କ ସହିତ ଏହି ନବସୃଜନ ପରିବେଶକୁ ସୁଦୃଢ଼ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି।

ଇଣ୍ଡିଆ ମୋବାଇଲ୍ କଂଗ୍ରେସର ଦଶମ ସଂସ୍କରଣରେ ଯୋଗଦାନ କରିଥିବାରୁ ଏବଂ ଟେଲିକମ୍ୟୁନିକେସନ୍ ଓ ଡିଜିଟାଲ୍ ପ୍ରଯୁକ୍ତିବିଦ୍ୟା ସହଯୋଗ ପାଇଁ ଏହାକୁ ଏକ ବିଶ୍ୱସ୍ତରୀୟ ମଞ୍ଚ ଭାବରେ ସୁଦୃଢ଼ କରିଥିବାରୁ ଅଂଶଗ୍ରହଣକାରୀ ଦେଶ, ଶିଳ୍ପ ସହଯୋଗୀ, ପ୍ରଦର୍ଶକ, ଷ୍ଟାର୍ଟଅପ୍, ନବସୃଜନକାରୀ, ଗବେଷକ, ନିବେଶକ ଏବଂ ଆୟୋଜକମାନଙ୍କୁ ଧନ୍ୟବାଦ ଦେଇ କେନ୍ଦ୍ର ମନ୍ତ୍ରୀ ଆଲୋଚନା ଶେଷ କରିଥିଲେ।

--

ଅଧିକ ବିବରଣୀ ପାଇଁ ଡିଓଟିର ହ୍ୟାଣ୍ଡଲଗୁଡ଼ିକୁ ଫଲୋ କରନ୍ତୁ -

X - https://x.com/DoT_India

Insta- https://www.instagram.com/department_of_telecom?igsh=MXUxbHFjd3llZTU0YQ==

Fb - https://www.facebook.com/DoTIndia

Youtube: https://youtube.com/@departmentoftelecom?si=DALnhYkt89U5jAaa

 

/HP

(ରିଲିଜ ଆଡି: 2321601) ପରିଦର୍ଶକ କାଉଣ୍ଟର : 3