ભારતીય માનક બ્યુરો (BIS), અમદાવાદ શાખા કચેરી દ્વારા તા. 09 ઑક્ટોબર, 2026ના રોજ મહેસાણા ખાતે વિશ્વ માનક દિવસ–2026ની ઉજવણી કરવામાં આવી હતી. આ વર્ષની થીમ “વધુ સારા વિશ્વ માટે સહિયારી દૃષ્ટિ: SDG 7 – પરવડે તેવી અને સ્વચ્છ ઊર્જા પર વિશેષ ધ્યાન” હતી. આ કાર્યક્રમમાં ડેરી ઉદ્યોગ સહિત વિવિધ ઉદ્યોગોના પ્રતિનિધિઓ, શૈક્ષણિક સંસ્થાઓના પ્રતિનિધિઓ તથા અન્ય હિતધારક સંસ્થાઓના પ્રતિનિધિઓએ ભાગ લીધો હતો. કાર્યક્રમનો મુખ્ય ઉદ્દેશ નવીનીકરણીય ઊર્જા, ઊર્જા કાર્યક્ષમતા અને ટકાઉ વિકાસને પ્રોત્સાહન આપવામાં માનકોની ભૂમિકા પર પ્રકાશ પાડવાનો હતો.

બીઆઈએસ, અમદાવાદના વૈજ્ઞાનિક ‘ડી’ અને સંયુક્ત નિદેશક શ્રી અજય મૌર્યએ ઉપસ્થિત મહાનુભાવો અને સહભાગીઓનું સ્વાગત કર્યું તથા વિશ્વ માનક દિવસના મહત્ત્વ અંગે પ્રકાશ પાડ્યો. બીઆઈએસ, અમદાવાદના વૈજ્ઞાનિક ‘એફ’ અને વરિષ્ઠ નિદેશક તથા પ્રમુખ શ્રી અજય કુમાર લાલે પરવડે તેવા અને સ્વચ્છ ઊર્જા ઉકેલો ઉપલબ્ધ કરાવવામાં ભારતીય માનકોના મહત્ત્વ વિશે વિસ્તૃત માહિતી આપી હતી. ખાસ કરીને સૌર અને પવન ઊર્જાના ક્ષેત્રમાં ગુજરાતની પ્રગતિના સંદર્ભમાં તેમણે માનકોની ભૂમિકા સમજાવી હતી.

કાર્યક્રમમાં અતિથિ વિશેષ તરીકે ઉપસ્થિત દુધસાગર ડેરીના મેનેજિંગ ડિરેક્ટર શ્રી પ્રવિણ ભાંભીએ પોતાના સંબોધનમાં ટકાઉપણું, સંસાધનોનું સંરક્ષણ તથા ડેરી ઉત્પાદનમાં બીઆઈએસના માનકો અપનાવવાના મહત્ત્વ પર ભાર મૂક્યો હતો. તેમણે ઊર્જા વપરાશ અને ઉત્પાદન ખર્ચ ઘટાડવા માટે ઊર્જા-કાર્યક્ષમ ટેક્નોલોજી, છત પર સૌર ઊર્જા પ્રણાલીઓની સ્થાપના, બાયોગેસ, કચરામાંથી ઊર્જા ઉત્પાદન તથા પરિપત્ર અર્થતંત્રની પદ્ધતિઓને મહત્ત્વપૂર્ણ પગલાં ગણાવ્યાં હતાં.

ટેકનિકલ સત્ર દરમિયાન બનાસ ડેરી, પાલનપુરના નાયબ મેનેજર (એન્જિનિયરિંગ) શ્રી એલ. સી. પટેલ અને ગણપત યુનિવર્સિટીના ઇલેક્ટ્રિકલ એન્જિનિયરિંગ વિભાગના પ્રોફેસર અને વડા ડૉ. વિષ્ણુ બી. પટેલ દ્વારા પ્રસ્તુતિઓ રજૂ કરવામાં આવી હતી.

શ્રી એલ. સી. પટેલે બનાસ ડેરી દ્વારા ટકાઉ વિકાસ માટે હાથ ધરવામાં આવેલી પહેલો વિશે માહિતી આપી હતી. તેમાં સ્થાપિત 5.75 મેગાવોટની સૌર ઊર્જા ક્ષમતા, વર્ષ 2021–22થી 2025–26 દરમિયાન નોંધાયેલી ₹21.25 કરોડની બચત તથા કાર્બન ડાયોક્સાઇડ (CO₂) ઉત્સર્જનમાં નોંધાયેલ 87,77,520 કિલોગ્રામનો ઘટાડો સામેલ હતો. તેમણે બાયો-સીએનજી (Bio-CNG), બાયોગેસ, જૈવિક ખાતરનું ઉત્પાદન અને ઊર્જા-કાર્યક્ષમ કામગીરી અંગે પણ ચર્ચા કરી હતી.

ડૉ. વિષ્ણુ બી. પટેલે નવીનીકરણીય ઊર્જાના એકીકરણ, વીજ ગ્રીડની સ્થિરતા, બેટરી ઊર્જા સંગ્રહ પ્રણાલીઓ તથા ઊભરતી ઊર્જા ટેક્નોલોજીઓને સહાયરૂપ થવા માટેના માનકોની આવશ્યકતા અંગે પોતાના વિચારો રજૂ કર્યા હતા. તેમણે ગણપત યુનિવર્સિટી ખાતે કાર્યરત કરવામાં આવેલા બે અલગ-અલગ સૌર ઊર્જા સ્થાપનોની પણ માહિતી આપી હતી, જેની સંયુક્ત ક્ષમતા 795 કિલોવોટ (kW) છે.

કાર્યક્રમ દરમિયાન ઉપસ્થિત મહાનુભાવો અને હિતધારકોનું સન્માન કરવામાં આવ્યું હતું તેમજ સહભાગીઓ માટે પ્રશ્નોત્તરી સત્રનું આયોજન કરવામાં આવ્યું હતું. બીઆઈએસ, અમદાવાદના વૈજ્ઞાનિક ‘બી’ અને સહાયક નિદેશક શ્રી પ્રમોદ કુમારે આભારવિધિ કરી હતી. કાર્યક્રમનું સમાપન સહભાગીઓ વચ્ચે પરસ્પર સંવાદ અને સંપર્કને પ્રોત્સાહન આપતા સહભોજન સાથે થયું હતું.

વિશ્વ માનક દિવસ–2026ની આ ઉજવણીએ SDG 7 – પરવડે તેવી અને સ્વચ્છ ઊર્જાના લક્ષ્યને આગળ વધારવા તથા ટકાઉ ભવિષ્યના નિર્માણ માટે ઉદ્યોગજગત, શૈક્ષણિક સંસ્થાઓ અને ભારતીય માનક બ્યુરો વચ્ચે માનકીકરણ તથા સહકારના મહત્ત્વને પુનઃપ્રસ્થાપિત કર્યું હતું.

(રીલીઝ આઈડી: 2321561) મુલાકાતી સંખ્યા : 27