دیہی ترقی کی وزارت کی جانب سے شیلانگ، میگھالیہ میں دیہی ازخود روزگار تربیتی اداروں (آر ایس ای ٹی آئی) کے متعلقہ فریقوں کا دو روزہ قومی سطح کا جائزہ اجلاس منعقد کیا گیا۔ یہ اجلاس حکومت میگھالیہ اور آر ایس ای ٹی آئی کی قومی اکادمی (این اے آر) کے تعاون منعقد کی جا رہی ہے۔ آر ایس ای ٹی آئی ایک فلیگ شپ پروگرام ہے جسے دیہی ترقی کی وزارت (ایم او آر ڈی)، ریاستی/مرکزی خطوں کی حکومتوں اور اسپانسر کرنے والے بینکوں کے درمیان سہ فریقی شراکت داری کے ذریعے نافذ کیا جا رہا ہے، جس کا مقصد ہر ضلع میں ایک آر ایس ای ٹی آئی قائم کرنا ہے۔

 

اس اجلاس میں وزارت، ریاستی حکومتوں، ریاستی دیہی روزی روٹی مشنوں (ایس آر ایل ایم)، اسپانسر کرنے والے بینکوں، این اے آر اور ملک بھر سے آر ایس ای ٹی آئی کے عہدیداران کو ایک جگہ جمع کیا گیا تاکہ مالیاتی سال کے وسط میں عملی اور مالی پیش رفت کا جائزہ لیا جا سکے اور باقی ماندہ دو سہ ماہیوں کے لیے حکمت عملی وضع کی جا سکے۔

اپنے خطاب میں، سیکریٹری جناب روہت کنسل نے آر ایس ای ٹی آئی کو ایک منفرد ادارہ جاتی ماڈل قرار دیا جو مرکزی حکومت، ریاستی حکومتوں اور بینکنگ سیکٹر کو ایک جگہ جمع کرتا ہے۔ انہوں نے اس بات پر روشنی ڈالی کہ اس ماڈل کے تحت، بینک نہ صرف دیہی نوجوانوں کو تربیت دینے اور انہیں ہنر سے لیس کرنے میں براہ راست شامل ہیں بلکہ انہیں پائیدار روزگار قائم کرنے کے قابل بنانے کے لیے قرض بھی فراہم کر رہے ہیں۔ انہوں نے زور دے کر کہا کہ آر ایس ای ٹی آئی کا یہ طریقہ کار روایتی قرض کے رابطے اور ترجیحی شعبے کے قرضوں سے کہیں آگے جاتا ہے، کیونکہ یہ ایک ایسا مربوط نظام تشکیل دیتا ہے جس میں تربیت، رہنمائی، صنعت کاری اور قرض تک رسائی کو یکجا کر کے پائیدار روزگار کے نتائج کی حمایت کی جاتی ہے۔

جنوری 2009 میں اپنے آغاز کے بعد سے 634 اضلاع کا احاطہ کرنے والے 647 آر ایس ای ٹی آئی کے ملک گیر نیٹ ورک کا ذکر کرتے ہوئے، سیکریٹری نے کہا کہ  اب تک تقریباً 64 لاکھ افراد کو تربیت دی جا چکی ہے، جن میں سے تقریباً 72 فیصد برسرِ روزگار ہو چکے ہیں، لیکن سب سے اطمینان بخش بات یہ ہے کہ کل تربیت یافتہ مستفیدین میں سے 46 لاکھ خواتین ہیں (جو کہ کل تعداد کا تقریباً 72 فیصد ہے)۔ انہوں نے اس بات پر زور دیا کہ تربیت بذاتِ خود مقصد نہیں بلکہ منزل تک پہنچنے کا ایک ذریعہ ہے، اور اصل مقصد اجرت پر مبنی روزگار، صنعت کاری یا خود روزگار کے ذریعے پائیدار معاش فراہم کرنا ہے۔ انہوں نے اسپانسر کرنے والے بینکوں اور ایس آر ایل ایم پر زور دیا کہ وہ باقی رہ جانے والے مستفیدین کے درمیان قرض کی فراہمی کے خلا کا تفصیلی تجزیہ کریں، بشمول یہ کہ آیا یہ خلا مستفیدین کی جانب سے مانگ کی کمی کی وجہ سے ہے یا قرض کی فراہمی کے نظام کی خامیوں کا نتیجہ ہے۔

سکریٹری نے شراکت داروں (سے پانچ اہم ترجیحات پر توجہ مرکوز کرنے کو کہا:

• قرض کے روابط (کریڈٹ لنکیجز) کو بہتر بنانا

• پیش کیے جانے والے کورسز کو جدید اور بہتر بنانا

• تربیت کاروں کے معیار کو بہتر بنانا

• حقیقی معنوں میں جدید اور مثالی آر ایس ای ٹی آئیز تیار کرنا

• مکمل ڈیجیٹل تبدیلی اور آرٹیفیشل انٹیلیجنس کا مؤثر استعمال حاصل کرنا

انہوں نے مشاہدہ کیا کہ تقریباً 65 فیصد تربیت حاصل کرنے والے چند مخصوص کورسز تک ہی محدود ہیں، اور انہوں نے کورسز کے مجموعے (باسکٹ) پر نظرثانی کرنے کا مطالبہ کیا، جس میں  مصنوعی ذہانت، ڈیجیٹل اور موبائل ٹیکنالوجیز، آٹوموبائلز اور سیاحت جیسے ابھرتے ہوئے شعبوں کو شامل کیا جائے۔ انہوں نے بین الاقوامی لیبر مارکیٹ میں موجود مواقع پر بھی روشنی ڈالی، جیسے کہ نرسنگ، نگہداشت، پلمبنگ اور غیر ملکی زبانوں کی مہارتیں، اور گورننگ باڈیز سے کہا کہ وہ ان کورسز کی تجدیدِ نو کریں جنہیں حال ہی میں اپڈیٹ نہیں کیا گیا ہے۔

نوجوانوں کو راغب کرنے کے حوالے سے، انہوں نے اس بات پر زور دیا کہ آر ایس ای ٹی آئی کے کورسز اتنے پرکشش ہونے چاہئیں کہ دیہی نوجوان خود ان کی تلاش میں آئیں۔ انہوں نے ہر ریاست کو ایک مقررہ وقت کے اندر کم از کم ایک 'ماڈل آر ایس ای ٹی آئی ' بنانے کا عزم کرنے کا مشورہ دیا، اور مطالبہ کیا کہ آر ایس ای ٹی آئی کے پورے لائف سائیکل کو—موبلائزیشن اور رجسٹریشن سے لے کر تربیت، جانچ، سرٹیفیکیشن اور نتائج کی نگرانی تک—کوشل رورل پورٹل پر مربوط کیا جائے، جس میں ایک مصنوعی ذہانت کی تہہ بھی شامل ہو تاکہ امیدواروں کے پروفائلز کو بھارت اور بیرون ملک موزوں کورسز اور روزگار کے مواقع کے ساتھ ملایا جا سکے۔ جوابدہی پر زور دیتے ہوئے انہوں نے کہا، "جس چیز کی پیمائش کی جاتی ہے، وہی کام پایۂ تکمیل کو پہنچتا ہے،" اور یہ کہ کارکردگی کا جائزہ خود آر ایس ای ٹی آئی کی جانب سے لیا جائے گا، جبکہ بہتر کارکردگی دکھانے والے اداروں کی حوصلہ افزائی کی جائے گی اور انہیں انعام دیا جائے گا۔ انہوں نے شرکاء پر زور دیا کہ وہ اس پروگرام کو محض ایک ٹاسک کے طور پر نہیں بلکہ 'سیوا' کے طور پر دیکھیں، اور ریاستوں کو یقین دلایا کہ باقاعدہ مشاورت کا سلسلہ جاری رہے گا اور حقیقی چیلنجوں کو اصلاحات اور آسان طریقوں کے ذریعے حل کیا جائے گا۔

جائزہ اجلاس کے دوران دیہی ترقیات کی وزارت کے جوائنٹ سیکریٹری (رورل اسکلز) جناب ایس سسی کمار نے موجودہ اپڈیٹس اور مستقبل کے منصوبوں پر بات کی۔ آر ایس ای ٹی آئی کو ملک کے طویل ترین عرصے سے چلنے والے اور سب سے کامیاب ہنر مندی کے فروغ کے پروگراموں میں سے ایک، اور 100فیصد مرکزی حکومت کے فنڈز سے چلنے والی اسکیم قرار دیتے ہوئے، انہوں نے حکومت کی مختلف اسکیموں کے تحت تربیت کے لیے ایک 'کنورجنس پلیٹ فارم' کے طور پر اس کے بڑھتے ہوئے کردار پر روشنی ڈالی۔ انہوں نے شرکاء کو مطلع کیا کہ وزارت تربیتی شعبوں کو وسعت دینے پر غور کر رہی ہے جس میں مصنوعی ذہانت جیسی ابھرتی ہوئی ٹیکنالوجیز، رورل بزنس انکیوبیشن سینٹرز، انٹرپرائز مینٹرنگ سیلز، مقامی صنعتوں کے ساتھ شراکت داری، نیشنل آر ایس ای ٹی آئی سابقہ طلبہ کا قومی اجلاس، تربیت یافتہ افراد کی مصنوعات کی مشترکہ برانڈنگ، تربیت کے بعد باقاعدہ رہنمائی اور ہر ریاست میں ایک ماڈل آر ایس ای ٹی آئی قائم کرنا شامل ہیں۔ اس موقع پر متعلقہ بینکرز کی جانب سے بینک وار پریزنٹیشنز بھی دی گئیں، جبکہ ریاست وار پریزنٹیشنز مشترکہ طور پر اسٹیٹ ڈائریکٹرز/اسٹیٹ کنٹرولرز آف آر ایس ای ٹی آئیز اور ایس آر ایل ایم کے قومی عہدیداران کی طرف سے پیش کی گئیں۔ مختلف سیشنز میں وزارت کے مشاہدات، بہترین طریقوں پر تبادلہ خیال کے ساتھ ساتھ موجودہ سال کی بقیہ سہ ماہیوں اور آئندہ برس کے اہداف کا بھی احاطہ کیا گیا۔ اجلاس کے دوران، آر ایس ای ٹی آئی کے مستفیدین نے اپنی کامیابی کی کہانیاں اور تجربات بھی شیئر کیے کہ کس طرح اس تربیت نے انہیں خود روزگار حاصل کرنے اور پائیدار معاش قائم کرنے میں مدد فراہم کی۔

 

**********

 

(ش ح –ا ب ن)

U.No:4872

(ریلیز آئی ڈی: 2321063) وزیٹر کاؤنٹر : 3