কেন্দ্ৰীয় বৈদেশিক পৰিক্ৰমা আৰু বস্ত্ৰ ৰাজ্য মন্ত্ৰী পৱিত্ৰ মাৰ্ঘেৰিটাই আজি যোৰহাটৰ ৰৰৈয়াস্থিত কেন্দ্ৰীয় ৰেচম ব’ৰ্ডৰ ৰেচম পলুৰ বীজ উৎপাদন কেন্দ্ৰত নৱনিৰ্মিত বীজ উৎপাদন ভৱন আৰু শীতল সংৰক্ষণাগাৰ উদ্বোধন কৰে।

অনুষ্ঠানত দিয়া ভাষণত  মন্ত্ৰীগৰাকীয়ে কয় যে উন্নত মানৰ ৰেচম পলুৰ বীজ, আধুনিক আন্তঃগাঁথনি, প্ৰযুক্তি আৰু দক্ষতা বিকাশ,এই সকলোৱে উৎপাদনশীল আৰু বহনক্ষম ৰেচম শিল্প গঢ়ি তোলাত গুৰুত্বপূৰ্ণ ভূমিকা পালন কৰে।

অসমৰ সমৃদ্ধ ৰেচম ঐতিহ্য আৰু উত্তৰ-পূৰ্বাঞ্চলৰ বিপুল সম্ভাৱনাৰ কথা উল্লেখ কৰি তেওঁ কয় যে ‘স্নেহজৰি অভিযান’ৰ দৰে পদক্ষেপে মুগা ৰেচমক বিশ্ব বজাৰত মূল্যৱান সামগ্ৰী হিচাপে প্ৰতিষ্ঠা কৰাত সহায় কৰিব পাৰে।

ৰেচম খণ্ডৰ সৈতে জড়িত সকলো পক্ষৰ মাজত উদ্যোগী মনোভাৱ আৰু সহযোগিতা বৃদ্ধিৰ ওপৰতো মন্ত্ৰীগৰাকীয়ে গুৰুত্ব আৰোপ কৰে। কৃষকৰ উৎপাদনশীলতা বৃদ্ধি, বহনক্ষম গ্ৰাম্য জীৱিকাৰ সুযোগ সৃষ্টি আৰু আত্মনিৰ্ভৰ উত্তৰ-পূৰ্বাঞ্চল গঢ়ি তোলাৰ বাবে কেন্দ্ৰীয় ৰেচম ব’ৰ্ড, ৰাজ্য চৰকাৰ, গৱেষণা প্ৰতিষ্ঠান, কৃষক, উদ্যোগী আৰু অন্যান্য অংশীদাৰৰ মাজত অধিক সমন্বয় সাধনৰ বাবে তেওঁ আহ্বান জনায়।

উত্তৰ-পূৰ্বাঞ্চল বস্ত্ৰ প্ৰচাৰ আঁচনিৰ অধীনত স্থাপন কৰা এই অত্যাধুনিক কেন্দ্ৰটোৰ বছৰি ৰেচম পলুৰ ৩০ লাখ ৰোগমুক্ত বীজ উৎপাদনৰ ক্ষমতা আছে। ইয়াত সৰ্বাধিক ১ কোটি ৰোগমুক্ত ৰেচম পলুৰ কণীসহ পাত সংৰক্ষণ কৰিব পৰা যাব।

নতুন আন্তঃগাঁথনিয়ে অসম তথা সমগ্ৰ উত্তৰ-পূৰ্বাঞ্চলত সময়মতে উন্নত মানৰ ৰেচম পলুৰ বীজ যোগান নিশ্চিত কৰাৰ লগতে বীজ উৎপাদন ব্যৱস্থাৰ দক্ষতা বৃদ্ধি কৰিব বুলি আশা কৰা হৈছে।

ইয়াৰ ফলত অঞ্চলটোৰ ৰেচম শিল্পৰ মূল্য শৃংখল অধিক শক্তিশালী হোৱাৰ লগতে নতুন নিয়োগৰ সুযোগ সৃষ্টি আৰু স্থানীয় যোগানকাৰী তথা ব্যৱসায়ীৰ বাবে ব্যৱসায়িক সম্ভাৱনাও বৃদ্ধি পাব। একেদৰে ৰেচম খেতিয়কৰ আৰ্থ-সামাজিক উন্নয়ন আৰু জীৱিকাৰ মানো অধিক উন্নত হোৱাৰ সম্ভাৱনা আছে।

অনুষ্ঠানৰ অংশ হিচাপে ৰেচম শিল্পৰ অংশীদাৰসকলৰ সৈতে মত-বিনিময় অনুষ্ঠানৰো আয়োজন কৰা হয়। এই অনুষ্ঠানত ৰেচম শিল্পৰ উন্নয়নৰ সৈতে জড়িত বিভিন্ন গুৰুত্বপূৰ্ণ বিষয়ত অংশীদাৰসকলৰ সৈতে আলোচনা কৰা হয়।

অনুষ্ঠানত ৰেচম শিল্পলৈ উল্লেখযোগ্য অৱদান আগবঢ়োৱা কেইবাগৰাকীও প্ৰগতিশীল ৰেচম খেতিয়কক সম্বৰ্ধনা জনোৱা হয়। ইয়াৰ উপৰি ৰেচম খেতিয়কসকলৰ মাজত প্ৰথম পৰ্যায়ৰ ৰোগমুক্ত ৰেচম পলুৰ বীজ পোনপটীয়াকৈ বিতৰণ কৰা হয়।

বস্ত্ৰ মন্ত্ৰালয়ৰ ‘সমৰ্থ’ আঁচনিৰ অধীনত দক্ষতা বিকাশ আৰু সামৰ্থ্য গঢ়াৰ প্ৰশিক্ষণ সফলতাৰে সম্পূৰ্ণ কৰা প্ৰশিক্ষাৰ্থীসকলকো অনুষ্ঠানত প্ৰমাণপত্ৰ প্ৰদান কৰা হয়।

অনুষ্ঠানত কাজিৰঙাৰ সাংসদ কামাখ্যা প্ৰসাদ তাছা, যোৰহাটৰ বিধায়ক হিতেন্দ্ৰ নাথ গোস্বামী, কেন্দ্ৰীয় ৰেচম ব’ৰ্ডৰ সদস্য সচিব তথা ভাৰতীয় বন সেৱাৰ বিষয়া পি. শিৱকুমাৰকে ধৰি কেইবাগৰাকীও বিশিষ্ট ব্যক্তি উপস্থিত থাকে।

***

PG/SS/PB

(ৰিলিজ আই ডি : 2320987) অতিথি কক্ষ : 15