وزیر اعظم جناب نریندر مودی کے ’ہر گھر سودیشی، گھر گھر سودیشی‘ اور ’ووکل فار لوکل‘ کے نعرے کو نئی توانائی فراہم کرتے ہوئے،بہت چھوٹے ،چھوٹے اور درمیانہ درجے کے کاروباری ادارے کی وزارت کے تحت کھادی اور دیہی صنعتوں کے کمیشن (کے وی آئی سی) کے چیئرمین جناب منوج گوئل نے گرام اُدیوگ بھون، گرام شلپ ایمپوریم میں کھادی کی مصنوعات کی خریداری کی اور ملک گیر خصوصی رعایتی فروخت کا آغاز کیا۔ اس موقع پر انہوں نے کھادی اور دیہی صنعتوں کی مصنوعات خریدیں اور یو پی آئی کے ذریعے ڈیجیٹل ادائیگی کی۔ گاندھی جینتی کے موقع پر متعدد معزز شخصیات نے کناٹ پلیس میں واقع شوروم سے خریداری کی۔ اس موقع پر میڈیا سے خطاب کرتے ہوئے کے وی آئی سی کے چیئرمین جناب منوج گوئل نے کہا کہ کے وی آئی سی وزیر اعظم جناب نریندر مودی کے ’ہر گھر سودیشی، گھر گھر سودیشی‘ کے نعرے کو عوام اور جن زی (جین-زی) تک پہنچانے کے لیے مسلسل کوششیں کر رہا ہے۔

کے وی آئی سی کے چیئرمین نے بتایا کہ گاندھی جینتی کے موقع پر نئی دہلی کے کناٹ پلیس میں واقع کھادی بھون سمیت ملک بھر میں خصوصی رعایتی مہم شروع کی گئی ہے۔ یہ رعایت 2 اکتوبر سے 16 نومبر 2026 تک دستیاب ہوگی۔ اس دوران کھادی کی مصنوعات پر 20 فیصد تک اور دیہی صنعتوں کی مصنوعات پر 10 فیصد رعایت دی جائے گی۔

انہوں نے مزید کہا کہ وزیر اعظم جناب نریندر مودی کی قیادت میں کھادی کو ایک نئی سمت ملی ہے۔ آج کھادی آتم نربھر بھارت، ووکل فار لوکل، لوکل ٹو گلوبل اور وکست بھارت-2047 کے عزم کو عملی جامہ پہنانے کا ایک مؤثر ذریعہ بن رہی ہے۔ انہوں نے کہا کہ کھادی محض لباس نہیں، بلکہ کروڑوں کاریگروں اور بُنکروں کے روزگار کا ذریعہ، بھارت کا ثقافتی ورثہ اور پائیدار ترقی کی علامت ہے۔

جناب گوئل نے اس موقع پر کہا کہ وزیر اعظم جناب نریندر مودی کی دوراندیش سوچ اور پالیسیوں کے نتیجے میں کھادی اور دیہی صنعتوں کے شعبے نے بھی بے مثال ترقی کی ہے۔ مالی سال 26-2025 میں کھادی اور دیہی صنعتوں کے شعبے کا کاروبار 1.87 لاکھ کروڑ روپے سے تجاوز کر گیا،جبکہ اس شعبے کے ذریعے 2.04 کروڑ سے زائد افراد کو روزگار مل رہا ہے۔ انہوں نے اعتماد ظاہر کیا کہ آنے والے وقت میں یہ شعبہ 2.51 لاکھ کروڑ روپے کے کاروباری ہدف کو بھی حاصل کر لے گا۔

*******

) ش ح – م م ع-ش ا )

U-NO-4746

(ریلیز آئی ڈی: 2320021) وزیٹر کاؤنٹر : 5