ملک کے دارالحکومت میں آن لائن اور بالمشافہ منعقدہ قومی سطح کے 'صفائی متر سرکشا ایوم سمان شِوِر' میں ملک بھر سے 3,800 سے زائد شہری مقامی اداروں، دیہی مقامی اداروں (آر ایل بی) اور متعلقہ محکموں نے شرکت کی۔

یہ پروگرام شریک مقامات پر بالمشافہ بھی منعقد کیا گیا، جس کے ذریعے صحت، حفاظت، بہبود اور سماجی تحفظ کی مختلف خدمات براہِ راست صفائی متروں اور صفائی کے ملازمین تک پہنچائی گئیں۔

سماجی انصاف اور تفویضِ اختیارات کی وزارت کے ایک اعلیٰ اہلکار نے بتایا کہ میگھالیہ، مہاراشٹر، اتر پردیش، تلنگانہ، کیرالہ اور بہار سمیت دیگر ریاستوں کی جانب سے بھرپور جوش و خروش دیکھنے میں آیا، جنہوں نے اس شِوِرکے ایک حصے کے طور پر اپنی بڑی میونسپل کارپوریشنز میں ہیلتھ کیمپوں کا انعقاد کیا۔

انہوں نے کہا کہ ریاستوں کی اس فعال شمولیت سے صحت کے معائنے اور متعلقہ خدمات براہِ راست ان کے متعلقہ شہروں کے صفائی متروں اور صفائی کے ملازمین تک پہنچانے میں مدد ملی، جو اپنے کام کے دوران باقاعدگی سے پیشہ ورانہ صحت کے خطرات کا سامنا کرتے ہیں۔

اہلکار نے کہا کہ 'صفائی متر سرکشا ایوم سمان شِوِر' صفائی متروں کے اہم تعاون کو تسلیم کرنے اور بہبود، سماجی سیکیورٹی اور صحت کے تحفظ کے اقدامات تک ان کی رسائی کو مضبوط بنانے کے ساتھ ساتھ، صفائی ستھرائی کے ایک محفوظ، صحت مند اور زیادہ باوقار نظام کی تعمیر کے لیے حکومت کے عزم پر زور دیتا ہے۔

اہلکار نے مزید کہا کہ اس شِوِر میں ملک بھر سے بڑے پیمانے پر شرکت دیکھی گئی، جس میں 3,69,469 مستفیدین نے پروگرام میں حصہ لیا۔ انہوں نے مزید بتایا کہ اس اقدام کے ایک حصے کے طور پر، 3,02,958 ہیلتھ چیک اپ فراہم کیے گئے، جس سے صفائی کے ملازمین کو صحت کی بنیادی خدمات تک رسائی حاصل ہوئی۔

وزارتی اہلکار نے مزید بتایا کہ مستفیدین کی جانب سے مجموعی طور پر 2,24,521 'نمستے کارڈز' ڈاؤن لوڈ کیے گئے، جبکہ حفظانِ صحت اور سماجی تحفظ کے فوائد تک رسائی کو آسان بنانے کے لیے 57,967 'آیوشمان کارڈز' تقسیم کیے گئے۔

اہلکار نے بتایا کہ اس شِوِر نے مختلف سرکاری اسکیموں کے تحت 1,53,253 اندراج کی سہولت بھی فراہم کی، جس سے مستفیدین کو بہبود اور سماجی سیکیورٹی کے اقدامات سے جڑنے کا موقع ملا۔

انہوں نے کہا کہ پیشہ ورانہ حفاظت کو مضبوط بنانے کی سمت میں ایک اہم قدم اٹھاتے ہوئے، شریک مقامات پر صفائی متروں کے درمیان 1,28,928 پرسنل پروٹیکٹو ایکوپمنٹ (پی پی ای) کٹس تقسیم کی گئیں۔

اس شِوِر کا انعقاد صفائی متروں اور صفائی کے ملازمین کے تعاون کو تسلیم کرنے اور انہیں عزت دینے کے ساتھ ساتھ صحت، حفاظت، بہبود اور سماجی تحفظ کے اقدامات تک ان کی رسائی کو آسان بنانے کے لیے کیا گیا تھا۔

اس پہل قدمی نے مقامی سطح پر متعدد خدمات کو ایک جگہ یکجا کر دیا، جس سے صفائی کے ملازمین کے لیے ایک مشترکہ پلیٹ فارم کے ذریعے صحت کی دیکھ بھال، حفاظتی سامان، سرکاری اسکیموں اور سماجی تحفظ کے فوائد تک رسائی ممکن ہو سکی۔

اس شِوِر میں بڑے پیمانے پر شرکت اور اس کی کامیابیاں صفائی کے ملازمین تک حفظانِ صحت ، حفاظت، بہبود اور سماجی تحفظ کے اقدامات کی آخری میل تک خدمات بہم رسانی کو یقینی بنانے میں مرکزی حکومت، ریاستی حکومتوں، شہری اور دیہی مقامی اداروں اور متعلقہ محکموں کی مربوط کوششوں کی اہمیت کی توثیق کرتی ہیں۔

**********

 (ش ح –ا ب ن)

U.No:4488

(ریلیز آئی ڈی: 2318003) وزیٹر کاؤنٹر : 9