नवी दिल्‍ली, 1 ऑक्‍टोबर 2026

 

केंद्र सरकारच्या कामगार आणि रोजगार मंत्रालयाने 30 सप्टेंबर 2026 रोजी पाच औद्योगिक क्षेत्रांमध्ये श्रम संवाद या उपक्रमांतर्गत जिल्हास्तरीय क्षमता बांधणी आणि जागरूकता कार्यक्रम आयोजित केला होता. राजस्थानमधील भिवडी आणि भिलवाडा, पूर्व दिल्ली, उत्तराखंडमधील डेहराडून आणि महाराष्ट्रातील छत्रपती संभाजीनगर येथे चार कामगार कायदे, मालकांसाठीच्या नियमांचे पालन आणि सरकारच्या प्रमुख रोजगार व सामाजिक सुरक्षा योजना यांची उत्तम माहिती यावेळी दिली. यासाठी या कार्यक्रमात वरिष्ठ शासकीय अधिकारी, राज्य कामगार विभाग, औद्योगिक संघटना, मालक, मनुष्यबळ विकास आणि कायदेतज्ज्ञ तसेच इतर संबंधित घटक एकत्र आले होते.

देशभरात 28 सप्टेंबर 2026 रोजी सुरू झालेली 'श्रम संवाद' ही मोहीम 90 दिवसांचा एक व्यापक जनसंपर्क उपक्रम आहे. या अंतर्गत प्रामुख्याने देशातील सर्व 36 राज्ये आणि केंद्रशासित प्रदेशांमधील 316 जिल्ह्यांमध्ये औद्योगिक क्षेत्रांवर लक्ष केंद्रित करून जिल्हास्तरीय कार्यक्रमांचे आयोजन मंत्रालय करत आहे. नवीन कामगार कायद्यांमधील तरतुदी, त्यांची अंमलबजावणी आणि नियमांचे पालन याविषयी मालक आणि इतर घटकांमध्ये अधिक स्पष्टता आणून, कायद्याची माहिती प्रत्येकापर्यंत पोहोचवणे हा या मोहिमेचा मुख्य उद्देश आहे.

महाराष्ट्रातील छत्रपती संभाजीनगर येथे हा कार्यक्रम महाराष्ट्र सरकारच्या कामगार विभागाच्या सहकार्याने आयोजित केला. या कार्यक्रमात सीआयआय अर्थात भारतीय उद्योग महासंघाच्या प्रतिनिधींसह सुमारे 200 संबंधित घटक सहभागी झाले. कामगार आणि रोजगार मंत्रालयाचे संचालक चमन लाल गुलेरिया यांनी बीजभाषण केले आणि या कार्यक्रमाची सविस्तर रूपरेषा मांडली. यामधील तांत्रिक सत्रांमध्ये कामगार कायदे आणि मालकांसाठी आवश्यक असणाऱ्या कायदेशीर बाबींची माहिती देण्यात आली, तसेच 'प्रधानमंत्री वय वंदना योजना' (पीएमव्हीबीआरवाय) आणि 'प्रधानमंत्री श्रम योगी मान-धन' (पीएम-एसवायएम) योजनांवर आधारित विशेष सत्रेही झाली.

या सर्व पाचही ठिकाणच्या कार्यक्रमांमध्ये कर्मचारी भविष्य निर्वाह निधी संघटना (ईपीएफओ), कर्मचारी राज्य विमा महामंडळ (ईएसआयसी) आणि केंद्रीय कामगार आयुक्त कार्यालयाचे वरिष्ठ अधिकारी आणि प्रतिनिधी सहभागी झाले होते.

  

  

 

* * *

सुषमा काणे/प्रज्ञा जांभेकर/दर्शना राणे

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 2317796) अभ्यागत कक्ष : 9