INS ત્રિશૂલે ભારત-ફ્રાન્સ દ્વિપક્ષીય દરિયાઈ કવાયત વરુણની 24મી આવૃત્તિમાં ભાગ લીધો

ભારતીય નૌકાદળ અને ફ્રેન્ચ નૌકાદળ વચ્ચેની વાર્ષિક દ્વિપક્ષીય દરિયાઈ કવાયત 'વરુણ'ની 24મી આવૃત્તિમાં ભાગ લેવા માટે ભારતીય નૌકાદળનું જહાજ ત્રિશૂલ (INS Trishul) 22 સપ્ટેમ્બર 2026ના રોજ ફ્રાન્સના તુલોન પહોંચ્યું હતું.

જહાજનું ફ્રેન્ચ નૌકાદળ દ્વારા ઔપચારિક વોટર કેનન સલામી સાથે ઉષ્માભર્યું સ્વાગત કરવામાં આવ્યું હતું. હાર્બર ફેઝમાં બંને નૌકાદળો વચ્ચે દરિયાઈ સંબંધો અને વ્યાવસાયિક બંધનોને મજબૂત કરવાના ઉદ્દેશ્યથી વ્યાવસાયિક, રમતગમત અને સાંસ્કૃતિક જોડાણોનો સમાવેશ થાય છે. INS ત્રિશૂલના કમાન્ડિંગ ઓફિસરે ઓપરેશન્સના ડેપ્યુટી કમાન્ડર-ઇન-ચીફ (CECMED) રિયર એડમિરલ મેકારા ઓક સાથે મુલાકાત કરી હતી અને ફ્રેન્ચ નૌકાદળના વરિષ્ઠ નેતૃત્વ સાથે વાતચીત કરી હતી.

વિશ્વયુદ્ધો દરમિયાન સર્વોચ્ચ બલિદાન આપનારા 205 ભારતીય સૈનિકોની યાદમાં કમાન્ડિંગ ઓફિસર, અધિકારીઓ અને ક્રૂએ માર્સેલીના મઝાર્ગ્યુસ વોર મેમોરિયલ ખાતે પુષ્પાંજલિ અર્પણ કરી હતી. વ્યાવસાયિક જોડાણોમાં ક્રોસ-ડેક મુલાકાતો અને ઓપરેશનલ અનુભવોની આપ-લેનો સમાવેશ થાય છે, જેણે બંને નૌકાદળો વચ્ચે સુધારેલી આંતર-કાર્યક્ષમતામાં યોગદાન આપ્યું હતું.

INS ત્રિશૂલે જહાજ પર સાંસ્કૃતિક સંવાદનું પણ આયોજન કર્યું હતું, જેમાં તુલોનના ડેપ્યુટી મેયર વાઇસ એડમિરલ (નિવૃત્ત) લોરેન્ટ ઇસ્નાર્ડ, ફ્રેન્ચ નૌકાદળના અધિકારીઓ અને નાગરિક મહાનુભાવોએ હાજરી આપી હતી. એક મૈત્રીપૂર્ણ વોલીબોલ મેચે બંને નૌકાદળના કર્મચારીઓ વચ્ચે સૌહાર્દને વધુ ગાઢ બનાવ્યું હતું. જહાજના ક્રૂએ ફ્રેન્ચ નૌકાદળના જહાજો ચાર્લ્સ ડી ગોલ, ફોરબિન અને લા ફાએતેની પણ મુલાકાત લીધી હતી, અને જહાજ પર ચાલતી કામગીરી, ઉડ્ડયન સુવિધાઓ અને જહાજ પર અનુસરવામાં આવતી પદ્ધતિઓ વિશે જાણકારી મેળવી હતી.

દરિયાઈ તબક્કા દરમિયાન, INS ત્રિશૂલે FDA ફોરબિન, FLF લા ફાએતે અને SNA સુફ્રેન તેમજ NH90 હેલિકોપ્ટર અને એટલાન્ટિક 2 મેરીટાઇમ પેટ્રોલ એરક્રાફ્ટ સહિત ફ્રેન્ચ નૌકાદળના એકમો સાથે કવાયત કરી હતી. એન્ટી-સબમરીન, એન્ટી-સરફેસ અને લાઇવ-ફાયરિંગ કવાયતો, સાથે ક્રોસ-ડેક હેલિકોપ્ટર લેન્ડિંગ શ્રેણીઓએ બંને નૌકાદળો વચ્ચે ઓપરેશનલ સમન્વય, આંતર-કાર્યક્ષમતા અને સહયોગમાં વધારો કર્યો.

INS ત્રિશૂલની તુલોનની મુલાકાત ભારત અને ફ્રાન્સ વચ્ચેના મજબૂત અને કાયમી દરિયાઈ ભાગીદારી તથા દરિયાઈ જોડાણ, આંતર-કાર્યક્ષમતા અને વ્યાવસાયિક આદાનપ્રદાનને મજબૂત કરવા માટે બંને નૌકાદળોની પ્રતિબદ્ધતાને પુનઃપુષ્ટ કરે છે.

SM/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com