آرمڈ فورسز میڈیکل سروسز(اے ایف ایم ایس) کے سرجنوں نے 24 اور 25 ستمبر 2026 کو جموں و کشمیر میں لائن آف کنٹرول (ایل او سی) کے ساتھ گولہ باری کے خطرے والے علاقے کپواڑہ کے تنگدھر میں زیر زمین آپریشن تھیٹر میں آپریشن درشٹی کے تحت منعقدہ اپنی نوعیت کے پہلے میگا آئی سرجیکل کیمپ کے 10ویں ایڈیشن کے دوران بینائی بحال کرنے والی 220 سرجریاں کیں۔ ان میں زیادہ تر موتیا کی سرجریاں تھیں، جبکہ منتخب ریٹینا کے طریقہ علاج اور کم سے کم مداخلت والی گلوکوما سرجری بھی کی گئی۔

 

ان دو دنوں  کے دوران آرمی چیف جنرل دھیرج سیٹھ نے کیمپ کا دورہ کیا، مریضوں سے ملاقات کی اور انہیں ادویات اور تحائف تقسیم کیے۔ ڈی جی اے ایف ایم ایس ایئر مارشل سندیپ تھریجا نے بھی کیمپ کا دورہ کیا اور سرجنوں اور مقامی ٹیم کی غیر معمولی مہارت اور کوششوں کو سراہا۔

کیمپ کی قیادت دہلی کینٹ میں واقع آرمی ہسپتال (ریسرچ اینڈ ریفرل) کے شعبہ امراض چشم کے سربراہ بریگیڈیئر سنجے کمار مشرا نے کی۔ ان کی ٹیم نے پہاڑی علاقوں سے جدید فیکوامولسیفیکیشن، وٹریوریٹینل اور گلوکوما کے آلات منتقل کیے۔ خواڑپورہ، تنگدھر، تڈ، بگ بیلا، یانگدر اور آس پاس کی بستیوں سے مریض اسکریننگ اور ریڈیو روحِ کرناہ پر نشر ہونے والی اطلاع کے بعد کیمپ پہنچے، جہاں ہندوستانی فوج نے ہر مریض کی آمد سے لے کر صحت یابی تک رہنمائی کی۔

 

دفاعی وزیر جناب راج ناتھ سنگھ کے اندازے کے مطابق اے ایف ایم ایس کی جانب سے منعقد کیے جانے والے میگا آئی سرجیکل کیمپوں کی اس سیریز کے تحت اب تک 1.50 لاکھ سے زائد مریضوں کی اسکریننگ کی جا چکی ہے۔ 10 شہروں میں 3,500 سے زائد سرجریاں کی گئی ہیں۔ اس سیریز کا 11واں کیمپ 27 سے 29 ستمبر 2026 تک سری نگر میں منعقد کیا جائے گا۔ اس کیمپ کی باضابطہ اختتامی تقریب 30 ستمبر 2026 کو جموں و کشمیر کے لیفٹیننٹ گورنر جناب منوج سنہا کی موجودگی میں منعقد ہوگی۔

*****

ش ح ۔م ع۔ خ م

U. No.4107

(ریلیز آئی ڈی: 2315032) وزیٹر کاؤنٹر : 12