पणजी,  23 सप्टेंबर 2026

भारत सरकारच्या पर्यटन मंत्रालयाअंतर्गत कार्यरत असलेल्या 'नॅशनल इन्स्टिट्यूट ऑफ वॉटरस्पोर्ट्स–इंडियन इन्स्टिट्यूट ऑफ टुरिझम अँड ट्रॅव्हल मॅनेजमेंट' (NIWS–IITTM), गोवा आणि 'इंडिया टुरिझम ऑफिस', गोवा यांच्या संयुक्त विद्यमाने 11  व्या 'आयुर्वेद दिना'चे औचित्य साधून विशेष प्रबोधन व ज्ञान-संवाद कार्यक्रमाचे आयोजन करण्यात आले.

निरोगी भविष्यासाठी आयुर्वेद या संकल्पनेवर आधारित असलेल्या या कार्यक्रमात, रोजच्या आयुष्यातील आयुर्वेदाचे महत्त्व, आजारपणाला दूर ठेवणारी प्रतिबंधात्मक आरोग्य व्यवस्था आणि वेगाने वाढणारे 'वेलनेस व मेडिकल टुरिझम' या विषयांवर प्रामुख्याने भर देण्यात आला.

कार्यक्रमात मार्गदर्शन करताना पुण्याच्या 'नानाळ आयुषकेअर'च्या संचालिका आणि ज्येष्ठ आयुर्वेद तज्ज्ञ वैद्य आयेशा नानाळ म्हणाल्या, आजच्या धावपळीच्या युगात आयुर्वेदाची मूलभूत तत्त्वे अत्यंत प्रभावी ठरतात. शारीरिक आणि मानसिक स्वास्थ्यासाठी दैनंदिन जीवनशैलीत सकारात्मक बदल घडवून आणणे गरजेचे असून, आयुर्वेद संपूर्ण आरोग्याकडे बघण्याचा एक सर्वसमावेशक दृष्टिकोन देतो.

गोवा येथील 'फ्रीडम हॉलिडेज'चे अध्यक्ष व व्यवस्थापकीय संचालक श्री. मार्टिन जोसेफ यांनी पर्यटनाच्या दृष्टीने या क्षेत्रातील संधींवर प्रकाश टाकला. ते म्हणाले, "सध्या देशांतर्गत आणि आंतरराष्ट्रीय पर्यटकांमध्ये अस्सल भारतीय वेलनेस अनुभवांची मागणी वेगाने वाढत आहे. पर्यटन क्षेत्रातील भावी व्यावसायिकांनी आणि विद्यार्थ्यांनी भारताच्या या पारंपरिक आरोग्य पद्धतींना पर्यटन क्षेत्रातील एक मुख्य वैशिष्ट्य म्हणून जागतिक स्तरावर प्रोत्साहन दिले पाहिजे."

या संवादसत्रात पर्यटन क्षेत्रातील अभ्यासक, प्राध्यापक आणि विद्यार्थ्यांनी पारंपरिक भारतीय आरोग्यसेवा  आणि पर्यटन उद्योग यांच्यातील परस्परसंबंध जवळून समजून घेतले. भारताला जागतिक स्तरावर 'वेलनेस टुरिझम'चे केंद्र म्हणून उभारी देण्यात आयुर्वेदाची भूमिका किती मोलाची ठरू शकते, यावरही चर्चा झाली.

कार्यक्रमाची सांगता एनआयडब्ल्यूएस–आयआयटीएम, गोवाच्या वरिष्ठ प्राध्यापिका डॉ. चारू शीला यादव यांनी मांडलेल्या आभार प्रदर्शनाने झाली. या प्रसंगी संस्थेचे प्राध्यापक, कर्मचारी आणि विद्यार्थी मोठ्या संख्येने उपस्थित होते.

स्रोत: एनआयडब्ल्यूएस–आयआयटीएम, गोवा / पीआयबी पणजी | अंबादास यादव / प्रिती मालंडकर

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

 

 

(Release ID: 2313995) अभ्यागत कक्ष : 27