سیمی کان انڈیا 2026، ہندوستان کی اہم ترین سیمی کنڈکٹر  کانفرنس کے پانچویں ایڈیشن کا آج نئی دہلی کے یشوبھومی میں کامیابی کے ساتھ اختتام ہوا۔ یہ ہندوستان کے سیمی کنڈکٹر  ماحولیاتی نظام کی ترقی کی سمت میں ایک اور اہم قدم ہے۔ 17 سے 19 ستمبر 2026 تک “سلیکان سے سسٹمز تک: ماحولیاتی نظام کی تعمیر” کے موضوع کے تحت منعقد ہونے والے اس پروگرام میں تقریباً 300 بین الاقوامی شرکاء سمیت 600 سے زائد نمائش کنندگان، 52 ممالک کے نمائندوں اور 150 سے زائد مقررین نے شرکت کی۔ جاپان، جنوبی کوریا، ملائیشیا، نیدرلینڈز، سنگاپور اور سویڈن کی نمائندگی کرنے والے 6 ملکی پویلینز کے ساتھ 12 ریاستی پویلینز، ایک اسٹارٹ اَپ پویلین، افرادی قوت کی ترقی کا زون، اختراعی نمائش اور طلبہ ہیکاتھون نے سیمی کنڈکٹر  کی قدر زنجیر کے مختلف پہلوؤں کو اجاگر کیا۔ پروگرام میں مجموعی طور پر 51,656 رجسٹریشن اور تقریباً 40,000 افراد کی مجموعی آمد ریکارڈ کی گئی۔

معزز وزیر اعظم جناب نریندر مودی نے سیمی کان انڈیا 2026 کا افتتاح کیا اور ہندوستان کے پالیسی مباحث اور منصوبوں کی تیاری سے تجارتی سیمی کنڈکٹر  پیداوار کی جانب پیش رفت کو اجاگر کیا۔ انہوں نے نوجوان چِپ ڈیزائنروں اور طلبہ سے بات چیت کی اور سی ڈی آئی ایل سیمی کنڈکٹر ، موہالی اور سوچی سیمی کان، سورت میں تجارتی پیداوار کی لائنوں کا ورچوئل افتتاح کیا۔ اس کے ساتھ سیمی کان 1.0 کے تحت منظور شدہ 12 منصوبوں میں فعال تجارتی سیمی کنڈکٹر  یونٹوں کی تعداد بڑھ کر 5 ہوگئی۔ وزیر اعظم نے سیمی کان 2.0 کی جانب منتقلی کا خاکہ بھی پیش کیا، جس کا مقصد سیمی کنڈکٹر  کی پوری قدر زنجیر میں صلاحیتیں پیدا کرنا ہے۔ سیمی کان 2.0 کے لیے 1,27,500 کروڑ روپے کی رقم مختص کی گئی ہے اور اسے 6 ستونوں کے گرد ترتیب دیا گیا ہے: ڈیزائن، مشینیں اور خام مال، نئی فیبس، جدید پیکیجنگ، تحقیق اور ہنرمند افرادی قوت کی ترقی۔

تین روز کے دوران سیمی کنڈکٹر  ڈیزائن، فیبریکیشن، جدید پیکیجنگ، آلات اور خام مال، پاور الیکٹرانکس، مصنوعی ذہانت (اے آئی)، اعلیٰ کارکردگی کی کمپیوٹنگ (ایچ پی سی)، تحقیق و ترقی (آر اینڈ ڈی)، رسد، ٹیکنالوجی کی تجارتی کاری، ہنرمندی اور افرادی قوت کی ترقی سمیت مختلف شعبوں میں 56 مفاہمت ناموں، اعلانات اور حکمتِ عملی پر مبنی اقدامات کا اعلان کیا گیا۔ پروگرام کے دوران کیے گئے اہم اعلانات میں سیمی کنڈکٹر  تیار کرنے والی کمپنیوں، آلات اور خام مال تیار کرنے والی کمپنیوں، ڈیزائن اداروں، تعلیمی اداروں اور ہنرمندی کی تربیت فراہم کرنے والی تنظیموں کے درمیان تعاون اور سرمایہ کاری کے منصوبے شامل تھے۔

دوسرے دن سیمی کنڈکٹر  مشن کو وسیع تر ماحولیاتی نظام کی ترقی میں تبدیل کرنے پر توجہ مرکوز کی گئی۔ مرکزی وزیر برائے برقیات و اطلاعاتی ٹیکنالوجی، ریلوے اور اطلاعات و نشریات جناب اشونی ویشنو نے سیمی کان 2.0 کے نفاذ کے طریقۂ کار کی وضاحت کی، جس میں ڈیزائن، مشینوں اور خام مال، فیبس، جدید پیکیجنگ، عملی تحقیق و ترقی اور ہنرمند افرادی قوت پر زور دیا گیا۔ اس دن ہونے والی بات چیت میں مضبوط اور لچک دار سپلائی چین، مصنوعی ذہانت سے معاون چِپ ڈیزائن اور مینوفیکچرنگ، جدید پیکیجنگ، مقامی تحقیق و ترقی، پاور الیکٹرانکس، ڈسپلے ٹیکنالوجیز، افرادی قوت کی ترقی اور سیمی کنڈکٹر  مینوفیکچرنگ میں خواتین کی شمولیت جیسے موضوعات شامل رہے۔ ان مباحث سے یہ ضرورت اجاگر ہوئی کہ صرف فیبریکیشن کی صلاحیت ہی نہیں بلکہ آلات، خام مال، گیسوں، کیمیکلز، دقیق مینوفیکچرنگ، دانشورانہ ملکیت اور ہنرمند افرادی قوت پر مشتمل اس وسیع تر ماحولیاتی نظام کو بھی تیار کیا جائے جو عالمی سطح پر مربوط سیمی کنڈکٹر  صنعت کے لیے ضروری ہے۔

اختتامی دن توجہ تکنیکی صلاحیت، صنعتی تعاون، کاروبار کرنے میں آسانی، پائیداری، ڈسپلے، افرادی قوت کی ترقی اور گہری ٹیکنالوجی سے وابستہ نئے کاروباری اداروں پر مرکوز رہی۔ مباحث میں اس ضرورت کو اجاگر کیا گیا کہ جسمانی صلاحیت کے ساتھ ساتھ سائنسی علم، خام مال، مینوفیکچرنگ کی عملی مہارت، تحقیق اور ہنرمند افرادی قوت کو بھی مضبوط بنایا جائے۔ قیادتی فورم کی نظامت جناب امیتیش کمار سنہا، چیف ایگزیکٹو آفیسر، انڈیا سیمی کنڈکٹر  مشن اور ایڈیشنل سیکریٹری، می ٹی وائی نے کی۔ فورم میں سیمی کنڈکٹر  ڈیزائن اور مینوفیکچرنگ کو خام مال، آلات، پیکیجنگ اور الیکٹرانکس نظام کے ساتھ مربوط کرتے ہوئے “سلیکان سے سسٹمز تک” کے مربوط طریقۂ کار پر زور دیا گیا۔ جناب سشیل پال، جوائنٹ سیکریٹری، می ٹی وائی نے سرمایہ کاری میں سہولت اور کاروبار کرنے میں آسانی سے متعلق مباحث کی نظامت کی، جبکہ دیگر اجلاسوں میں پائیدار مینوفیکچرنگ، جدید ڈسپلے، مقامی سطح پر زیادہ سے زیادہ تیاری اور سیمی کنڈکٹر  کی پوری قدر زنجیر میں صنعت کی ضروریات کے مطابق ہنرمندی جیسے موضوعات پر غور کیا گیا۔

اختتامی دن مقامی اختراع اور گہری ٹیکنالوجی پر مبنی کاروباری سرگرمیوں پر بھی خصوصی توجہ مرکوز کی گئی۔ مباحث میں اس بات کا جائزہ لیا گیا کہ سیمی کنڈکٹر  تحقیق اور دانشورانہ ملکیت کو سرکاری و صنعتی خریداری، طویل مدتی سرمایہ، مینوفیکچرنگ اور بازاروں کے ساتھ کس طرح مربوط کیا جا سکتا ہے۔ چِپس ٹو اسٹارٹ اَپ پروگرام کے تحت ڈیجیٹل انڈیا آر آئی ایس سی۔وی گرینڈ چیلنج میں 1,236 ٹیموں نے شرکت کی، جن میں 5,045 شرکاء شامل تھے۔ مقامی طور پر تیار کردہ ویگا اور شکتی پروسیسر پر مبنی سسٹم آن چِپس کے ذریعے تیار کیے گئے حل پیش کرنے والی بہترین کارکردگی کا مظاہرہ کرنے والی ٹیموں کو اعزازات سے نوازا گیا۔ اختتامی پروگرام میں اسٹارٹ اَپ پچ اور ہیکاتھون کے فاتحین کو بھی اعزاز دیا گیا، جس سے ٹیکنالوجی کی تجارتی کاری اور اختراع کو فروغ دینے کے لیے اسٹارٹ اَپس، طلبہ، سرمایہ کاروں اور صنعت کے درمیان تعاون کو مزید تقویت ملی۔ کے ایل اے، سائن آپسس اور لیم ریسرچ کی جانب سے سینس۔آئی آئی ایس سی کے اشتراک سے منعقد کیے گئے 3 ہیکاتھونز میں 900 سے زائد کالجوں کی 3,800 سے زیادہ ٹیموں نے رجسٹریشن کرائی۔ ان ہیکاتھونز نے طلبہ کو صنعت سے متعلق سیمی کنڈکٹر  کے حقیقی چیلنجز کا حل تلاش کرنے کے مواقع فراہم کیے۔ فاتحین کو نقد انعامات، انٹرن شپ، سافٹ ویئر ٹولز اور کمپیوٹنگ کریڈٹس کے ذریعے اعزاز سے نوازا گیا۔

تینوں دنوں کے دوران 6 ملکی گول میز اجلاسوں کے ذریعے بین الاقوامی تعاون سیمی کان انڈیا 2026 کی ایک اہم خصوصیت بنا رہا۔ پہلے دن ہندوستان۔امریکہ گول میز اجلاس میں 180 شرکاء نے شرکت کی، جبکہ ہندوستان۔جاپان گول میز اجلاس میں 200 شرکاء شریک ہوئے۔ ان اجلاسوں میں تجارتی شراکت داری، ٹیکنالوجی میں تعاون، آلات اور خام مال، مضبوط اور لچک دار سپلائی چین اور تحقیق و ترقی پر توجہ مرکوز کرتے ہوئے تبادلۂ خیال کیا گیا۔ دوسرے دن ہندوستان۔سنگاپور گول میز اجلاس میں 142 شرکاء، ہندوستان۔یورپ گول میز اجلاس میں 139 شرکاء اور ہندوستان۔جنوبی کوریا گول میز اجلاس میں 115 شرکاء نے شرکت کی۔ ان اجلاسوں میں مینوفیکچرنگ، جدید پیکیجنگ، آلات اور خام مال، سرمایہ کاری، تحقیق و ترقی اور ہنرمند افرادی قوت کے شعبوں میں تعاون کو آگے بڑھانے پر تبادلۂ خیال کیا گیا۔ تیسرے دن ہندوستان۔ملائیشیا گول میز اجلاس میں تقریباً 150 شرکاء شریک ہوئے۔ اجلاس میں ملائیشیا کی سیمی کنڈکٹر  صنعت میں پہلے سے قائم بیک اینڈ صلاحیتوں اور ہندوستان کی ڈیزائن، انجینئرنگ اور مینوفیکچرنگ کے شعبوں میں صلاحیتوں سے فائدہ اٹھاتے ہوئے او ایس اے ٹی، جدید پیکیجنگ، خام مال، آلات، سپلائی چین اور ہنرمند افرادی قوت کے شعبوں میں شراکت داری کو مزید گہرا کرنے پر توجہ مرکوز کی گئی۔

اپنے 3 روزہ انعقاد کے دوران سیمی کان انڈیا 2026 نے “سلیکان سے سسٹمز تک” کے مکمل سفر کو ایک ہی پلیٹ فارم پر پیش کیا، جس میں ڈیزائن اور دانشورانہ ملکیت، خام مال اور آلات، فیبریکیشن، جدید پیکیجنگ، الیکٹرانکس مینوفیکچرنگ، تحقیق و ترقی، اسٹارٹ اَپس، پائیداری اور ہنرمند افرادی قوت شامل ہیں۔ 2026 کے ایڈیشن کا حجم سیمی کان انڈیا 2025 کے مقابلے میں نمایاں طور پر وسیع رہا۔ 600 سے زائد نمائش کنندگان، تقریباً 300 بین الاقوامی کمپنیوں، 52 ممالک کی شرکت اور 56 مفاہمت ناموں، اعلانات اور حکمتِ عملی پر مبنی اقدامات کے ساتھ سیمی کان انڈیا 2026 نے سیمی کنڈکٹر  کی پوری قدر زنجیر میں سرمایہ کاری، ٹیکنالوجی شراکت داری، تحقیق کی تجارتی کاری، صنعت و تعلیمی اداروں کے باہمی تعاون، اسٹارٹ اَپ کی ترقی، ہنرمندی کی تربیت اور بین الاقوامی تعاون کے لیے ایک اہم پلیٹ فارم فراہم کیا۔

******

ش ح۔ ش ا ر۔ ول

Uno-3807

(ریلیز آئی ڈی: 2312659) وزیٹر کاؤنٹر : 7