مرکزی بالواسطہ محصولات و کسٹمز بورڈ (سی بی آئی سی) اپنے تمام زونز، ڈائریکٹوریٹس اور فیلڈ دفاتر کے ساتھ 2 اکتوبر سے 31 اکتوبر 2026 تک جاری رہنے والی خصوصی مہم 6 میں سرگرمی سے حصہ لے رہا ہے۔ اس مہم کا مقصد سرکاری دفاتر میں صفائی ستھرائی کو مستقل طور پر ادارہ جاتی شکل دینا اور زیرِ التوا معاملات میں کمی لانا ہے۔ تمام دفاتر اور ادارہ جاتی اکائیوں کو مہم میں فعال طور پر حصہ لینے اور اسے مرکوز و بامقصد انداز میں انجام دینے کے لیے آگاہ اور تیار کیا گیا ہے۔

خصوصی مہم 6، سی بی آئی سی کی جانب سے خصوصی مہم 5.0 کے دوران کی جانے والی کامیاب کوششوں کو آگے بڑھاتی ہے۔ گزشتہ مہم کے دوران سی بی آئی سی نے نشان زدہ صفائی کے مقامات، ارکانِ پارلیمنٹ کی جانب سے موصول ہونے والے حوالوں، عوامی شکایات اور عوامی شکایات سے متعلق اپیلوں کے حوالے سے اپنے 100 فیصد اہداف حاصل کیے۔ اس مہم کے دوران کاغذی فائلوں کے جائزے اور غیر ضروری فائلوں کو تلف کرنے، دفتری جگہ خالی کرنے اور ناکارہ اشیا کو ٹھکانے لگانے کے لیے بھی وسیع پیمانے پر کارروائی کی گئی۔

خصوصی مہم 5.0 کے دوران 41,055 کاغذی فائلوں کا جائزہ لیا گیا اور 23,743 فائلوں کو غیر ضروری قرار دے کر تلف کیا گیا۔ اس مہم کے نتیجے میں 43,009 مربع فٹ دفتری جگہ خالی کرائی گئی اور 22,728 کلوگرام ناکارہ اشیا کو ٹھکانے لگایا گیا، جن میں 8,801 کلوگرام ای-کچرا بھی شامل تھا، جسے ای-کچرا (انتظام) ضوابط، 2022 کے مطابق ٹھکانے لگایا گیا۔ سی بی آئی سی کے دفاتر نے تقریباً 250 کلوگرام منشیاتی ادویات اور نفسیاتی اثر رکھنے والے مادّوں کے علاوہ تقریباً 26 لاکھ غیر ملکی ساختہ سگریٹ، ای-سگریٹ اور متعلقہ اشیا کو بھی محفوظ طریقے سے تلف کیا۔

خصوصی مہم 5.0 سے حاصل ہونے والی رفتار کو آگے بڑھاتے ہوئے سی بی آئی سی اور اس کے تمام زونز، ڈائریکٹوریٹس اور فیلڈ دفاتر پورے جوش و خروش کے ساتھ خصوصی مہم 6 میں حصہ لے رہے ہیں۔ گزشتہ سال ای-کچرے کے سائنسی انتظام پر دی گئی توجہ کو مزید آگے بڑھاتے ہوئے، اس سال کی مہم میں صفائی ستھرائی، ریکارڈ کے انتظام، دفتری جگہ کے انتظام اور زیرِ التوا معاملات کو تیزی سے نمٹانے کے علاوہ خاص طور پر ’’ای-کچرے کو مؤثر طریقے سے جمع کرنے، الگ کرنے اور ٹھکانے لگانے‘‘ پر زور دیا جائے گا۔

سی بی آئی سی خصوصی مہم کے ذریعے پیدا ہونے والی رفتار کو برقرار رکھنے اور صفائی ستھرائی، مؤثر ریکارڈ انتظام اور ماحول دوست طریقے سے ناکارہ اشیا کو ٹھکانے لگانے کے عمل کو اپنے انتظامی امور کا مستقل حصہ بنانے کے لیے پُرعزم ہے۔

***

ش ح۔ ش ا ر۔ ول

Uno-3772

(ریلیز آئی ڈی: 2312330) وزیٹر کاؤنٹر : 12