ಸರ್ವವ್ಯಾಪಿ, ಸುಲಭ ಪ್ರವೇಶಸಾಧ್ಯ ಮತ್ತು ಸಬಲ ಭಾರತವನ್ನು ನಿರ್ಮಿಸುವ ನಿಟ್ಟಿನಲ್ಲಿ ಕೈಗೊಂಡ ಪ್ರಮುಖ ರಾಷ್ಟ್ರೀಯ ಉಪಕ್ರಮದ ಭಾಗವಾಗಿ, ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯದ ಅಡಿಯಲ್ಲಿ ಬರುವ 'ದಿವ್ಯಾಂಗರ ಸಬಲೀಕರಣ ಇಲಾಖೆ'ಯು (DEPwD), 'ಆರ್ಟಿಫಿಷಿಯಲ್ ಲಿಂಬ್ಸ್ ಮ್ಯಾನುಫ್ಯಾಕ್ಚರಿಂಗ್ ಕಾರ್ಪೊರೇಷನ್ ಆಫ್ ಇಂಡಿಯಾ' (ALIMCO) ಸಹಯೋಗದೊಂದಿಗೆ 2026ರ ಸೆಪ್ಟೆಂಬರ್ 17 ರಂದು 21 ರಾಜ್ಯಗಳ 76 ಸ್ಥಳಗಳಲ್ಲಿ ಏಕಕಾಲದಲ್ಲಿ 'ಸಾಮಾಜಿಕ ಅಧಿಕಾರಿತಾ ಶಿಬಿರ'ಗಳನ್ನು (ಸಾಮಾಜಿಕ ಸಬಲೀಕರಣ ಶಿಬಿರಗಳು) ಆಯೋಜಿಸಿತು.

ಈ ಶಿಬಿರಗಳ ಮೂಲಕ, 58,000ಕ್ಕೂ ಹೆಚ್ಚು ದಿವ್ಯಾಂಗರು ಮತ್ತು ಹಿರಿಯ ನಾಗರಿಕರಿಗೆ ಅವರ ವೈಯಕ್ತಿಕ ಅಗತ್ಯಗಳಿಗೆ ಅನುಗುಣವಾಗಿ ಸುಮಾರು ₹68 ಕೋಟಿ ಮೌಲ್ಯದ ಸಹಾಯಕ ಸಾಧನಗಳನ್ನು ಉಚಿತವಾಗಿ ವಿತರಿಸಲಾಯಿತು. ಫಲಾನುಭವಿಗಳ ಚಲನಶೀಲತೆ, ಸ್ವಾತಂತ್ರ್ಯ, ಘನತೆ ಮತ್ತು ಸ್ವಾವಲಂಬನೆಯನ್ನು ಹೆಚ್ಚಿಸುವುದು ಹಾಗೂ ಅವರ ಕುಟುಂಬಗಳು, ಸಮುದಾಯಗಳು ಮತ್ತು ರಾಷ್ಟ್ರದ ಅಭಿವೃದ್ಧಿ ಪಯಣದಲ್ಲಿ ಅವರು ಹೆಚ್ಚು ಸಕ್ರಿಯವಾಗಿ ಪಾಲ್ಗೊಳ್ಳುವಂತೆ ಮಾಡುವುದು ಈ ಉಪಕ್ರಮದ ಉದ್ದೇಶವಾಗಿದೆ.

ಈ ಕಾರ್ಯಕ್ರಮವನ್ನು ನವದೆಹಲಿಯ ಕೆಂಪು ಕೋಟೆಯ ಬಳಿಯಿರುವ 'ಲವ್-ಕುಶ್ ರಾಮ್‌ಲೀಲಾ ಮೈದಾನ'ದಲ್ಲಿ ಆಯೋಜಿಸಲಾಗಿತ್ತು ಮತ್ತು ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯದ ಕೇಂದ್ರ ಸಚಿವರಾದ ಡಾ. ವೀರೇಂದ್ರ ಕುಮಾರ್ ಅವರು ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು.

ಈ ಸಂದರ್ಭದಲ್ಲಿ ಚಾಂದನಿ ಚೌಕ್‌ನ ಸಂಸದರಾದ ಶ್ರೀ ಪ್ರವೀಣ್ ಖಂಡೇಲ್‌ವಾಲ್; ಪರಿಶಿಷ್ಟ ಜಾತಿಗಳ ರಾಷ್ಟ್ರೀಯ ಆಯೋಗದ ಅಧ್ಯಕ್ಷ ಶ್ರೀ ಕಿಶೋರ್ ಮಕ್ವಾನಾ; ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ ಶ್ರೀಮತಿ ಮನ್ಮೀತ್ ನಂದಾ; ಮತ್ತು ALIMCOದ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕರಾದ ಶ್ರೀ ಪ್ರವೀಣ್ ಕುಮಾರ್ ಸೇರಿದಂತೆ ಇತರ ಹಿರಿಯ ಅಧಿಕಾರಿಗಳು ಮತ್ತು ಗಣ್ಯರು ಉಪಸ್ಥಿತರಿದ್ದರು.

ನವದೆಹಲಿಯ ಕಾರ್ಯಕ್ರಮವನ್ನು ದೇಶಾದ್ಯಂತದ ಶಿಬಿರದ ಸ್ಥಳಗಳೊಂದಿಗೆ ವರ್ಚುವಲ್ (ಆನ್‌ಲೈನ್) ಮೂಲಕ ವೀಕ್ಷಿಸಲಾಯಿತು. ಇದರಿಂದಾಗಿ ವಿವಿಧ ರಾಜ್ಯಗಳ ಫಲಾನುಭವಿಗಳು, ಜನಪ್ರತಿನಿಧಿಗಳು, ಜಿಲ್ಲಾಡಳಿತದ ಅಧಿಕಾರಿಗಳು ಮತ್ತು ALIMCO ಅಧಿಕಾರಿಗಳು ಒಂದೇ ರಾಷ್ಟ್ರೀಯ ವೇದಿಕೆಯಲ್ಲಿ ಒಗ್ಗೂಡಲು ಸಾಧ್ಯವಾಯಿತು.

ಸಭೆಯನ್ನುದ್ದೇಶಿಸಿ ಮಾತನಾಡಿದ ಡಾ. ವೀರೇಂದ್ರ ಕುಮಾರ್, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ "ಸಬ್‌ಕಾ ಸಾಥ್, ಸಬ್‌ಕಾ ವಿಕಾಸ್, ಸಬ್‌ಕಾ ವಿಶ್ವಾಸ್ ಮತ್ತು ಸಬ್‌ಕಾ ಪ್ರಯಾಸ್" (ಎಲ್ಲರೊಂದಿಗೆ, ಎಲ್ಲರ ಅಭಿವೃದ್ಧಿ, ಎಲ್ಲರ ವಿಶ್ವಾಸ ಮತ್ತು ಎಲ್ಲರ ಪ್ರಯತ್ನ) ಎಂಬ ದೃಷ್ಟಿಕೋನವನ್ನು ಪುನರುಚ್ಚರಿಸಿದರು. ಭಾರತದ ಅಭಿವೃದ್ಧಿ ಪಯಣದಲ್ಲಿ ದಿವ್ಯಾಂಗರು ಮತ್ತು ಹಿರಿಯ ನಾಗರಿಕರು ಸಕ್ರಿಯ ಪಾಲುದಾರರಾಗಿ ಮುಂದುವರಿಯಬೇಕು ಎಂದು ಅವರು ಒತ್ತಿ ಹೇಳಿದರು. "ಸಹಾಯಕ ಸಾಧನಗಳು ಘನತೆ, ಆತ್ಮವಿಶ್ವಾಸ ಮತ್ತು ಸ್ವತಂತ್ರ ಜೀವನಕ್ಕೆ ದಾರಿಯೊದಗಿಸಲು ಪ್ರಮುಖವಾಗಿವೆ " ಎಂದು ಹೇಳಿದರು.

ಸಹಾಯಕ ಸಾಧನಗಳು ಕೇವಲ ಬೆಂಬಲ ನೀಡುವ ಉಪಕರಣಗಳಲ್ಲ, ಬದಲಾಗಿ ಚಲನಶೀಲತೆ, ಆತ್ಮವಿಶ್ವಾಸ, ಸ್ವಾಭಿಮಾನ ಮತ್ತು ಸ್ವತಂತ್ರ ಜೀವನವನ್ನು ಸಾಧ್ಯವಾಗಿಸುವ ಪ್ರಬಲ ಅಂಶಗಳಾಗಿವೆ ಎಂದು ಕೇಂದ್ರ ಸಚಿವರು ಪ್ರತಿಪಾದಿಸಿದರು. ಕಲ್ಯಾಣ ಯೋಜನೆಗಳು ಮತ್ತು ಸಹಾಯಕ ತಂತ್ರಜ್ಞಾನಗಳು ಅರ್ಹ ಫಲಾನುಭವಿಗಳಿಗೆ ತಲುಪುವುದನ್ನು ಖಚಿತಪಡಿಸಿಕೊಳ್ಳಲು ಸರ್ಕಾರವು ಬದ್ಧವಾಗಿದೆ ಎಂದು ಅವರು ಹೇಳಿದರು.

ಸಬಲೀಕರಣದ ವಿಶಾಲ ವ್ಯವಸ್ಥೆಯನ್ನು ಉಲ್ಲೇಖಿಸುತ್ತಾ, ಡಾ. ವೀರೇಂದ್ರ ಕುಮಾರ್ ಅವರು 'ಪ್ರಧಾನ ಮಂತ್ರಿ ದಿವ್ಯಾಂಗ-ವಯೋಶ್ರೀ ಕೇಂದ್ರಗಳ' (PMD-VKs) ವಿಸ್ತರಣೆಯ ಬಗ್ಗೆ ಪ್ರಸ್ತಾಪಿಸಿದರು. ದೇಶಾದ್ಯಂತ 109 ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿದ್ದು, ಇವು ADIP ಯೋಜನೆ ಮತ್ತು ರಾಷ್ಟ್ರೀಯ ವಯೋಶ್ರೀ ಯೋಜನೆಯ (RVY) ಸೇವೆಗಳನ್ನು ಫಲಾನುಭವಿಗಳಿಗೆ ಇನ್ನಷ್ಟು ಹತ್ತಿರವಾಗಿಸುತ್ತಿವೆ.

ಅಲ್ಲದೆ, 28 'ಏಕ-ಗವಾಕ್ಷಿ ಬಹು-ವಿಕಲಾಂಗತೆ ಆರಂಭಿಕ ಹಸ್ತಕ್ಷೇಪ ಕೇಂದ್ರಗಳ' (CDEICs) ಸ್ಥಾಪನೆ, ರಾಷ್ಟ್ರೀಯ ಸಂಸ್ಥೆಗಳು ಮತ್ತು CRCಗಳ ಮೂಲಕ ಪುನರ್ವಸತಿ ಸೇವೆಗಳು ಹಾಗೂ ಗ್ವಾಲಿಯರ್‌ನಲ್ಲಿರುವ ದಿವ್ಯಾಂಗ ಕ್ರೀಡಾ ಕೇಂದ್ರ ಸೇರಿದಂತೆ ದಿವ್ಯಾಂಗ ಕ್ರೀಡಾಪಟುಗಳನ್ನು ಪ್ರೋತ್ಸಾಹಿಸುವ ಉಪಕ್ರಮಗಳ ಬಗ್ಗೆಯೂ ಅವರು ಬೆಳಕು ಚೆಲ್ಲಿದರು.

ಸಬಲೀಕರಣವು ಹಂಚಿಕೆಯ ಸಾಮಾಜಿಕ ಜವಾಬ್ದಾರಿಯಾಗಿದೆ ಎಂದು ಒತ್ತಿಹೇಳಿದ ಸಚಿವರು, ರಾಜ್ಯ ಸರ್ಕಾರಗಳು, ಜಿಲ್ಲಾಡಳಿತಗಳು, ನಾಗರಿಕ ಸಮಾಜದ ಸಂಘಟನೆಗಳು, ಸ್ವಯಂಸೇವಾ ಸಂಸ್ಥೆಗಳು (NGOs), ಸಾಮಾಜಿಕ ಹಾಗೂ ಧಾರ್ಮಿಕ ಸಂಸ್ಥೆಗಳು ಮತ್ತು ಕಾರ್ಪೊರೇಟ್ ವಲಯದ ಹೆಚ್ಚಿನ ಭಾಗವಹಿಸುವಿಕೆಗೆ ಕರೆ ನೀಡಿದರು. ಈ ನಿಟ್ಟಿನಲ್ಲಿ 'ತಾರಾ ಸಂಸ್ಥಾನ', 'ನಾರಾಯಣ ಸೇವಾ ಸಂಸ್ಥಾನ' ಮತ್ತು 'ಲವ್-ಕುಶ್ ರಾಮ್‌ಲೀಲಾ ಸಮಿತಿ'ಯಂತಹ ಸಂಸ್ಥೆಗಳ ಕೊಡುಗೆಯನ್ನು ಅವರು ಶ್ಲಾಘಿಸಿದರು.

ದಿವ್ಯಾಂಗರು ತಮ್ಮ ಕಲಾತ್ಮಕ ಮತ್ತು ಸೃಜನಶೀಲ ಸಾಮರ್ಥ್ಯಗಳನ್ನು ಪ್ರದರ್ಶಿಸಲು ಹೆಚ್ಚಿನ ವೇದಿಕೆಗಳನ್ನು ಒದಗಿಸುವಂತೆ ಸಾಂಸ್ಕೃತಿಕ ಮತ್ತು ಸಾಮಾಜಿಕ ಸಂಘಟನೆಗಳಿಗೆ ಸಚಿವರು ಕರೆ ನೀಡಿದರು. 'ದಿವ್ಯ ಕಲಾ ಮೇಳ'ಗಳ ಬಗ್ಗೆ ಪ್ರಸ್ತಾಪಿಸುತ್ತಾ, ದಿವ್ಯಾಂಗ ಕುಶಲಕರ್ಮಿಗಳು ಮತ್ತು ಉದ್ಯಮಿಗಳಲ್ಲಿ ಉದ್ಯಮಶೀಲತೆ, ಜೀವನೋಪಾಯ ಮತ್ತು ಆರ್ಥಿಕ ಸ್ವಾತಂತ್ರ್ಯವನ್ನು ಉತ್ತೇಜಿಸುವಲ್ಲಿ ಅವು ವಹಿಸುತ್ತಿರುವ ಪಾತ್ರವನ್ನು ಅವರು ಉಲ್ಲೇಖಿಸಿದರು.

ಅಲ್ಲದೇ, ಪ್ರವೇಶಾವಕಾಶ ಅಥವಾ ಸುಲಭ ಸಂಚಾರ ಸೌಲಭ್ಯವನ್ನು (accessibility) ಹಂಚಿಕೆಯ ಜವಾಬ್ದಾರಿ ಎಂದು ಬಣ್ಣಿಸಿದ ಅವರು, ಅಡೆತಡೆ-ಮುಕ್ತ ಸರ್ಕಾರಿ ಕಚೇರಿಗಳು, ಆಸ್ಪತ್ರೆಗಳು, ಶಿಕ್ಷಣ ಸಂಸ್ಥೆಗಳು, ಸಾರ್ವಜನಿಕ ಸ್ಥಳಗಳು ಮತ್ತು ಸಾರಿಗೆ ವ್ಯವಸ್ಥೆಗಳನ್ನು ನಿರ್ಮಿಸಲು ನಿರಂತರ ಪ್ರಯತ್ನಗಳ ಅಗತ್ಯವಿದೆ ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ALIMCOದ ಅಧ್ಯಕ್ಷರಾದ ಮತ್ತು ವ್ಯವಸ್ಥಾಪಕ ನಿರ್ದೇಶಕರಾದ ಶ್ರೀ ಪ್ರವೀಣ್ ಕುಮಾರ್, ಸಹಾಯಕ ಸಾಧನಗಳ ಗುಣಮಟ್ಟ, ಉಪಯುಕ್ತತೆ ಮತ್ತು ವಿನ್ಯಾಸದ ಮೇಲೆ ನಿಗಮವು ನಿರಂತರ ಗಮನಹರಿಸುತ್ತಿದೆ ಎಂದು ತಿಳಿಸಿದರು. ಆ ಮೂಲಕ ಫಲಾನುಭವಿಗಳಿಗೆ ಅವರ ವೈಯಕ್ತಿಕ ಅಗತ್ಯಗಳಿಗೆ ಸೂಕ್ತವಾದ ಪರಿಹಾರಗಳು ದೊರೆಯುವಂತೆ ನೋಡಿಕೊಳ್ಳಲಾಗುತ್ತಿದೆ ಎಂದು ಅವರು ಹೇಳಿದರು. ಸೇವಾ ವಿತರಣೆಯನ್ನು ಸರಳ, ಹೆಚ್ಚು ಪರಿಣಾಮಕಾರಿ, ಪಾರದರ್ಶಕ ಮತ್ತು ಫಲಾನುಭವಿ-ಕೇಂದ್ರಿತವಾಗಿಸಲು ALIMCO ಡಿಜಿಟಲ್ ತಂತ್ರಜ್ಞಾನವನ್ನು ಹೆಚ್ಚಾಗಿ ಅಳವಡಿಸಿಕೊಳ್ಳುತ್ತಿರುವುದರ ಬಗ್ಗೆ ಅವರು ವಿವರಿಸಿದರು. "ದಿವ್ಯಾಂಗರು ಮತ್ತು ಹಿರಿಯ ನಾಗರಿಕರ ಸಬಲೀಕರಣ ಹಾಗೂ ಕಲ್ಯಾಣಕ್ಕಾಗಿ ALIMCO ಬದ್ಧವಾಗಿದೆ. ಗುಣಮಟ್ಟದ ಸಹಾಯಕ ಸಾಧನಗಳು ಫಲಾನುಭವಿಗಳಿಗೆ ಸಕಾಲದಲ್ಲಿ ತಲುಪುವುದನ್ನು ಖಚಿತಪಡಿಸುವುದು ಮತ್ತು ಅವರ ಜೀವನದಲ್ಲಿ ಸ್ವಾತಂತ್ರ್ಯ, ಸ್ವಾವಲಂಬನೆ ಹಾಗೂ ಘನತೆಯನ್ನು ಬಲಪಡಿಸುವ ನಿಟ್ಟಿನಲ್ಲಿ ಅರ್ಥಪೂರ್ಣ ಕೊಡುಗೆ ನೀಡುವುದು ನಮ್ಮ ಪ್ರಯತ್ನವಾಗಿದೆ" ಎಂದು ಅವರು ಹೇಳಿದರು.

ಸಭೆಯನ್ನುದ್ದೇಶಿಸಿ ಮಾತನಾಡಿದ ಚಾಂದನಿ ಚೌಕ್‌ನ ಸಂಸದರಾದ ಶ್ರೀ ಪ್ರವೀಣ್ ಖಂಡೇಲ್‌ವಾಲ್ ಅವರು, ದಿವ್ಯಾಂಗರು ಮತ್ತು ಹಿರಿಯ ನಾಗರಿಕರ ಸಬಲೀಕರಣಕ್ಕಾಗಿ ಸರ್ಕಾರ ಕೈಗೊಂಡಿರುವ ಪ್ರಯತ್ನಗಳನ್ನು ಶ್ಲಾಘಿಸಿದರು. ಅಲ್ಲದೇ, ಕಲ್ಯಾಣ ಯೋಜನೆಗಳನ್ನು ಫಲಾನುಭವಿಗಳಿಗೆ ನೈಜ ಬೆಂಬಲವಾಗಿ ಪರಿವರ್ತಿಸುವಲ್ಲಿ ಗುಣಮಟ್ಟದ ಸಹಾಯಕ ಸಾಧನಗಳ ಪಾತ್ರದ ಬಗ್ಗೆ ಅವರು ವಿವರಿಸಿದರು.

ನವದೆಹಲಿಯಲ್ಲಿ ನಡೆದ ಶಿಬಿರದಲ್ಲಿ, 463 ಫಲಾನುಭವಿಗಳಿಗೆ (446 ಹಿರಿಯ ನಾಗರಿಕರು ಮತ್ತು 17 ದಿವ್ಯಾಂಗರು) ಒಟ್ಟು ₹34.96 ಲಕ್ಷ ಮೌಲ್ಯದ 2,450 ಸಹಾಯಕ ಸಾಧನಗಳನ್ನು ವಿತರಿಸಲಾಯಿತು. ಪೂರ್ವ ಮೌಲ್ಯಮಾಪನದ ಆಧಾರದ ಮೇಲೆ ವಿತರಿಸಲಾದ ಈ ಸಾಧನಗಳಲ್ಲಿ ಮೋಟಾರೀಕೃತ ತ್ರಿಚಕ್ರ ವಾಹನಗಳು, ಸಾಮಾನ್ಯ ತ್ರಿಚಕ್ರ ವಾಹನಗಳು, ವ್ಹೀಲ್‌ಚೇರ್‌ಗಳು, ಆಸರೆ ಕೋಲುಗಳು (crutches), ವಾಕಿಂಗ್ ಸ್ಟಿಕ್‌ಗಳು, ರೋಲೇಟರ್‌ಗಳು, ಶ್ರವಣ ಸಾಧನಗಳು, ಮಡಚಬಹುದಾದ ವಾಕರ್‌ಗಳು, ಟ್ರೈಪಾಡ್‌ಗಳು, ಕಮೋಡ್ ವ್ಹೀಲ್‌ಚೇರ್‌ಗಳು ಮತ್ತು ಕುರ್ಚಿಗಳು, ಮೊಣಕಾಲು ಬ್ರೇಸ್‌ಗಳು, ಎಲ್‌ಎಸ್ (LS) ಬೆಲ್ಟ್‌ಗಳು ಹಾಗೂ ಇತರ ಸಹಾಯಕ ಪರಿಕರಗಳು ಸೇರಿವೆ.

ದೇಶಾದ್ಯಂತ ಆಯೋಜಿಸಲಾದ ಈ ಶಿಬಿರಗಳನ್ನು 'ಅಲಿಮ್ಕೊ' (ALIMCO) ಸಂಸ್ಥೆಯು ಆಯಾ ಜಿಲ್ಲಾಡಳಿತಗಳ ಸಹಯೋಗದೊಂದಿಗೆ ನಡೆಸಿತು. ಫಲಾನುಭವಿಗಳ ವೈಯಕ್ತಿಕ ಅಗತ್ಯಗಳನ್ನು ಗುರುತಿಸಲು ಮತ್ತು ಅವರಿಗೆ ಸೂಕ್ತವಾದ ಸಹಾಯಕ ಸಾಧನಗಳನ್ನು ಒದಗಿಸುವುದನ್ನು ಖಚಿತಪಡಿಸಿಕೊಳ್ಳಲು ಪೂರ್ವ-ಮೌಲ್ಯಮಾಪನ ಹಾಗೂ ಪರೀಕ್ಷಾ ಶಿಬಿರಗಳನ್ನು ನಡೆಸಲಾಯಿತು.

ಈ ಸಂದರ್ಭದಲ್ಲಿ, ಡಾ. ವೀರೇಂದ್ರ ಕುಮಾರ್ ಅವರು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರಿಗೆ ಜನ್ಮದಿನದ ಶುಭಾಶಯಗಳನ್ನು ಕೋರಿದರು ಮತ್ತು 'ಸೇವಾ' ಹಾಗೂ ರಾಷ್ಟ್ರ ಸೇವೆಯ ಮನೋಭಾವವನ್ನು ಬಲಪಡಿಸುವಂತೆ ಎಲ್ಲರಿಗೂ ಕರೆ ನೀಡಿದರು. ಜಾಗೃತಿ ಮೂಡಿಸುವಲ್ಲಿ ಹಾಗೂ ಅರ್ಹ ಫಲಾನುಭವಿಗಳನ್ನು ಸರ್ಕಾರದ ಯೋಜನೆಗಳೊಂದಿಗೆ ಸಂಪರ್ಕಿಸುವಲ್ಲಿ ಮುದ್ರಣ ಮತ್ತು ಎಲೆಕ್ಟ್ರಾನಿಕ್ ಮಾಧ್ಯಮಗಳು ನೀಡಿರುವ ಕೊಡುಗೆಯನ್ನೂ ಅವರು ಈ ವೇಳೆ ಸ್ಮರಿಸಿದರು.

ದೇಶಾದ್ಯಂತ ನಡೆಯುತ್ತಿರುವ 'ಸಾಮಾಜಿಕ ಅಧಿಕಾರಿತಾ ಶಿಬಿರ'ಗಳು ಕೇವಲ ಸಹಾಯಕ ಸಾಧನಗಳ ವಿತರಣೆಗಿಂತ ಮಿಗಿಲಾದವು; ಇವು ಘನತೆ, ಸುಲಭ ಪ್ರವೇಶಾವಕಾಶ ಮತ್ತು ಸ್ವಾವಲಂಬನೆಯನ್ನು ಸಮಾಜದ ಕಟ್ಟಕಡೆಯ ವ್ಯಕ್ತಿಗೂ ತಲುಪಿಸುವ ಸಾಮೂಹಿಕ ರಾಷ್ಟ್ರೀಯ ಪ್ರಯತ್ನವನ್ನು ಬಿಂಬಿಸುತ್ತವೆ. ಜೊತೆಗೆ, ಎಲ್ಲರನ್ನೂ ಒಳಗೊಂಡ, ಸುಲಭ ಪ್ರವೇಶಾವಕಾಶವುಳ್ಳ, ಸಬಲ ಮತ್ತು ಸ್ವಾವಲಂಬಿ ಭಾರತದ ದೃಷ್ಟಿಕೋನವನ್ನು ಬಲಪಡಿಸುತ್ತವೆ.

 

*****

(ಪ್ರಕಟಣೆ ಐ.ಡಿ.: 2311744) ವಿಸಿಟರ್ ಕೌಂಟರ್ : 9