കോട്ടയം നാഷണൽ ഹോമിയോപ്പതി റിസർച്ച് ഇൻസ്റ്റിറ്റ്യൂട്ട് ഇൻ മെന്റൽ ഹെൽത്തിന്റെ (NHRIMH) ആറാമത് ഇൻസ്റ്റിറ്റ്യൂട്ട് ഫിനാൻസ് കമ്മിറ്റി യോഗം, ഇന്ത്യ ഗവൺമെൻ്റിൻ്റെ  ആയുഷ് മന്ത്രാലയം ജോയിന്റ് സെക്രട്ടറി ശ്രീമതി അലർമേൽമങ്കൈ ഡി. യുടെ അധ്യക്ഷതയിൽ 2026 സെപ്റ്റംബർ 14-ന് ചേർന്നു.

ശ്രീമതി അലർമേൽമങ്കൈ ഡി., എൻ.എച്ച്.ആർ.ഐ.എം.എച്ചിലെ ബിരുദാനന്തര ബിരുദ വിദ്യാർത്ഥികൾക്കായുള്ള സ്കിൽ ലബോറട്ടറി ഉദ്ഘാടനം ചെയ്യുകയും ഒ.പി.ഡി, ഐ.പി.ഡി സൗകര്യങ്ങൾ സന്ദർശിക്കുകയും ചെയ്തു. ബിരുദാനന്തര ബിരുദ വിദ്യാർത്ഥികൾ, ജീവനക്കാർ, രോഗികൾ എന്നിവരുമായി സംവദിച്ച അവർ ഇൻസ്റ്റിറ്റ്യൂട്ടിന്റെ അക്കാദമിക്, ഗവേഷണ, രോഗ പരിചരണ പ്രവർത്തനങ്ങൾ അവലോകനം ചെയ്തു.

ഇൻസ്റ്റിറ്റ്യൂട്ടിന്റെ സാമ്പത്തിക, അക്കാദമിക്, ഗവേഷണ, ഇൻഫ്രാസ്ട്രക്ചർ, ഭരണപരമായ വികസനം എന്നിവയുമായി ബന്ധപ്പെട്ട പ്രധാന മേഖലകൾ ഇൻസ്റ്റിറ്റ്യൂട്ട് ഫിനാൻസ് കമ്മിറ്റി അവലോകനം ചെയ്തു. മുൻ യോഗത്തിലെടുത്ത തീരുമാനങ്ങളുടെ പുരോഗതി വിലയിരുത്തിയ സമിതി, ഇൻസ്റ്റിറ്റ്യൂട്ടിന്റെ ഭൗതിക സാഹചര്യങ്ങൾ, സാമ്പത്തിക മാനേജ്‌മെന്റ്, മനുഷ്യവിഭവശേഷി ആവശ്യകതകൾ, അക്കാദമിക സൗകര്യങ്ങൾ, ഗവേഷണ ശേഷി എന്നിവയുമായി ബന്ധപ്പെട്ട നിർദ്ദേശങ്ങളും പരിഗണിച്ചു.

ഗവേഷണ പരിപാടികൾ വിപുലീകരിക്കുന്നതിനും, ലബോറട്ടറി സൗകര്യങ്ങൾ നവീകരിക്കുന്നതിനും, നാഡീവ്യൂഹ, മാനസിക രോ​ഗങ്ങളിലെ വികസിത പരീക്ഷണ-യാന്ത്രിക ഗവേഷണങ്ങൾക്കായുള്ള സൗകര്യങ്ങൾ വികസിപ്പിക്കുന്നതിനും ഊന്നൽ നൽകിക്കൊണ്ട്, എൻ.എച്ച്.ആർ.ഐ.എം.എച്ചിലെ ഗവേഷണ അന്തരീക്ഷം ശക്തിപ്പെടുത്തുന്നത് ഒരു മുൻഗണനാ വിഷയമായി വിലയിരുത്തി.

എൻ.എച്ച്.ആർ.ഐ.എം.എച്ചിന്റെ ക്ലിനിക്കൽ, അക്കാദമിക്, ഗവേഷണ ആവശ്യങ്ങൾക്ക് അനുസൃതമായി ഇൻസ്റ്റിറ്റ്യൂട്ടിന്റെ ശേഷി വർദ്ധിപ്പിക്കുന്നതിനുള്ള നിർദ്ദേശങ്ങളും കമ്മിറ്റി അവലോകനം ചെയ്തു. അക്കാദമിക് കൈമാറ്റം, ഗവേഷണ പങ്കാളിത്തം, ശേഷി വർദ്ധിപ്പിക്കൽ എന്നിവ പ്രോത്സാഹിപ്പിക്കുന്നതിനായി അനുയോജ്യമായ ധാരണാപത്രങ്ങളിലൂടെ പ്രശസ്തമായ ദേശീയ, സംസ്ഥാന തലത്തിലുള്ള സ്ഥാപനങ്ങളുമായി കൂടുതൽ സഹകരണം ഉറപ്പാക്കാൻ കമ്മിറ്റി പ്രോത്സാഹിപ്പിച്ചു. കൂടാതെ, ലോക മാനസികാരോഗ്യ ദിനത്തിൽ ഒരു ദേശീയ സമ്മേളനം സംഘടിപ്പിക്കാനും കമ്മിറ്റി ശുപാർശ ചെയ്തു.

ലബോറട്ടറി സേവനങ്ങളുടെ ഗുണനിലവാരം വർദ്ധിപ്പിക്കുന്നതായിരുന്നു ചർച്ച ചെയ്ത മറ്റൊരു പ്രധാന വിഷയം. ഗുണനിലവാരം ഉറപ്പാക്കുന്നതിനുള്ള  സംവിധാനങ്ങൾ ശക്തിപ്പെടുത്തുന്നതിനും ലബോറട്ടറി സൗകര്യങ്ങൾക്ക് അംഗീകാരം ലഭ്യമാക്കുന്നതിനുമുള്ള നടപടികൾ കമ്മിറ്റി അവലോകനം ചെയ്തു. ഊർജ്ജക്ഷമത, സുരക്ഷാ സംവിധാനങ്ങൾ, അറ്റകുറ്റപ്പണികൾ, മറ്റ് അത്യാവശ്യ അടിസ്ഥാനസൗകര്യ  ആവശ്യകതകൾ എന്നിവയുമായി ബന്ധപ്പെട്ട നടപടികളും യോഗത്തിൽ പരിഗണിച്ചു.

ധനകാര്യ അച്ചടക്കം, ഗുണനിലവാരം, വിഭവങ്ങളുടെ പരമാവധി ഉപയോഗം എന്നിവയ്ക്ക് ഊന്നൽ നൽകിക്കൊണ്ട്, ഫലപ്രദമായ ഏകോപനത്തിലൂടെയും സൂക്ഷ്മമായ മേൽനോട്ടത്തിലൂടെയും അംഗീകൃത പ്രവൃത്തികൾ സമയബന്ധിതമായി പൂർത്തിയാക്കണമെന്ന് കമ്മിറ്റി ഊന്നിപ്പറഞ്ഞു.

ആയൂഷ് മന്ത്രാലയ ഉപദേഷ്ടാവ് (ഹോമിയോപ്പതി) ഡോ. പ്രീത കിഴക്കതിൽ , ന്യൂഡൽഹി സി.സി.ആർ.എച്ച് ഡയറക്ടർ ജനറൽ ഡോ. സുഭാഷ് കൗശിക് എന്നിവർ യോഗത്തിൽ പങ്കെടുത്തു. ആയൂഷ് മന്ത്രാലയം ജോയിന്റ് ഉപദേഷ്ടാവ് (ഹോമിയോപ്പതി) ഡോ. ശ്രീനിവാസ് റാവു ചിന്ത, ഇന്റഗ്രേറ്റഡ് ഫിനാൻസ് ഡിവിഷൻ പ്രതിനിധി ഡയറക്ടർ ശ്രീ അമരേന്ദ്ര സിംഗ്, ആയൂഷ് മന്ത്രാലയത്തിലെ മറ്റ് മുതിർന്ന ഉദ്യോഗസ്ഥർ എന്നിവർ യോഗത്തിൽ ഓൺലൈനായി പങ്കെടുത്തു.

മെച്ചപ്പെട്ട അടിസ്ഥാനസൗകര്യങ്ങൾ , ഗുണനിലവാരമുള്ള ലബോറട്ടറി സേവനങ്ങൾ, സ്ഥാപനപരമായ സഹകരണങ്ങൾ, അംഗീകൃത പദ്ധതികളുടെ സമയബന്ധിതമായ നടപ്പാക്കൽ എന്നിവയിലൂടെ എൻ.എച്ച്.ആർ.ഐ.എം.എച്ചിന്റെ ഗവേഷണ, അക്കാദമിക്, ക്ലിനിക്കൽ ശേഷികൾ ശക്തിപ്പെടുത്തേണ്ടതിന്റെ പ്രാധാന്യം ഓർമ്മിപ്പിച്ചുകൊണ്ട് യോഗം സമാപിച്ചു.

****** 

SK

( റിലീസ് ഐ.ഡി: 2310982) സന്ദര്‍ശക കൗണ്ടര്‍ : 6