مواصلات اور شمال مشرقی خطے کی ترقی کے مرکزی وزیر جیوترآدتیہ سندھیا نے آج سنت ملوک داس جی کی یاد میں منعقد سنت سمیلن کے موقع پر حکومت ہند کے محکمہ ڈاک کی جانب سے جاری کردہ یادگاری ڈاک ٹکٹ جاری کیا۔

انہوں نے کہا کہ سنت ملوک داس جی کی یاد میں جاری کیا گیا یہ ڈاک ٹکٹ ان کی عقیدت، علم، شفقت اور عوامی فلاح کی مالا مال روایت کی یاد کو قومی یادداشت سے جوڑنے کی ایک اہم کوشش ہے، جس نے نسل در نسل لوگوں کو زندگی کی راہ دکھائی ہے۔

 

مقدس سنتوں اور مہاتماؤں، قابل احترام سوامی راجندر داس دیواچاریہ جی مہاراج، شری ملوک پیٹھ سیوا سنستھان نیاس کے عہدیداروں اور ملک کے مختلف حصوں سے آئے عقیدت مندوں سے خطاب کرتے ہوئے مرکزی وزیر جیوترآدتیہ سندھیا نے کہا کہ سنتوں کے اقوال اور ان کی زندگیاں مسلسل ہندوستان کی روح کو سمت عطا کرتی رہی ہیں۔ انہوں نے کہا کہ یہ ایک خاص اتفاق ہے کہ شری رام کتھا کے افتتاح کے موقع پر اس سنت کی یاد میں یادگاری ڈاک ٹکٹ جاری کیا جا رہا ہے، جن کا دل بھگوان رام کی عقیدت میں ہمیشہ ڈوبا رہا۔

 

جناب سندھیا نے کہا کہ سنت ملوک داس جی بھگوان رام کے عقیدت مند تھے، لیکن بھگوان رام سے ان کی عقیدت صرف پوجا اور عبادت تک محدود نہیں تھی۔ انہوں نے بھگوان رام کے کردار کو اپنی زندگی کا فلسفہ بنایا اور اسے عوام تک پہنچایا۔ ان کی نظر میں بھگوان رام فرض، قربانی، سچائی، شفقت، انصاف اور عوامی فلاح کی علامت تھے۔

مرکزی وزیر نے کہا کہ ہندوستان آج گہرے ثقافتی اعتماد کے ساتھ اقتصادی ترقی کی راہ پر بھی آگے بڑھ رہا ہے۔ وزیراعظم جناب نریندر مودی کی قیادت میں ملک اپنی وراثت کو جدید ترقی سے جوڑنے کی سمت میں آگے بڑھ رہا ہے۔ ایودھیا میں عظیم الشان رام مندر، کاشی وشوناتھ دھام، مہاکال لوک اور ملک بھر میں متعدد روحانی و ثقافتی ورثہ مقامات کے تحفظ و احیا کا ذکر کرتے ہوئے انہوں نے کہا کہ ہندوستان کے لیے ترقی اور ثقافت ایک دوسرے کی مخالف نہیں ہیں۔ ہندوستان اپنی جڑوں سے جڑا رہتے ہوئے جدید بھی بن سکتا ہے۔

جناب سندھیا نے کہا کہ ہندوستان ’وکست بھارت 2047‘ کے عزم کے ساتھ آگے بڑھ رہا ہے، لیکن ترقی اسی وقت مکمل ہوگی جب انسان اس کے مرکز میں ہو۔ ملک کی ترقی میں شفقت، معیشت میں مواقع، آخری فرد تک ٹیکنالوجی کے فوائد پہنچانے کا عزم، تعلیم کے ذریعے کردار سازی اور معاشرے کی فلاح کے لیے طاقت کا استعمال ہی ترقی کو بامعنی بناتے ہیں۔

مرکزی وزیر نے کہا کہ محکمہ ڈاک کی جانب سے جاری کیا گیا یہ یادگاری ڈاک ٹکٹ سنت ملوک داس جی کے روحانی اور ثقافتی ورثے کو قومی یادداشت کا حصہ بنانے کا ایک ذریعہ ہے۔ یہ آنے والی نسلوں کو ان کے عقیدت، علم، شفقت اور انسانیت کے پیغام سے جوڑنے میں بھی اہم کردار ادا کرے گا۔

***

ش ح ۔   م  د ۔  م  ص

U : 3606

(ریلیز آئی ڈی: 2310673) وزیٹر کاؤنٹر : 7