ప్రెస్‌ ఇన్ఫర్మేషన్‌ బ్యూరో (పీఐబీ), హైదరాబాద్‌ ఆధ్వర్యంలో గుజరాత్‌లో పర్యటిస్తున్న తెలంగాణ మీడియా ప్రతినిధుల బృందం ఈరోజు ధోలేరా గ్రీన్‌ఫీల్డ్‌ పారిశ్రామిక స్మార్ట్‌ సిటీని, చారిత్రక హరప్పా నాగరికతకు చెందిన లోథాల్‌ పురావస్తు ప్రదేశాన్ని సందర్శించింది.

ధోలేరాలో గ్రీన్‌ఫీల్డ్‌ స్మార్ట్‌ సిటీ సమగ్ర మాస్టర్‌ ప్రణాళిక, తక్షణ కార్యకలాపాలు ప్రారంభించుకునే పారిశ్రామిక వ్యవస్థ, ప్రధాన మౌలిక వసతులు, భవిష్యత్‌ విస్తరణ ప్రణాళికలపై మీడియా ప్రతినిధుల బృందానికి వివరాలను అందించారు.

మీడియా ప్రతినిధులతో మాట్లాడిన ధోలేరా ఇండస్ట్రియల్ సిటీ డెవలప్‌మెంట్ లిమిటెడ్‌ (డీఐసీడీఎల్‌) సంయుక్త మేనేజింగ్‌ డైరెక్టర్‌ శ్రీ రుషిన్‌ భట్‌, డీఐసీడీఎల్‌ మార్కెటింగ్‌ మేనేజర్‌ శ్రీమతి అదితి గోయక్‌ -  ఈ ప్రాంతంలో అభివృద్ధి చేస్తున్న స్మార్ట్‌ యుటిలిటీస్‌, రవాణా అనుసంధానత, అందుబాటులోకి వస్తున్న పెట్టుబడి అవకాశాలను వివరించారు.

 

సుమారు 4,500 ఏళ్ల చరిత్ర కలిగిన సింధు లోయ నాగరికతకు చెందిన ప్రముఖ స్థావరాల్లో ఒకటైన లోథల్‌ను కూడా మీడియా ప్రతినిధి బృందం సందర్శించింది. అక్కడి తవ్వకాల ప్రదేశాన్ని, ప్రాచీన రేవు, గిడ్డంగుల సముదాయాలు, పట్టణ మురుగునీటి పారుదల వ్యవస్థలను జర్నలిస్టులు పరిశీలించారు. హరప్పా నాగరికతకు చెందిన అభివృద్ధి చెందిన ఇంజినీరింగ్‌ నైపుణ్యం, పట్టణ ప్రణాళిక, సముద్ర వాణిజ్య పద్ధతుల గురించి తెలుసుకున్నారు. 

లోథల్‌లో సాగర్‌మాల కార్యక్రమం కింద కేంద్ర ఓడరేవులు, నౌకాయాన, జలమార్గాల మంత్రిత్వ శాఖ అభివృద్ధి చేస్తున్న జాతీయ సముద్ర వారసత్వ సముదాయం (ఎన్ఎంహెచ్‌సీ) నిర్మాణ పురోగతిని కూడా ప్రతినిధి బృందం పరిశీలించింది. సుమారు 400 ఎకరాల విస్తీర్ణంలో రూ.4,500 కోట్ల అంచనా వ్యయంతో ఈ సముదాయాన్ని అభివృద్ధి చేస్తున్నారు.

ఈ సందర్భంగా అధికారులు ప్రతినిధి బృందానికి ఎన్ఎమ్‌హెచ్‌సి  ప్రాజెక్టులోని ప్రధాన ఆకర్షణలను వివరించారు. ఇందులో భారతదేశ 4,500 ఏళ్ల నావికా సామర్థ్యంతో కూడిన సముద్ర ప్రదర్శనశాలలు, పురాతన లోథల్ నగర నమూనా, లైట్‌హౌస్ మ్యూజియం, 5డీ డోమ్ థియేటర్, ఆక్వాటిక్ గ్యాలరీ వంటివి ప్రధానమైనవి. ఈ కాంప్లెక్స్‌లో తీరప్రాంత రాష్ట్రాల పెవిలియన్లు, థీమ్ పార్కులు, పర్యావరణ రహిత అంతర్గత రవాణా, సందర్శకుల వసతి సౌకర్యాలు కూడా ఉండనున్నాయి.

 

ఈ పర్యటన అభివృద్ధి, వారసత్వ పరిరక్షణల సమన్వయాన్ని ప్రతిబింబించింది. ధోలేరా భారత్‌లో అభివృద్ధి చెందుతున్న పారిశ్రామిక, మౌలిక వసతుల సామర్థ్యాలకు ప్రతీకగా నిలుస్తుండగా, లోథల్‌ దేశ సుసంపన్నమైన నాగరికత, సముద్ర వారసత్వాన్ని ప్రతిబింబిస్తోంది.

ప్రధానమంత్రి శ్రీ నరేంద్ర మోదీ దార్శనికత - అభివృద్ధితో పాటు వారసత్వ పరిరక్షణ (వికాస్‌ భీ, విరాసత్‌ భీ) కు అనుగుణంగా కేంద్ర ప్రభుత్వం చేపడుతున్న అభివృద్ధి, వారసత్వ పరిరక్షణ కార్యక్రమాలను పాత్రికేయులు ప్రత్యక్షంగా పరిశీలించే అవకాశం ఈ పర్యటన ద్వారా లభించింది.

 

***

(రిలీజ్ ఐడి: 2308968) సందర్శకుల సూచీ సంఖ్య : : 15