Ki nongthoh khubor na Meghalaya bad Sikkim ki la leit peit ïa ka jingiar jong ki jingthaw ba don ha ki duriaw jong ka India, ka kam ri dohkha bad ka kam tong dohkha ha ka por ba ki leit jngoh ïa ka Central Marine Fisheries Research Institute (CMFRI), Kochi, ka jaka wad bniah kaba heh tam ha ka ri. Kane ka prokram, kaba long shi bynta jong ka Press Tour jong ka Press Information Bureau (PIB) sha Kerala, ka kynthup ïa ki jingïakren bad ki stad saian bad ka jingleit jngoh ïa ki museum jong ka Institute, ki jaka buh dohkha bad kiwei kiwei ki bynta jong kane ka jaka.

Kawei na ki bynta ba kongsan ka long ka shyieng jong u Bryde’s whale uba heh haduh 14 meter ha ka Maring Megafauna Museum. Utei u dohkha whale, u la poi ha rud duriaw ha Kozhikode ha u Risaw 2023 bad hadien ba la ioh ia ka jingbit kaba donkam, la tep ia u ha rud duriaw. Hadien kumba shisnem eiei, ki stad saian jong ka CMFRI ki la tih ia katei ka jaka bad ki la lap ia ki shyieng, kaba la pyn tyrkhong, pynkhuid bad pyniasoh lang da ka jingiarap jong u nongdro dur shwa ban buh ia u ha kane ka jaka ban iohi ki briew.

La pyni ruh ia ki nongthoh khubor ia ki sur jong ki jingthaw ba im ha duriaw ba la pyndonkam na ka bynta ka jingiaid lynti jong ki bad ka jingiakren jong ki. Ki la ioh jingtip ba ki dolphin ki pyndonkam ia ki jingsawa ban sngewthuh ia ka jaka ba ki don haba ki dang beh ia ki dohkha bad ki jingsiaw ban iakren para ma ki.

Ha ka Marine Biodiversity Museum, ki stad saian ki la batai ia ka jinglum jong ka Institute ia ki 2,856 tylli ki jingthaw ba don ha duriaw, kiba kynthup ia ki dohkha, ki echinoderm, ki mollusc, ki crustacean, ki coral bad ki seaweed. Ka museumka pyni ruh ia ki jait jingim jong ka duriaw bad ki bynta kiba iadei bad ki jingthaw ba im, ka jingsumar bad ka rukom ri dohkha kaba lah ban pynneh pynsah.

Ka aquarium ka pyni ia ka jingtrei jong ka CMFRI ha ka jingpynkha bad ri dohkha, kynthup ïa ka jingpynkha bad pynroi ïa ki jait dohkha ba pynitynnad bad ki jait dohkha kiba pyniaid iew. Ki nongthoh khubor ki la ïoh jingtip kumno ban ri ïa ki dohkha, ban pynmih bad ri ïa ki dohkha kiba dang rit, bad kumno la ïasam ïa kine ki rukom treikam lyngba ki prokram ai jinghikai ïa ki nongrep, ki nongseng kam seng jam bad ki Self-Help Group (SHG), kiba kyrshan ïa ki lad kamai bad ka jingpynmih dohkha kaba iaineh.

Ha ka jingïakren, u Dr. Vipin Kumar V. P, Principal Scientist (Agricultural Extension) bad ATIC Manager u la iathuh ia ki nongthoh khubor shaphang ki kam jong ka CMFRI bad ki sienjam jong ka ban iasam ia ki jingtip katkum ka sain bad ki rukom ri dohkha kiba kham bha bad ka imlang sahlang. U la batai ruh shaphang ka kam jong ka Institute ha kaba buddien ia ki jingdon jingem ha ki duriaw bad ban kyrshan ia ka kam ri dohkha kaba lah ban iaineh.

Ka jingiakren ka la long shaphang ka rukom ri dohkha kaba iaineh, ka jingrep ia u seaweed, ka jingpynkha bad jingpynmih symbai, ha ryngkat ki sienjam ban iarap ia ki nongri bad nongtong dohkha ban kylla ia ki rukom treikam katkum ka jingkylla jong ka suinbneng bad ka mariang.

Kane ka prokram ka la pyni ia ki nongthoh khubor ia ki jingiadei hapdeng ki jingim kiba don ha ki duriaw, ka jaka ri dohkha, ka kam ri dohkha, ki lad kamai kajih bad ka ioh ka kot na ki jaka shong um, lyngba ka jingiakren bad ki stad sain bad ka jingiohi ia ki kam wad bniah bad ki jingdon jingem jong ka CMFRI.

 

*****

(Release ID: 2308091) visitor counter : 2