اسٹیل اتھارٹی آف انڈیا لمیٹڈ (سیل) نے اگست 2026 کے ساتھ ساتھ اپریل تا اگست 2026 کی مدت کے دوران فروخت کی کارکردگی میں مضبوط اضافے کا رجحان درج کیا ہے۔ اگست 2026 پیداوار کے محاذ پر بھی ایک اہم سنگ میل ثابت ہوا، جب کمپنی نے گرم دھات، خام فولاد اور قابل فروخت فولاد کی پیداوار میں اگست کی اب تک کی اپنی سب سے زیادہ پیداوار حاصل کی۔ اگست 2026 میں خام فولاد کی پیداوار گزشتہ سال کی اسی مدت کے 1.55 ملین ٹن کے مقابلے میں 8 فیصد بڑھ کر 1.68 ملین ٹن ہوگئی، گرم دھات کی پیداوار 1.63 ملین ٹن سے 9 فیصد بڑھ کر 1.78 ملین ٹن اور قابلِ فروخت فولاد کی پیداوار گزشتہ سال کی اسی مدت کے 1.66 ملین ٹن کے مقابلے میں 1 فیصد اضافے کے ساتھ 1.69 ملین ٹن ہوگئی۔

اگست 2026 میں سیل نے مجموعی فروخت کے حجم میں سال بہ سال دو ہندسوں کی شرح سے اضافہ حاصل کیا، جس میں درجۂ اول اور درجۂ دوم کے خردہ ذرائع سے فروخت میں نمایاں اضافہ دیکھا گیا۔ مجموعی فروخت 1.871 ملین ٹن رہی، جو گزشتہ سال کی اسی مدت کے 1.654 ملین ٹن کے مقابلے میں سال بہ سال 13 فیصد اضافے کو ظاہر کرتی ہے۔ نقد وصولیوں میں بھی سال بہ سال 23 فیصد کا نمایاں اضافہ ہوا۔

کمپنی نے کئی قدر افزوده مصنوعات کے شعبوں، مثلاً کولڈ رولڈ، جستی اور الائے اسٹیل میں اگست کے دوران اب تک کی اپنی سب سے زیادہ فروخت درج کی۔ اس ماہ ذخیرۂ سامان میں بھی نمایاں کمی دیکھی گئی، جو سپلائی چین کے مؤثر تال میل اور مارکیٹ تک مصنوعات کی تیز تر رسائی کی عکاسی کرتی ہے۔ اگست 2026 کے دوران ہندوستانی ریلوے کو ریل کی فراہمی گزشتہ سال کی اسی مدت کے 1.18 لاکھ ٹن کے مقابلے میں 5 فیصد سال بہ سال اضافے کے ساتھ 1.23 لاکھ ٹن ہوگئی۔ طویل ریل کی زمرے میں کمپنی نے 1.12 لاکھ ٹن کی فراہمی کے ساتھ اب تک کی سب سے زیادہ فراہمی حاصل کی، جو سال بہ سال 11 فیصد اضافے کو ظاہر کرتی ہے۔ اس مدت کے دوران سیل نے 31.03.2026 کی سطح کے مقابلے میں اپنے قرض میں 870 کروڑ روپے کی کمی کرکے اپنی مالیاتی پوزیشن کو مزید مستحکم کیا۔

یہ رفتار اپریل تا اگست 2026 کی مدت کے دوران بھی برقرار رہی۔ عالمی سطح پر اتار چڑھاؤ کے باوجود سیل کی مجموعی فروخت 7.71 ملین ٹن تک پہنچ گئی، جو گزشتہ سال کی اسی مدت کے مقابلے میں 5.6 فیصد اضافے کو ظاہر کرتی ہے۔ تیار شدہ اور پروسیس شدہ فولاد کے شعبوں میں بھی فروخت کی رفتار مستحکم رہی، جسے مصنوعات کے بہتر امتزاج، علاقائی سطح پر مضبوط تر رسائی اور ملک میں مستحکم طلب سے تقویت ملی۔ پانچ ماہ کی مدت کے دوران نقد وصولیوں میں بھی اضافہ ہوا، جو کاروباری معاملات میں نظم و ضبط اور صارفین سے واجب الادا رقوم کی بروقت وصولی کی عکاسی کرتا ہے۔

کارکردگی پر تبصرہ کرتے ہوئے سیل کے چیئرمین اور منیجنگ ڈائریکٹر ڈاکٹر اے. کے. پانڈا نے کہا: ’’اگست اور اپریل تا اگست 2026 کی مدت کے دوران سیل کی کارکردگی ادارے کی عملی صلاحیت، تجارتی فراہمی اور مالیاتی احتیاط کے درمیان بڑھتے ہوئے تال میل کی عکاسی کرتی ہے۔ پیداوار کی ریکارڈ سطح، فروخت کی مضبوط رفتار اور مالیاتی نظم و ضبط، مجموعی طور پر کمپنی کی مستحکم ہوتی بنیادی بنیادوں کو اجاگر کرتے ہیں۔ توسیعی منصوبوں پر پیش رفت اور طلب کے امکانات مثبت رہنے کے باعث سیل اپنی ترقی کی رفتار کو مزید تیز کرنے کے لیے مضبوط پوزیشن میں ہے، جبکہ ہندوستان میں فولاد کی کھپت میں اضافے کے سفر میں بامعنی کردار ادا کرنے کے لیے بھی پوری طرح تیار ہے۔‘‘

******

ش ح۔ ف ا۔ م ر

U-NO. 3046

(ریلیز آئی ڈی: 2306884) وزیٹر کاؤنٹر : 3