ਪ੍ਰਧਾਨ ਮੰਤਰੀ ਦੇ ਸਲਾਹਕਾਰ ਸ਼੍ਰੀ ਤਰੁਣ ਕਪੂਰ ਨੇ ਝਰੀਆ ਮਾਸਟਰ ਪਲਾਨ (ਜੇਐੱਮਪੀ) ਦੇ ਤਹਿਤ ਪੁਨਰਵਾਸ, ਆਜੀਵਿਕਾ ਪੈਦਾ ਕਰਨ, ਹੁਨਰ ਵਿਕਾਸ, ਸਿੱਖਿਆ ਅਤੇ ਹੋਰ ਵਿਕਾਸ ਕਾਰਜਾਂ ਦੀ ਸਮੀਖਿਆ ਕਰਨ ਲਈ ਆਪਣੇ ਦੋ ਦਿਨਾਂ ਦੇ ਦੌਰੇ ਦੇ ਹਿੱਸੇ ਵਜੋਂ ਧਨਬਾਦ ਜ਼ਿਲ੍ਹੇ ਦੇ ਬੇਲਗਾਰੀਆ ਅਤੇ ਕਰਮਾਟੰਡ ਟਾਊਨਸ਼ਿਪ ਦਾ ਦੌਰਾ ਕੀਤਾ। ਆਪਣੀ ਫੇਰੀ ਦੌਰਾਨ, ਸ਼੍ਰੀ ਕਪੂਰ ਨੇ ਝਰੀਆ ਮਾਈਨ ਅੱਗ ਤੋਂ ਪ੍ਰਭਾਵਿਤ ਪਰਿਵਾਰਾਂ ਲਈ ਲਾਗੂ ਕੀਤੀਆਂ ਜਾ ਰਹੀਆਂ ਵੱਖ-ਵੱਖ ਯੋਜਨਾਵਾਂ ਦੀ ਸਮੀਖਿਆ ਕੀਤੀ ਅਤੇ ਮੁੜ ਵਸੇਬੇ ਵਾਲੇ ਪਰਿਵਾਰਾਂ ਅਤੇ ਸਥਾਨਕ ਨਿਵਾਸੀਆਂ ਨਾਲ ਉਨ੍ਹਾਂ ਦੀਆਂ ਜ਼ਰੂਰਤਾਂ, ਉਮੀਦਾਂ ਅਤੇ ਚਿੰਤਾਵਾਂ ਨੂੰ ਸਮਝਣ ਲਈ ਗੱਲਬਾਤ ਕੀਤੀ।

ਇਹ ਦੌਰਾ ਬੀ.ਸੀ.ਸੀ.ਐੱਲ. ਦੀਆਂ ਸੰਚਾਲਨ ਗਤੀਵਿਧੀਆਂ, ਆਧੁਨਿਕ ਮਾਈਨਿੰਗ ਤਕਨੀਕਾਂ, ਝਰੀਆ ਵਿੱਚ ਅੱਗ ਪ੍ਰਬੰਧਨ ਅਤੇ ਝਰੀਆ ਮਾਸਟਰ ਪਲਾਨ ਦੇ ਤਹਿਤ ਪੁਨਰਵਾਸ ਅਤੇ ਵਿਕਾਸ ਕਾਰਜਾਂ ਦੀ ਵਿਆਪਕ ਸਮੀਖਿਆ ਦਾ ਹਿੱਸਾ ਸੀ।

ਕਰਮਾਟੰਡ ਵਿੱਚ ਸਿੱਖਿਆ ਅਤੇ ਹੁਨਰ ਵਿਕਾਸ ਪਹਿਲਕਦਮੀਆਂ

ਸ਼੍ਰੀ ਕਪੂਰ ਨੇ ਦੂਜੇ ਦਿਨ ਦੀ ਸ਼ੁਰੂਆਤ ਕਰਮਾਟੰਡ ਟਾਊਨਸ਼ਿਪ ਦੇ ਦੌਰੇ ਨਾਲ ਕੀਤੀ। ਉਨ੍ਹਾਂ ਨੇ ਉੱਥੇ ਮਿਡਲ/ਹਾਈ ਸਕੂਲ ਦਾ ਨਿਰੀਖਣ ਕੀਤਾ, ਵਿਦਿਆਰਥੀਆਂ ਨਾਲ ਗੱਲਬਾਤ ਕੀਤੀ ਅਤੇ ਸੰਸਥਾ ਵਿੱਚ ਉਪਲਬਧ ਵਿਦਿਅਕ ਵਾਤਾਵਰਣ ਅਤੇ ਬੁਨਿਆਦੀ ਢਾਂਚੇ ਦਾ ਮੁਲਾਂਕਣ ਕੀਤਾ। ਉਨ੍ਹਾਂ ਨੇ ਸਕੂਲ ਕੈਂਪਸ ਵਿੱਚ ਇੱਕ ਪੌਦਾ ਵੀ ਲਗਾਇਆ, ਜਿਸ ਨਾਲ ਵਾਤਾਵਰਣ ਸੁਰੱਖਿਆ ਦੀ ਮਹੱਤਤਾ ਨੂੰ ਉਤਸ਼ਾਹਿਤ ਕੀਤਾ ਗਿਆ।

ਸ਼੍ਰੀ ਕਪੂਰ ਨੇ ਫਿਰ BCCL ਦੇ ਮਲਟੀ-ਸਕਿੱਲ ਡਿਵੈਲਪਮੈਂਟ ਇੰਸਟੀਟਿਊਟ (MSDI-IV) ਦਾ ਦੌਰਾ ਕੀਤਾ, ਜਿੱਥੇ ਉਨ੍ਹਾਂ ਨੇ ਬਿਊਟੀਸ਼ੀਅਨ, ਕਸਟਮਰ ਕੇਅਰ ਐਗਜ਼ੀਕਿਊਟਿਵ ਅਤੇ ਅਸਿਸਟੈਂਟ ਫਿਟਰ ਵਰਗੇ ਟ੍ਰੇਡਾਂ ਵਿੱਚ ਸਿਖਲਾਈ ਲੈ ਰਹੇ ਨੌਜਵਾਨਾਂ ਨਾਲ ਗੱਲਬਾਤ ਕੀਤੀ। MSDI-IV ਸੈਂਟਰ ਨੈਸ਼ਨਲ ਸਕਿੱਲ ਡਿਵੈਲਪਮੈਂਟ ਕਾਰਪੋਰੇਸ਼ਨ (NSDC) ਦੇ ਸਹਿਯੋਗ ਨਾਲ ਚਲਾਇਆ ਜਾਂਦਾ ਹੈ। ਇਸਦਾ ਉਦੇਸ਼ ਰੁਜ਼ਗਾਰਯੋਗਤਾ ਨੂੰ ਵਧਾਉਣਾ ਅਤੇ ਵਿਸਥਾਪਿਤ ਪਰਿਵਾਰਾਂ ਦੇ ਨੌਜਵਾਨਾਂ ਲਈ ਰੁਜ਼ਗਾਰ ਦੇ ਮੌਕੇ ਪੈਦਾ ਕਰਨਾ ਹੈ।

ਹੁਣ ਤੱਕ, ਲਗਭਗ 800 ਨੌਜਵਾਨਾਂ ਨੇ ਇਨ੍ਹਾਂ ਕੇਂਦਰਾਂ ਵਿੱਚ ਸਫਲਤਾਪੂਰਵਕ ਸਿਖਲਾਈ ਪੂਰੀ ਕੀਤੀ ਹੈ, ਜਦਕਿ 250 ਤੋਂ ਵੱਧ ਸਿਖਿਆਰਥੀ ਇਸ ਸਮੇਂ ਵੱਖ-ਵੱਖ ਕਿੱਤਿਆਂ ਵਿੱਚ ਸਿਖਲਾਈ ਲੈ ਰਹੇ ਹਨ। ਸਿਖਲਾਈ ਪ੍ਰੋਗਰਾਮ ਢਾਈ ਤੋਂ ਤਿੰਨ ਮਹੀਨਿਆਂ ਤੱਕ ਚੱਲਦੇ ਹਨ ਅਤੇ ਸਿਖਲਾਈ ਪ੍ਰਾਪਤ ਕਰਨ ਵਾਲਿਆਂ ਵਿੱਚੋਂ ਜ਼ਿਆਦਾਤਰ ਪਹਿਲਾਂ ਹੀ ਵੱਖ-ਵੱਖ ਕੰਪਨੀਆਂ ਵਿੱਚ ਨੌਕਰੀਆਂ ਜਾਂ ਪਲੇਸਮੈਂਟ ਪ੍ਰਾਪਤ ਕਰ ਚੁੱਕੇ ਹਨ।

ਇਹ ਪਹਿਲਕਦਮੀ ਬੀਸੀਸੀਐੱਲ ਦੇ ਪੁਨਰਵਾਸ ਨੂੰ ਟਿਕਾਊ ਆਜੀਵਿਕਾ ਦੇ ਮੌਕਿਆਂ ਨਾਲ ਜੋੜਨ ਅਤੇ ਪੁਨਰਵਾਸ ਕੀਤੇ ਪਰਿਵਾਰਾਂ, ਖਾਸ ਕਰਕੇ ਉਨ੍ਹਾਂ ਦੇ ਨੌਜਵਾਨਾਂ ਨੂੰ ਹੁਨਰ ਵਿਕਾਸ ਅਤੇ ਰੁਜ਼ਗਾਰ ਦੇ ਮੌਕਿਆਂ ਦਾ ਲਾਭ ਉਠਾਉਣ ਦੇ ਯੋਗ ਬਣਾਉਣ 'ਤੇ ਨਿਰੰਤਰ ਧਿਆਨ ਨੂੰ ਦਰਸਾਉਂਦੀ ਹੈ।

ਬੇਲਗਾਰੀਆ ਵਿੱਚ ਪੁਨਰਵਾਸ ਅਤੇ ਆਜੀਵਿਕਾ ਦੀਆਂ ਪਹਿਲਕਦਮੀਆਂ ਦੀ ਸਮੀਖਿਆ

ਇਸ ਤੋਂ ਬਾਅਦ, ਇੱਕ ਉੱਚ-ਪੱਧਰੀ ਵਫ਼ਦ ਨੇ ਬੇਲਗਾਰੀਆ ਟਾਊਨਸ਼ਿਪ ਦਾ ਦੌਰਾ ਕੀਤਾ ਅਤੇ ਵੱਖ-ਵੱਖ ਪੁਨਰਵਾਸ ਅਤੇ ਵਿਕਾਸ ਪਹਿਲਕਦਮੀਆਂ ਦੀ ਸਮੀਖਿਆ ਕੀਤੀ। ਸ਼੍ਰੀ ਕਪੂਰ ਨੇ ਸਥਾਨਕ ਨਿਵਾਸੀਆਂ ਨਾਲ ਗੱਲਬਾਤ ਕੀਤੀ ਅਤੇ ਟਾਊਨਸ਼ਿਪ ਵਿੱਚ ਉਪਲਬਧ ਸਹੂਲਤਾਂ ਅਤੇ ਹੋਰ ਵਿਕਾਸ ਲਈ ਉਨ੍ਹਾਂ ਦੀਆਂ ਜ਼ਰੂਰਤਾਂ ਬਾਰੇ ਉਨ੍ਹਾਂ ਤੋਂ ਫੀਡਬੈਕ ਮੰਗਿਆ। ਨਿਵਾਸੀਆਂ ਨੇ ਮੌਜੂਦਾ ਸਹੂਲਤਾਂ ਦਾ ਵਿਸਥਾਰ ਕਰਨ ਅਤੇ ਪੁਰਾਣੇ ਘਰਾਂ ਨੂੰ ਬਿਹਤਰ ਬਣਾਉਣ ਦੀ ਜ਼ਰੂਰਤ ਜ਼ਾਹਰ ਕੀਤੀ।

ਸ਼੍ਰੀ ਕਪੂਰ ਨੇ ਜ਼ੋਰ ਦੇ ਕੇ ਕਿਹਾ ਕਿ ਪੁਨਰਵਾਸ ਪ੍ਰੋਗਰਾਮ ਦਾ ਟੀਚਾ ਸਿਰਫ਼ ਲੋਕਾਂ ਨੂੰ ਮੁੜ ਵਸਾਉਣਾ ਨਹੀਂ ਹੈ, ਸਗੋਂ ਮਾਈਨਜ਼ ਵਿੱਚ ਲੱਗੀ ਅੱਗ ਤੋਂ ਪ੍ਰਭਾਵਿਤ ਪਰਿਵਾਰਾਂ ਲਈ ਸੁਰੱਖਿਅਤ, ਸਨਮਾਨਜਨਕ ਅਤੇ ਬਿਹਤਰ ਰਹਿਣ-ਸਹਿਣ ਦੀਆਂ ਸਥਿਤੀਆਂ ਨੂੰ ਯਕੀਨੀ ਬਣਾਉਣਾ ਹੈ। ਉਨ੍ਹਾਂ ਨੇ ਸਾਰੀਆਂ ਸਬੰਧਿਤ ਏਜੰਸੀਆਂ ਵਿਚਕਾਰ ਸਹਿਯੋਗ ਰਾਹੀਂ ਸਿੱਖਿਆ, ਸਿਹਤ ਸੰਭਾਲ, ਹੁਨਰ ਵਿਕਾਸ, ਰੁਜ਼ਗਾਰ, ਆਜੀਵਿਕਾ ਦੇ ਮੌਕੇ ਅਤੇ ਹੋਰ ਬੁਨਿਆਦੀ ਢਾਂਚੇ ਨੂੰ ਬਿਹਤਰ ਬਣਾਉਣ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ।

ਕੱਪੜਾ ਮੰਤਰਾਲੇ ਦੀ ਸੰਯੁਕਤ ਸਕੱਤਰ, ਸ਼੍ਰੀਮਤੀ ਅਲਕਨੰਦਾ ਦਿਆਲ ਨੇ ਪੁਨਰਵਾਸ ਖੇਤਰਾਂ ਵਿੱਚ ਸਥਾਨਕ ਰੁਜ਼ਗਾਰ ਅਤੇ ਆਜੀਵਿਕਾ ਦੇ ਮੌਕੇ ਪੈਦਾ ਕਰਨ ਦੀ ਸੰਭਾਵਨਾ 'ਤੇ ਚਾਨਣਾ ਪਾਇਆ, ਜਿਸ ਵਿੱਚ ਟੈਕਸਟਾਈਲ ਸੈਕਟਰ ਰਾਹੀਂ ਪੇਸ਼ ਕੀਤੇ ਗਏ ਮੌਕੇ ਵੀ ਸ਼ਾਮਲ ਹਨ। ਉਨ੍ਹਾਂ ਨੇ ਖਾਸ ਤੌਰ 'ਤੇ ਹੱਥ ਨਾਲ ਬੁਣੇ ਹੋਏ ਫਾਈਬਰਾਂ ਅਤੇ ਤਕਨੀਕੀ ਟੈਕਸਟਾਈਲ ਵਿੱਚ ਉੱਭਰ ਰਹੇ ਮੌਕਿਆਂ 'ਤੇ ਚਾਨਣਾ ਪਾਇਆ ਅਤੇ ਸਬੰਧਿਤ ਅਧਿਕਾਰੀਆਂ ਨੂੰ ਜ਼ਰੂਰੀ ਮਾਰਗਦਰਸ਼ਨ ਪ੍ਰਦਾਨ ਕੀਤਾ।

ਸਥਾਨਕ ਆਜੀਵਿਕਾ ਅਤੇ ਭਾਈਚਾਰਕ ਵਿਕਾਸ ਨੂੰ ਉਤਸ਼ਾਹਿਤ ਕਰਨਾ

ਦੌਰੇ ਦੌਰਾਨ, ਸ਼੍ਰੀ ਕਪੂਰ ਨੇ ਬੀ.ਸੀ.ਸੀ.ਐੱਲ. ਦੇ ਸੀ.ਐੱਸ.ਆਰ. ਅਤੇ ਜੇ.ਐੱਮ.ਪੀ. ਪਹਿਲਕਦਮੀਆਂ ਦੇ ਸਹਿਯੋਗ ਨਾਲ 'ਝਾਰਸ਼ਿਲਪ' ਅਤੇ 'ਪ੍ਰੋਜੈਕਟ ਆਰੋਹੀ' ਅਧੀਨ ਸਵੈ-ਸਹਾਇਤਾ ਸਮੂਹਾਂ (SHGs) ਦੁਆਰਾ ਲਗਾਈਆਂ ਗਈਆਂ ਸਟਾਲਾਂ ਦਾ ਵੀ ਨਿਰੀਖਣ ਕੀਤਾ। ਇਨ੍ਹਾਂ ਸਟਾਲਾਂ ਨੇ ਦਸਤਕਾਰੀ ਅਤੇ ਕਾਰੀਗਰਾਂ ਦੁਆਰਾ ਬਣਾਏ ਗਏ ਉਤਪਾਦਾਂ ਦੀ ਇੱਕ ਵਿਸ਼ਾਲ ਸ਼੍ਰੇਣੀ ਪ੍ਰਦਰਸ਼ਿਤ ਕੀਤੀ। ਇਹ ਉਤਪਾਦ ਸਥਾਨਕ ਭਾਈਚਾਰਿਆਂ ਦੇ ਹੁਨਰ ਅਤੇ ਉੱਦਮੀ ਸੰਭਾਵਨਾ ਨੂੰ ਦਰਸਾਉਂਦੇ ਹਨ, ਜਦੋਂ ਕਿ ਭਾਈਚਾਰਕ ਪਹਿਲਕਦਮੀਆਂ ਦੁਆਰਾ ਟਿਕਾਊ ਆਜੀਵਿਕਾ ਦੇ ਮੌਕਿਆਂ ਨੂੰ ਮਜ਼ਬੂਤ ​​ਕਰਨ ਦੀ ਸੰਭਾਵਨਾ ਨੂੰ ਵੀ ਉਜਾਗਰ ਕਰਦੇ ਹਨ।

ਝਰੀਆ ਵਿਹਾਰ ਕਲੋਨੀ ਦੇ ਦੌਰੇ ਦੌਰਾਨ, ਸ਼੍ਰੀ ਕਪੂਰ ਨੇ ਅਪਗ੍ਰੇਡ ਕੀਤੇ ਪ੍ਰਾਇਮਰੀ ਸਕੂਲ, ਸਿਹਤ ਉਪ-ਕੇਂਦਰ, ਅਤੇ ਮਾਡਲ ਆਂਗਣਵਾੜੀ ਕੇਂਦਰ-ਕਮ-ਪ੍ਰੀ-ਨਰਸਰੀ ਸਕੂਲ ਦਾ ਉਦਘਾਟਨ ਕੀਤਾ। ਉਨ੍ਹਾਂ ਨੇ ਫੇਜ-I ਵਿੱਚ ਆਰਐੱਸਪੀ ਕਾਲਜ ਦਾ ਵੀ ਦੌਰਾ ਕੀਤਾ ਅਤੇ ਸੰਸਥਾ ਲਈ ਪ੍ਰਸਤਾਵਿਤ ਬੁਨਿਆਦੀ ਢਾਂਚੇ ਦੇ ਅਪਗ੍ਰੇਡ ਅਤੇ ਹੋਰ ਵਿਕਾਸ ਕਾਰਜਾਂ ਦੀ ਸਮੀਖਿਆ ਕੀਤੀ।

ਬੇਲਗਾਰੀਆ ਵਿੱਚ ਹੁਨਰ ਵਿਕਾਸ ਅਤੇ ਕੱਪੜਾ ਉਤਪਾਦਨ

ਸ਼੍ਰੀ ਕਪੂਰ ਨੇ ਬੀ.ਸੀ.ਸੀ.ਐਲ. ਦੇ ਐੱਮ.ਐੱਸ.ਡੀ.ਆਈ.- II ਦਾ ਵੀ ਨਿਰੀਖਣ ਕੀਤਾ, ਜਿੱਥੇ ਇਸ ਸਮੇਂ ਬਹੁ-ਹੁਨਰਮੰਦ ਟੈਕਨੀਸ਼ੀਅਨਾਂ ਸਮੇਤ ਕਈ ਤਰ੍ਹਾਂ ਦੇ ਵਪਾਰਾਂ ਵਿੱਚ ਸਿਖਲਾਈ ਦਿੱਤੀ ਜਾ ਰਹੀ ਹੈ। ਉਨ੍ਹਾਂ ਨੇ ਹੁਨਰ ਵਿਕਾਸ ਅਤੇ ਉਤਪਾਦਨ ਕੇਂਦਰ ਦੀਆਂ ਗਤੀਵਿਧੀਆਂ ਦੀ ਵੀ ਸਮੀਖਿਆ ਕੀਤੀ, ਜੋ ਕਿ ਬੀ.ਸੀ.ਸੀ.ਐੱਲ., ਝਰੀਆ ਪੁਨਰਵਾਸ ਅਤੇ ਵਿਕਾਸ ਅਥਾਰਿਟੀ (ਜੇ.ਆਰ.ਡੀ.ਏ.), ਝਾਰਖੰਡ ਸਰਕਾਰ ਅਤੇ ਰਾਜਧਾਨੀ ਯੂਨੀਵਰਸਲ ਫੈਬਰਿਕਸ ਪ੍ਰਾਈਵੇਟ ਲਿਮਿਟੇਡ ਦੇ ਸਹਿਯੋਗ ਨਾਲ ਵਿਕਸਿਤ ਕੀਤਾ ਜਾ ਰਿਹਾ ਹੈ।

ਇਹ ਕੇਂਦਰ ਸਥਾਨਕ ਭਾਈਚਾਰਿਆਂ ਲਈ ਹੁਨਰ ਵਿਕਾਸ, ਰੁਜ਼ਗਾਰ ਅਤੇ ਟਿਕਾਊ ਆਜੀਵਿਕਾ ਦੇ ਮੌਕਿਆਂ ਨੂੰ ਉਤਸ਼ਾਹਿਤ ਕਰਨ ਦੇ ਉਦੇਸ਼ ਨਾਲ ਸਥਾਪਿਤ ਕੀਤਾ ਗਿਆ ਹੈ। ਸਿਖਲਾਈ ਪ੍ਰੋਗਰਾਮ ਦੇ ਪੂਰਾ ਹੋਣ ਤੋਂ ਬਾਅਦ, ਰਾਜਧਾਨੀ ਟੈਕਸਟਾਈਲਸ ਸ਼ੁਰੂ ਵਿੱਚ ਸੈਂਟਰ ਵਿੱਚ ਟੈਕਸਟਾਈਲ ਉਦਯੋਗ ਨਾਲ ਸਬੰਧਿਤ ਹੁਨਰ ਸਿਖਲਾਈ ਅਤੇ ਉਤਪਾਦਨ ਗਤੀਵਿਧੀਆਂ ਸ਼ੁਰੂ ਕਰੇਗਾ। ਇਸ ਪਹਿਲਕਦਮੀ ਤੋਂ ਹੁਨਰ ਵਿਕਾਸ, ਸਥਾਨਕ ਰੁਜ਼ਗਾਰ ਅਤੇ ਉਤਪਾਦਨ-ਅਧਾਰਿਤ ਆਜੀਵਿਕਾ ਦੇ ਮੌਕਿਆਂ ਵਿਚਕਾਰ ਸਬੰਧ ਨੂੰ ਮਜ਼ਬੂਤ ​​ਕਰਨ ਦੀ ਉਮੀਦ ਹੈ ।

ਧਨਬਾਦ ਵਿੱਚ ਉੱਚ ਪੱਧਰੀ ਸਮੀਖਿਆ ਮੀਟਿੰਗ ਹੋਈ

ਇਹ ਦੌਰਾ ਧਨਬਾਦ ਕਲੈਕਟੋਰੇਟ ਵਿਖੇ ਸ਼੍ਰੀ ਤਰੁਣ ਕਪੂਰ ਦੀ ਪ੍ਰਧਾਨਗੀ ਹੇਠ ਇੱਕ ਉੱਚ-ਪੱਧਰੀ ਮੀਟਿੰਗ ਨਾਲ ਸਮਾਪਤ ਹੋਇਆ। ਮੀਟਿੰਗ ਵਿੱਚ ਝਰੀਆ ਮਾਸਟਰ ਪਲਾਨ ਦੇ ਤਹਿਤ ਜੇਆਰਡੀਏ ਅਤੇ ਸਬੰਧਿਤ ਵਿਭਾਗਾਂ ਦੁਆਰਾ ਕੀਤੇ ਜਾ ਰਹੇ ਪੁਨਰਵਾਸ, ਬੁਨਿਆਦੀ ਢਾਂਚੇ ਅਤੇ ਵਿਕਾਸ ਕਾਰਜਾਂ ਦੀ ਪ੍ਰਗਤੀ ਦੀ ਸਮੀਖਿਆ ਕੀਤੀ ਗਈ।

ਸ੍ਰੀ ਕਪੂਰ ਨੇ ਸਬੰਧਿਤ ਏਜੰਸੀਆਂ ਨੂੰ ਮੁੜ ਵਸੇਬੇ ਦੇ ਯਤਨਾਂ ਨੂੰ ਤੇਜ਼ ਕਰਨ ਅਤੇ ਪ੍ਰਭਾਵਿਤ ਪਰਿਵਾਰਾਂ ਦੇ ਸੁਰੱਖਿਅਤ ਅਤੇ ਸਨਮਾਨਜਨਕ ਪੁਨਰਵਾਸ ਨੂੰ ਤਰਜੀਹ ਦੇਣ ਦੇ ਨਿਰਦੇਸ਼ ਦਿੱਤੇ। ਉਨ੍ਹਾਂ ਪੁਨਰਵਾਸ ਖੇਤਰਾਂ ਵਿੱਚ ਸਿੱਖਿਆ, ਸਿਹਤ ਸੰਭਾਲ, ਆਜੀਵਿਕਾ, ਹੁਨਰ ਵਿਕਾਸ ਅਤੇ ਬੁਨਿਆਦੀ ਢਾਂਚੇ ਨੂੰ ਹੋਰ ਮਜ਼ਬੂਤ ​​ਕਰਨ ਦੀ ਜ਼ਰੂਰਤ 'ਤੇ ਵੀ ਜ਼ੋਰ ਦਿੱਤਾ। ਉਨ੍ਹਾਂ ਸਾਰੀਆਂ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਵਿਚਕਾਰ ਬਿਹਤਰ ਤਾਲਮੇਲ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ ਅਤੇ ਚੱਲ ਰਹੀਆਂ ਅਤੇ ਯੋਜਨਾਬੱਧ ਪਹਿਲਕਦਮੀਆਂ ਨੂੰ ਸਮੇਂ ਸਿਰ ਅਤੇ ਨਤੀਜਾ-ਮੁਖੀ ਪੂਰਾ ਕਰਨ ਦਾ ਸੱਦਾ ਦਿੱਤਾ।

 ਮੀਟਿੰਗ ਅਤੇ ਫੀਲਡ ਵਿਜ਼ਿਟ ਵਿੱਚ ਕੋਲ ਇੰਡੀਆ ਦੇ ਚੇਅਰਮੈਨ ਸ਼੍ਰੀ ਬੀ. ਸਾਈਰਾਮ; ਬੀ.ਸੀ.ਸੀ.ਐਲ. ਦੇ ਸੀ.ਐੱਮ.ਡੀ. ਸ਼੍ਰੀ ਮਨੋਜ ਕੁਮਾਰ ਅਗਰਵਾਲ; ਸੰਯੁਕਤ ਸਕੱਤਰ (ਕਪੜਾ ਮੰਤਰਾਲਾ) ਸ਼੍ਰੀਮਤੀ ਅਲਕਨੰਦਾ ਦਿਆਲ; ਪ੍ਰੋਜੈਕਟ ਸਲਾਹਕਾਰ (ਐੱਮ.ਓ.ਸੀ.) ਸ਼੍ਰੀ ਆਲੋਕ ਕੁਮਾਰ ਸਿੰਘ ਅਤੇ ਕੋਲਾ ਮੰਤਰਾਲਾ, ਜ਼ਿਲ੍ਹਾ ਪ੍ਰਸ਼ਾਸਨ, ਜੇ.ਆਰ.ਡੀ.ਏ., ਬੀ.ਸੀ.ਸੀ.ਐੱਲ. ਅਤੇ ਹੋਰ ਸਬੰਧਿਤ ਵਿਭਾਗਾਂ ਦੇ ਸੀਨੀਅਰ ਅਧਿਕਾਰੀ ਸ਼ਾਮਲ ਹੋਏ।

ਦੋ ਦਿਨਾਂ ਦੇ ਦੌਰੇ ਨੇ ਬੀ.ਸੀ.ਸੀ.ਐਲ. ਦੀਆਂ ਸੰਚਾਲਨ ਗਤੀਵਿਧੀਆਂ, ਆਧੁਨਿਕ ਮਾਈਨਿੰਗ ਤਕਨੀਕਾਂ, ਝਰੀਆ ਵਿੱਚ ਅੱਗ ਪ੍ਰਬੰਧਨ ਅਤੇ ਝਰੀਆ ਮਾਸਟਰ ਪਲਾਨ ਦੇ ਤਹਿਤ ਪੁਨਰਵਾਸ ਅਤੇ ਵਿਕਾਸ ਪਹਿਲਕਦਮੀਆਂ ਦੀ ਵਿਆਪਕ ਸਮੀਖਿਆ ਕਰਨ ਦਾ ਮੌਕਾ ਪ੍ਰਦਾਨ ਕੀਤਾ।

************

ਐੱਸ ਟੀ /ਏਕੇ

(Release ID: 2305876) ਵਿਜ਼ੀਟਰ ਕਾਊਂਟਰ : 7