بھارتی مسابقتی کمیشن (سی سی آئی) نے کڈز کلینک انڈیا لمیٹڈ (کے سی آئی ایل) کی جانب سے اپولو فرٹیلٹی سینٹر پرائیویٹ لمیٹڈ (اے ایف سی پی ایل) کے 100 فیصد تک ایکویٹی حصص اور اپولو اسپیشلٹی ہاسپٹلز پرائیویٹ لمیٹڈ (اے ایس ایچ پی ایل) کے 100 فیصد ایکویٹی حصص حاصل کرنے اور اس سے متعلق دیگر لین دین کی منظوری دے دی ہے۔

مجوزہ کاروباری امتزاج میں درج ذیل شامل ہیں:

1. کے سی آئی ایل کی جانب سے اے ایف سی پی ایل کے 100 فیصد تک ایکویٹی حصص اور اے ایس ایچ پی ایل کے 100 فیصد ایکویٹی حصص کا حصول (مجوزہ اپولو حصول)؛
2. کے سی آئی ایل میں ایکویٹی حصص اور اختیاری طور پر قابلِ تبدیل ڈیبینچرزکو جاری کرنے، جو مکمل طور پر گھٹائے گئے حصص کی بنیاد پر کے سی آئی ایل میں 9.9 فیصد حصص کی نمائندگی کریں گے۔ یہ حصص اپولو ہیلتھ اینڈ لائف اسٹائل لمیٹڈ (اے ایچ ایل ایل) کو مجوزہ اپولو حصول کے عوض جزوی ادائیگی کے طور پر جاری کیے جائیں گے (مجوزہ کے سی آئی ایل حصول)؛ اور
3. کے سی آئی ایل میں مخصوص ایکویٹی حصص اَروَن انویسٹمنٹس پی ٹی ای لمیٹڈ (اَروَن) کو جاری کیے جائیں گے (مجوزہ کے سی آئی ایل سرمایہ کاری)۔

(مذکورہ بالا تمام اقدامات کو مجموعی طور پر ’مجوزہ کاروباری امتزاج‘ کہا گیا ہے۔)

کے سی آئی ایل ایک سرکاری لمیٹڈ کمپنی ہے جو ’کلاؤڈ نائن‘ برانڈ کے تحت سپر اسپیشلٹی اسپتالوں کے چین کو آپریٹ کرتی ہے۔ کمپنی کی بنیادی توجہ ماں اور بچے کی نگہداشت پر ہے اور یہ زچگی، امراضِ نسواں، اطفال اور فَرٹیلٹی (تولیدی علاج)کے شعبوں میں خدمات فراہم کرتی ہے۔ اس وقت کمپنی ہندوستان کے متعدد شہروں، جن میں بنگلورو، دہلی این سی آر، ممبئی، پونے، چنئی، حیدرآباد، لکھنؤ، لدھیانہ اور چندی گڑھ شامل ہیں، میں اپنے مراکز چلا رہی ہے۔

اے ایچ ایل ایل بھی صحت کی دیکھ بھال کے شعبے میں سرگرم ہے اور بنیادی طبی نگہداشت کے کلینک اور تشخیصی خدمات فراہم کرتی ہے۔ اپولو ہاسپٹلز انٹرپرائز لمیٹڈ (اے ای ایچ ایل) کے پاس اے ایچ ایل ایل کے 100 فیصد ایکویٹی حصص ہیں۔ اے ای ایچ ایل ایک اسٹاک ایکسچینج میں درج کمپنی ہے، جس میں پروموٹر گروپ کے پاس 28.02 فیصد حصص ہیں، جبکہ باقی 71.98 فیصد حصص عوامی شیئر ہولڈرز کے پاس ہیں۔

 

اے ایف سی پی ایل اپولو گروپ کے تحت فَرٹیلٹی (تولیدی علاج)کے کلینکس کی ایک چین ہے اور اس کی مکمل ملکیت اے ایچ ایل ایل کے پاس ہے۔ یہ معاون تولیدی علاج اور تولیدی طب کے شعبے میں مہارت رکھتی ہے اور اِن وٹرو فرٹیلائزیشن (آئی وی ایف)، جنین کو منجمد کرنے، جینیاتی جانچ وغیرہ جیسی خدمات فراہم کرتی ہے۔

اے ایس ایچ پی ایل کے پاس جون 2024 تک تین کاروباری شعبے تھے، جن میں کریڈل، فرٹیلٹی اور اسپیکٹرا شامل تھے۔

********

ش ح۔ع ح   ۔رض

U-2913

(ریلیز آئی ڈی: 2305813) وزیٹر کاؤنٹر : 7