سائنس اور تکنالوجی اور ارضیاتی سائنس کے مرکزی وزیر مملکت (آزادانہ چارج)، وزیر اعظم کے دفتر، عملہ، عوامی شکایات، پنشن، ایٹمی توانائی اور خلاء کے وزیر مملکت، ڈاکٹر جتیندر سنگھ نے، گذشتہ  12 برسوں میں اُدھمپور- کٹھوا- ڈوڈا پارلیمانی حلقے کو اعلیٰ ترین ترجیح دینے کے لیے وزیر اعظم نریندر مودی کا شکریہ ادا کیا، جس کے نتیجے میں خطے کے دور افتادہ اور مشکل ترین پہاڑی علاقوں میں سڑک کنکٹیویٹی کی پائیدار توسیع  رونما ہوئی۔ انہوں نے کہا کہ اُدھمپور  نے پی ایم جی ایس وائی سڑک پروجیکٹوں میں ملک کے تین سرکردہ اضلاع کے درمیان اپنی جگہ برقرار  رکھی ہے، جس سے اس انتخابی حلقے میں دیہی کنکٹیویٹی کو دی جانے والی مسلسل ترجیح کی عکاسی ہوتی ہے۔

ڈاکٹر جتیندر سنگھ 2026-27 کے پی ایم جی ایس وائی- IV ، بیچ- I کے تحت 110 سڑک پروجیکٹوں کا سنگ بنیاد رکھنے کے بعد اظہار خیال کررہے تھے۔یہ پروجیکٹس اُدھمپور-کٹھوا-ڈوڈا-کشتواڑ خطے کے مختلف حصوں کا احاطہ کرتے ہیں۔ پروجیکٹ  کی تفصیلات کے مطابق، ان 110 سڑکوں کی مجموعی طوالت 598.455 کلو میٹر کے بقدر ہے اور ان کی منظور شدہ لاگت 1503.53 کروڑ روپے کےبقدر ہے۔ یہ پروجیکٹس کٹھوا، اُدھمپور، رامبن، ڈوڈا اور کشتواڑ اضلاع پر محیط ہیں اور توقع کی جاتی ہے کہ ان سے 46972 افراد مستفید ہوں گے۔

مرکزی وزیر نے کہا کہ پی ایم جی ایس وائی کے حالیہ اقدام کا دائرہ کار ہر موسم میں کارآمد سڑکوں کے رابطے کو آخری سرے تک اور مشکل اور دور دراز پہاڑی علاقوں میں واقع دیہاتوں اور بستیوں تک پہنچانے کے لیے حکومت کے مسلسل عزم کا مظہر ہے۔ انہوں نے کہا کہ یہ نئی سڑکیں دیہی علاقوں میں آمد و رفت کے نظام کو مزید بدل کر رکھ دیں گی اور دور دراز علاقوں میں رہنے والے لوگوں کے لیے زندگی کی آسانی اور سفر کی سہولت میں نمایاں کردار ادا کریں گی۔

ڈاکٹر جتیندر سنگھ نے کہا کہ پی ایم جی ایس وائی سڑکوں کے رابطے کی مسلسل توسیع پہاڑی علاقوں میں دیہی آمد و رفت کے منظر نامے کو بدل رہی ہے، اور ان دیہاتوں اور بستیوں تک ہر موسم میں کارآمد سڑکوں کی رسائی فراہم کر رہی ہے جہاں پہلے پہنچنا مشکل تھا۔ انہوں نے کہا کہ پی ایم جی ایس وائی کے تحت قائم کیا جانے والا سڑکوں کا یہ نیٹ ورک براہِ راست زندگی کی آسانی اور سفر کی سہولت میں معاون ثابت ہو رہا ہے، اور ساتھ ہی انتخابی حلقے کے بعید ترین حصوں میں رہنے والے لوگوں کے لیے نئے مواقع کی راہیں کھول رہا ہے۔

وزیر موصوف نے کہا کہ بزرگ شہری اور اسکول جانے والے بچے ان لوگوں میں شامل تھے جنہیں پہلے سب سے زیادہ مشکلات کا سامنا کرنا پڑتا تھا، خاص طور پر بارش کے موسم میں جب سڑکوں کی خراب حالت اکثر سفر کو مشکل بنا دیتی تھی اور بعض اوقات لوگوں کو اپنے کام کی جگہوں، اسکولوں اور دیگر ضروری مقامات تک پہنچنے سے روک دیتی تھی۔ سڑکوں کے نیٹ ورک کی یہ توسیع اب اس دیرینہ مشکل کو دور کرنے میں مدد کر رہی ہے اور ضروری خدمات اور مواقع کو دیہی برادریوں کے قریب لا رہی ہے۔

ڈاکٹر جتیندر سنگھ نے کہا کہ دور دراز کے دیہاتوں کی خواتین بھی سڑکوں کے اس نئے نیٹ ورک کے فوائد کا تجربہ کر رہی ہیں، کیونکہ بہتر سڑکیں اسکولوں، صحت کی دیکھ بھال کے مراکز، بازاروں، کام کی جگہوں اور دیگر ضروری سہولیات تک آسان رسائی فراہم کرتی ہیں۔ انہوں نے کہا کہ پہلے کے مشکل اور ناقابلِ رسائی دیہاتوں تک سڑکوں کے نیٹ ورک کی یہ توسیع، پہاڑی علاقوں میں رہنے والی خواتین اور خاندانوں کے لیے آمد و رفت کا ایک نیا نظام تخلیق کر رہی ہے، جس کے براہِ راست فوائد ان کی روزمرہ کی زندگی کو پہنچ رہے ہیں۔

وزیر موصوف نے کہا کہ ان مشکل پہاڑی علاقوں میں سڑکوں کا نیٹ ورک سیکیورٹی کے نقطۂ نظر سے بھی اہم جہت رکھتا ہے۔ ماضی میں ان میں سے بعض دور دراز اور دشوار گزار علاقے سیکیورٹی کے لحاظ سے مشکلات کا سبب بنے رہے ہیں اور عسکریت پسندوں اور دہشت گردوں کی نقل و حرکت کے لیے بھی حساس رہے ہیں۔ بہتر سڑک رابطہ ایسے علاقوں میں سیکیورٹی فورسز کی آسان اور تیز تر نقل و حرکت کو ممکن بنائے گا اور عسکریت پسندی و دہشت گردی کے خلاف کارروائیوں کے نفاذ کو مضبوط کرے گا، جبکہ اس کے ساتھ ہی وہاں رہنے والے لوگوں کے لیے ترقی کے راستے کھولے گا۔

ضلع کے حساب سے پروجیکٹوں کی تفصیلات بیان کرتے ہوئے، ڈاکٹر سنگھ نے کہا کہ کٹھوا کو 24 سڑک پروجیکٹس دیے گئے ہیں جن کی طوالت 128.925 کلو میٹر کے بقدر ہے، اور منظور شدہ لاگت307.12 کروڑ  روپے ہے۔ اُدھمپور کو 44 پروجیکٹس دیے گئے ہیں جن کی طوالت 235.040 کلو میٹر کے بقدر ہے، اور منظور شدہ لاگت تقریباً 554.90 کروڑ روپے کے بقدر ہے۔ رامبن کے پاس 13 پروجیکٹس ہیں جن کی طوالت 60.360 کلو میٹر کے بقدر ہے، اور منظور شدہ لاگت تقریباً 154.97 کروڑ روپے کے بقدر ہے، جبکہ ڈوڈا کے پاس 13 پروجیکٹس ہیں جن کی طوالت 90.180 کلو میٹر کے بقدر ہے، اور منظور شدہ لاگت تقریباً 260.66 کروڑ روپے ہے۔ کشتواڑ کے پاس 16 پروجیکٹس ہیں جن کی طوالت 83.950 کلو میٹر کے بقدر ہے، اور منظور شدہ لاگت تقریباً 224.88 کروڑ روپے کے بقدر ہے۔

ان منصوبوں کی ایک نمایاں خصوصیت بڑی تعداد میں کاموں میں سڑکوں کی تعمیر کے لیے ضائع شدہ پلاسٹک کا استعمال ہے۔ پروجیکٹ کے بیان میں خاص طور پر سڑک کے کئی پیکجوں میں ضائع شدہ پلاسٹک کے استعمال کو ریکارڈ کیا گیا ہے، جو دیہی رابطوں کو مضبوط بنانے کے مقصد کو سڑکوں کی تعمیر کے زیادہ پائیدار اور ماحول دوست طریقوں کے ساتھ جوڑتا ہے۔

ڈاکٹر جتیندر سنگھ نے کہا کہ انتخابی حلقے میں پی ایم جی ایس وائی سڑکوں کے رابطے کی مسلسل توسیع حکومت کی اس پائیدار توجہ کی عکاسی کرتی ہے جس کا مقصد یہ یقینی بنانا ہے کہ ترقی کے فوائد آخری سرے تک اور بعید ترین بستیوں تک پہنچیں۔ انہوں نے کہا کہ منصوبوں کا حالیہ پیکیج پارلیمانی حلقے اور اس سے ملحقہ پہاڑی علاقوں میں سڑکوں کے نیٹ ورک کو مزید مضبوط کرے گا۔

رواں سال مئی میں، انہوں نے ادھم پور-کتھوا-ڈوڈا انتخابی حلقے کے لیے جموں و کشمیر کے کل پی ایم جی ایس وائی فنڈ کا تقریباً 43 فیصد مختص کرنے پر وزیر اعظم مودی کا شکریہ بھی ادا کیا تھا، جس میں یونین ٹریٹری کے کل 3,566 کروڑ روپے کے فنڈز میں سے 1,524 کروڑ روپے اسی حلقے کے لیے مخصوص کیے گئے تھے۔

انہوں نے کہا کہ دیہی سڑکوں پر مسلسل توجہ ایک ایسے انتخابی حلقے میں خاص طور پر بہت معنی خیز ہو گئی ہے جہاں بڑی تعداد میں دیہات دشوار گزار، دور دراز اور جغرافیائی طور پر مشکل پہاڑی علاقوں میں واقع ہیں۔ بہتر سڑکیں نہ صرف سفر کے وقت اور مشکلات کو کم کر رہی ہیں بلکہ تعلیم، صحت کی دیکھ بھال، بازاروں، ملازمتوں اور دیگر ضروری خدمات تک رسائی کو بھی مضبوط بنا رہی ہیں۔

وزیر موصوف نے کہا کہ گزشتہ دہائی کے دوران رابطوں میں آنے والی اس تبدیلی نے یہ ثابت کیا ہے کہ کس طرح بنیادی ڈھانچہ سماجی اور اقتصادی طور پر بااختیار بنانے کا ایک ذریعہ بن سکتا ہے، خاص طور پر دور دراز علاقوں میں رہنے والی برادریوں کے لیے۔ ہر نئی سڑک کے ایک اور دور دراز بستی تک پہنچنے کے ساتھ ہی، ان برادریوں اور ترقی کے مرکزی دھارے کے درمیان کا فاصلہ کم ہو رہا ہے۔

ڈاکٹر جتیندر سنگھ نے کہا کہ حکومت کی توجہ آخری سرے تک رابطوں کو مضبوط بنانے پر مرکوز رہے گی، تاکہ یہ یقینی بنایا جا سکے کہ مشکل جغرافیائی حالات ترقی، نقل و حرکت یا مواقع تک رسائی میں رکاوٹ نہ بنیں۔ انہوں نے کہا کہ پی ایم جی ایس وائی کا پھیلتا ہوا نیٹ ورک عوام کی ترقیاتی ضروریات اور خطے کے تزویراتی تقاضوں دونوں کو پورا کرتا رہے گا۔

جموں و کشمیر کے نائب وزیر اعلیٰ، جناب سریندر چودھری نے اپنے خطاب میں کہا کہ جموں و کشمیر مضبوطی سے ترقی کی راہ پر گامزن ہے اور جاری تبدیلی میں اپنا تعاون دینے پر اطمینان کا اظہار کیا۔ انہوں نے کہا کہ عوام کی جانب سے اٹھائے گئے خدشات اور مسائل کو مناسب طریقے سے حل کیا جائے گا اور یقین دلایا کہ جموں و کشمیر کی حکومت اس بات کو یقینی بنانے کے لیے پرعزم ہے کہ ترقی مرکزی زیرِ انتظام علاقے کے ہر حصے تک پہنچے۔

نائب وزیر اعلیٰ نے کہا کہ سڑک کے منصوبوں کی تکمیل میں مصروف ٹھیکیداروں کے لیے لازمی ہے کہ وہ مقررہ معیار کے مطابق اپنا کام انجام دیں اور واضح کیا کہ تعمیرات کے معیار پر کوئی سمجھوتہ نہیں کیا جائے گا۔ انہوں نے کہا کہ بولی لگانے اور ٹینڈرنگ کے عمل کو اعلیٰ معیارات کے مطابق انجام دیا جا رہا ہے اور کاموں کی تکمیل میں کسی بھی قسم کی خامی یا کوتاہی کی صورت میں سخت کارروائی کی جائے گی۔

اس موقع پر موجود اراکین اسمبلی میں پون کمار گپتا، بلونت سنگھ منکوٹیا، راجیو جسروٹیا، سجاد شاہین، ڈاکٹر سنیل بھاردواج، ارجن سنگھ راجو، پیارے لال شرما، رنبیر سنگھ پٹھانیہ، درشن کمار اور ستیش کمار شرما شامل تھے۔ ایم ایل اے شکتی پریہار نے اس تقریب میں ورچوئل شرکت کی جبکہ قائدِ حزبِ اختلاف سنیل شرما نے اپنے بھیجے گئے ایک ویڈیو پیغام کے ذریعے سامعین سے خطاب کیا۔

قانون سازوں نے اپنے اپنے علاقوں سے متعلق مختلف مسائل اور خدشات اٹھائے، خاص طور پر وہ مسائل جو جنگلات کی منظوری اور ٹھیکیداروں کی جانب سے کی جانے والی کوتاہیوں سے متعلق تھے۔

ڈاکٹر جتیندر سنگھ اور نائب وزیر اعلیٰ سریندر چودھری نے قانون سازوں کو یقین دلایا کہ ان کی طرف سے اٹھائے گئے مسائل اور خدشات کو فوری حل کے لیے اٹھایا جائے گا اور متعلقہ علاقوں میں ترقیاتی کاموں کو تیز کرنے اور رابطوں کو بہتر بنانے کے لیے ضروری اقدامات کیے جائیں گے۔

**********

 (ش ح –ا ب ن)

U.No:2759