جغرافیائی لحاظ سے سب سے بڑے اور متنوع مطالعے میں سے ایک نے پایا ہے کہ جنوبی ایشیائی باشندوں کے گٹ مائکرو بایوم دنیا کے دوسرے حصوں میں پائے جانے والے مائیکروبائیومز سے مختلف ہیں اور مقامی ثقافت، خوراک، جغرافیہ اور طرز زندگی سے متاثر ہیں۔

یہ نتائج جنوبی ایشیائی آبادیوں کے لیے مائکرو بایوم پر مبنی تشخیص، ذاتی نوعیت کی غذائیت اور صحت کی نگہداشت، بالخصوص طرزِ زندگی سے متعلق بیماریوں کے شعبے میں، ایک اہم سائنسی بنیاد فراہم کرتے ہیں۔

جنوبی ایشیا تیزی سے شہری کاری کے مرحلے سے گزر رہا ہے، جبکہ اسی دوران موٹاپے، ذیابیطس اور دیگر قلبی-میٹابولک عوارض میں بھی تیزی سے اضافہ ہو رہا ہے۔ اگرچہ شہری کاری گٹ مائکرو بایوم کو متاثر کرنے کے لیے جانی جاتی ہے، تاہم یہ واضح نہیں تھا کہ آیا یہ تبدیلیاں مختلف جنوبی ایشیائی آبادیوں میں یکساں طور پر رونما ہوتی ہیں یا نہیں۔

اب تک مائکرو بایوم سے متعلق زیادہ تر تحقیق یورپی اور شمالی امریکی آبادیوں پر کی گئی ہے، جس کے نتیجے میں دنیا کی تقریباً ایک چوتھائی آبادی پر مشتمل جنوبی ایشیا کی نمائندگی اس تحقیق میں بڑی حد تک کم رہی ہے۔

محکمہ سائنس و ٹیکنالوجی (ڈی ایس ٹی) کے ایک خودمختار ادارے، بیربل ساہنی انسٹی ٹیوٹ آف پیلیو سائنسز (بی ایس آئی پی) کے سائنس دانوں نے شکاگو یونیورسٹی اور ہندوستان، سری لنکا اور امریکہ کے دیگر تعاون کرنے والے اداروں کے ساتھ مل کر ایک مطالعہ کیا، تاکہ یہ سمجھا جا سکے کہ بدلتے ہوئے طرزِ زندگی مختلف ثقافتی، غذائی اور ماحولیاتی حالات میں آنتوں کے مائکرو بایوم کو کس طرح متاثر کرتے ہیں، اور جنوبی ایشیا کے تنوع کی نمائندگی کرنے والا ایک جامع مائکرو بایوم وسیلہ تیار کیا جا سکے۔

شکل 1۔ ہندوستان اور سری لنکا میں نمونے جمع کرنے کے مقامات

محققین نے دریافت کیا کہ ہر کمیونٹی کے گٹ مائکرو بایوم میں ہونے والی تبدیلیاں مقامی ثقافت، غذا، جغرافیہ اور طرزِ زندگی سے تشکیل پانے والی اپنی منفرد مائکرو بایوم سمت کی پیروی کرتی ہیں۔

محققین نے جنوبی ایشیا کی 10 کمیونٹیز سے تعلق رکھنے والے 575 صحت مند بالغ افراد سے غذا، طرزِ زندگی اور صحت سے متعلق معلومات کے ساتھ ساتھ پاخانے کے نمونے بھی جمع کیے۔

بی ایس آئی پی کے سائنس دانوں کی جانب سے ہندوستان میں پہلی بار تیار کیے گئے ساؤتھ ایشین مائکرو بایوم اَرے (سمبر) کا استعمال کرتے ہوئے، ہندوستان اور سری لنکا کی ثقافتی اور جغرافیائی اعتبار سے مختلف 10 کمیونٹیز سے تعلق رکھنے والے 575 بالغ افراد کے آنتوں کے مائکرو بایوم کا تجزیہ کیا گیا۔

گٹ مائکرو بایوم کی خصوصیت بیکٹیریا کے 16 ایس آر آر این اے جینز کی ہائی تھرو پٹ ڈی این اے سیکوینسنگ کے ذریعے متعین کی گئی، جس کے بعد جدید بائیوانفارمیٹک تجزیے کیے گئے۔ محققین نے ہر کمیونٹی میں دیہی اور شہری افراد کا موازنہ کیا اور جنوبی ایشیائی مائکرو بایوم کا عالمی ڈیٹا سیٹس سے بھی تقابلی جائزہ لیا۔

اس منصوبے میں ہندوستان، سری لنکا اور امریکہ کے سائنس دانوں کے درمیان ایک بڑے بین الاقوامی تعاون شامل تھا، جس کی قیادت ڈاکٹر نیرج رائے، گروپ ہیڈ، قدیم ڈی این اے، بیربل ساہنی انسٹی ٹیوٹ آف پیلیو سائنسز، لکھنؤ نے کی۔ فیلڈ ٹیموں نے شرکاء کی بھرتی اور حیاتیاتی نمونوں اور طرزِ زندگی سے متعلق معلومات جمع کرنے کے لیے ہندوستان اور سری لنکا کی مقامی کمیونٹیز کے ساتھ مل کر کام کیا۔

پورے مطالعے میں کمیونٹی سے وابستہ نقطۂ نظر اختیار کیا گیا، جس کے تحت محققین نے شریک کمیونٹیز کے ساتھ مطالعے کے نتائج کا اشتراک کیا۔ اس کے بعد گٹ مائکروبیل تنوع کی خصوصیت اور جغرافیہ، غذا، شہری کاری اور میٹابولک صحت کے ساتھ اس کے تعلق کی نشاندہی کے لیے لیبارٹری تجزیے، ڈی این اے سیکوینسنگ اور کمپیوٹیشنل طریقے استعمال کیے گئے۔

اس نقطۂ نظر نے شریا ایل. رام چندرن، ناگارجن پاسوپولیٹی، رچرڈ جے. عبدل، نیرج رائے اور مانسا راگھون کی قیادت میں کام کرنے والی ٹیم کو کمیونٹی کے مخصوص مائکروبیل سگنیچرز کے ساتھ ساتھ شہری کاری اور میٹابولک صحت سے وابستہ عمومی مائکروبیل تبدیلیوں کی بھی نشاندہی کرنے کے قابل بنایا۔

جریدے گٹ مائکروبس میں شائع ہونے والی اس تحقیق میں عالمی مائکرو بایوم تحقیق میں کم نمائندگی رکھنے والی آبادیوں کو شامل کرنے کی اہمیت اجاگر کی گئی ہے۔ یہ ہندوستان میں صحت مند افراد سے تیار کیا جانے والا پہلا بنیادی گٹ مائکرو بایوم ڈیٹا ہے، جس کے اہم طبی اور ارتقائی مضمرات ہیں۔

یہ ظاہر کرتے ہوئے کہ مختلف کمیونٹیز شہری کاری کے لیے مختلف انداز میں ردِعمل ظاہر کرتی ہیں، مطالعے سے معلوم ہوتا ہے کہ مستقبل میں مائکرو بایوم پر مبنی علاج صرف مغربی آبادیوں سے حاصل کردہ طریقوں کو اپنانے کے بجائے علاقائی آبادیوں کی مخصوص ضروریات کے مطابق تیار کیے جانے چاہییں۔ سمبروسیلہ ذیابیطس، موٹاپے، قلبی امراض اور طرزِ زندگی سے متعلق دیگر بیماریوں پر مستقبل کی تحقیق میں بھی معاون ثابت ہوگا، جو پورے جنوبی ایشیا میں تیزی سے بڑھ رہی ہیں۔

اشاعت کا لنک: ڈی او آئی : 10.64898/2026.01.22.701183. 

***

UR-2594

(ش ح۔اس ک  )

 

(ریلیز آئی ڈی: 2303349) وزیٹر کاؤنٹر : 9