بھارت سرکار کی کارپوریٹ امور کی وزارت کے تحت ایک خودمختار ادارے، انڈین انسٹی ٹیوٹ آف کارپوریٹ افیئرز (آئی آئی سی اے) نے 21 اگست 2026 کو آئی آئی سی اے کے مصدقہ کارپوریٹ سماجی ذمہ داری پیشہ ورانہ پروگرام کے 11ویں بیچ کے افتتاحی اجلاس کا انعقاد کیا۔ آن لائن منعقد ہونے والے اس اجلاس میں مرکزی سرکاری شعبے کے اداروں، کارپوریٹ اداروں، سرکاری اداروں، تعلیمی شعبے اور سول سوسائٹی سے تعلق رکھنے والے 45 پیشہ ور افراد نے شرکت کی۔

اس اجلاس میں آئی آئی سی اے کے ڈائریکٹر جنرل اور چیف ایگزیکٹو آفیسر جناب گیانیشور کمار سنگھ نے شرکت کی اور استقبالیہ خطاب کیا۔ اس کے بعد معزز شخصیات محترمہ روپندر برار، ایڈیشنل سکریٹری، وزارتِ کوئلہ، اور جناب لیوکس ایل. کمسوان، جوائنٹ سکریٹری، وزارت خزانہ کے تحت  سرکاری ادارے کا محکمہ نے خصوصی خطابات کیے۔

اپنے استقبالیہ خطاب میں آئی آئی سی اے کے ڈائریکٹر جنرل اور چیف ایگزیکٹو آفیسر جناب گیانیشور کمار سنگھ نے اس بات پر زور دیا کہ کارپوریٹ سماجی ذمہ داری کو محض اخراجات تک محدود رکھنے کے بجائے اس کے اثرات، نتائج اور برادریوں کے لیے قدر میں اضافے پر توجہ مرکوز کرنی چاہیے۔ پارلیمنٹ کے سامنے پیش کیے گئے اعداد و شمار کا حوالہ دیتے ہوئے انہوں نے بتایا کہ مالی سال 24-2023 میں بھارت میں کمپنیوں کی جانب سے کارپوریٹ سماجی ذمہ داری کے تحت 34,908.75 کروڑ روپے خرچ کیے گئے، جس کے نتیجے میں مالی سال 20-2019 سے 24-2023 تک پانچ برسوں کے دوران مجموعی کارپوریٹ سماجی ذمہ داری اخراجات 1,44,159 کروڑ روپے سے تجاوز کر گئے۔ انہوں نے مزید کہا کہ شیڈول 7 کے تحت شامل کم استعمال ہونے والے شعبوں، جن میں خواتین کو بااختیار بنانا، اختراع اور فنون و ثقافت شامل ہیں، پر زیادہ توجہ دینے کی ضرورت ہے۔ انہوں نے کارپوریٹ اداروں، عمل درآمد کرنے والی ایجنسیوں اور برادریوں کے درمیان شفافیت کو مضبوط بنانے میں ٹیکنالوجی، اعداد و شمار اور کارپوریٹ سماجی ذمہ داری ایکسچینج پورٹل جیسے پلیٹ فارم کے کردار کو بھی اجاگر کیا۔

انہوں نے مزید کہا کہ اس تبدیلی کے لیے عمل درآمد کرنے والی ایجنسیوں کی صلاحیت کو مضبوط بنانا بنیادی اہمیت رکھتا ہے، کیونکہ زمینی سطح پر کام کے معیار ہی بالآخر یہ طے کرتے ہیں کہ کارپوریٹ سماجی ذمہ داری کے تحت کیے جانے والے اخراجات دیرپا اثرات میں تبدیل ہوتے ہیں یا نہیں۔ انہوں نے کہا کہ تربیت یافتہ کارپوریٹ سماجی ذمہ داری پیشہ ور افراد کی ایک مضبوط افرادی قوت تیار کرنا، جسے یہ پروگرام بھی فروغ دینے کی کوشش کر رہا ہے، اس شعبے کے پورے ماحولیاتی نظام میں اس نظم و ضبط کو مستحکم کرنے کے لیے نہایت ضروری ہے۔

وزارتِ کوئلہ کی ایڈیشنل سکریٹری محترمہ روپندر برار نے کوئلہ شعبے کے تجربات کا حوالہ دیتے ہوئے اس بات پر زور دیا کہ بامعنی کارپوریٹ سماجی ذمہ داری کا آغاز برادریوں کی ضروریات کو سمجھنے اور ان کے مسائل سننے سے ہوتا ہے اور اس کا تسلسل مؤثر منصوبہ بندی، قابل عمل درآمدی شراکت داروں اور زمینی سطح پر نتائج کی سخت نگرانی کے ذریعے برقرار رہتا ہے۔ انہوں نے کہا کہ کارپوریٹ سماجی ذمہ داری کی کامیابی کا اندازہ اس ٹھوس تبدیلی کی بنیاد پر کیا جانا چاہیے جو اس سے برادریوں کی زندگیوں میں آتی ہے۔ انہوں نے عمل درآمد کرنے والی ایجنسیوں کی صلاحیت کو مضبوط بنانے اور سماجی آڈٹ کے زیادہ مؤثر نظام کی ضرورت پر بھی زور دیا۔ محترمہ برار نے شعبے کے لیے ایک جامع کارپوریٹ سماجی ذمہ داری فریم ورک تیار کرنے کے سلسلے میں وزارتِ کوئلہ کے ساتھ آئی آئی سی اے کے حالیہ تعاون کو بھی سراہا، جس میں قابل پیمائش نتائج اور اثرات کو شامل کیا گیا ہے۔

وزارتِ خزانہ کے محکمہ سرکاری ادارے کے جوائنٹ سکریٹری جناب لیوکس ایل. کمسوان نے بھارت میں کارپوریٹ سماجی ذمہ داری کے سفر میں مرکزی سرکاری شعبے کے اداروں کے اہم کردار کو اجاگر کیا۔ انہوں نے سماجی ترقی اور قومی ترجیحات میں ان اداروں کی نمایاں خدمات کا ذکر کرتے ہوئے کہا کہ محکمہ سرکاری ادارے مرکزی سرکاری شعبے کے اداروں کی کارپوریٹ سماجی ذمہ داری کی سرگرمیوں کی رہنمائی سالانہ موضوعاتی ترجیحات، سرکاری پروگراموں کے ساتھ ہم آہنگی اور ضلعی انتظامیہ، غیر سرکاری تنظیموں اور تعلیمی اداروں کے ساتھ تعاون کے ذریعے کر رہا ہے۔ انہوں نے بتایا کہ مرکزی سرکاری شعبے کے ادارے اب کارپوریٹ سماجی ذمہ داری کے لیے الگ تھلگ اور یک وقتی اقدامات کے بجائے تزویراتی اور موضوعاتی طریقۂ کار کو تیزی سے اختیار کر رہے ہیں۔

جناب کمسوان نے کہا کہ سرکاری شعبے کی کارپوریٹ سماجی ذمہ داری وسیع تر ماحولیاتی نظام کے لیے ایک مثالی نمونہ بننے کی صلاحیت رکھتی ہے۔ انہوں نے کارپوریٹ سماجی ذمہ داری کو وسیع تر پائیداری اور ماحولیاتی، سماجی و انتظامی (ای ایس جی) پہلوؤں کے ساتھ زیادہ مضبوطی سے مربوط کرنے کی اہمیت پر زور دیا اور کہا کہ اس مقصد کے لیے صلاحیت سازی کے ساتھ ساتھ منصوبہ بندی اور نگرانی میں ٹیکنالوجی کے زیادہ سے زیادہ استعمال کو فروغ دینا ضروری ہے۔

آئی آئی سی اے کے اسکول آف بزنس انوائرمنٹ (ایس بی ای) کی سربراہ اور پروگرام ڈائریکٹر ڈاکٹر گریما ددھیچ نے نو ماہ پر مشتمل سرٹیفیکیشن پروگرام کے خدوخال بیان کیے۔ یہ پروگرام ماہرینِ تعلیم، پالیسی سازوں اور عملی میدان کے ماہرین پر مشتمل بین شعبہ جاتی فیکلٹی کے ذریعے ہفتہ وار براہِ راست آن لائن سیشنز کے تحت منعقد کیا جاتا ہے۔ پروگرام کو سات ماڈیولز میں تقسیم کیا گیا ہے، جن میں کارپوریٹ سماجی ذمہ داری کا قانونی و ضابطہ جاتی فریم ورک، حکمرانی، منصوبہ بندی، اثرات کا جائزہ، رپورٹنگ اور ای ایس جی اور سوشل اسٹاک ایکسچینج جیسے ابھرتے ہوئے شعبے شامل ہیں۔

آئی سی پی سی ایس آر کے 11ویں بیچ کے افتتاحی اجلاس نے کارپوریٹ سماجی ذمہ داری کے ایسے پیشہ ور افراد کی ایک مضبوط برادری تشکیل دینے کے لیے آئی آئی سی اے کی مسلسل کوششوں کی توثیق کی، جو شفاف، جواب دہ اور نتائج پر مبنی اقدامات کی منصوبہ بندی اور عمل درآمد کی صلاحیت رکھتے ہوں اور بھارت کے کارپوریٹ سماجی ذمہ داری کے وسیع تر ایکو نظام کو مضبوط بنانے میں مؤثر کردار ادا کر سکیں۔

******

 

 

ش ح۔ ت ف ۔ ا ک م                                                                    

U.NO. 2580

 

(ریلیز آئی ڈی: 2303235) وزیٹر کاؤنٹر : 10