انڈیا اے آئی مشن کے تحت قومی ڈیٹا سیٹس اور ماڈلز کے پلیٹ فارم 'اے آئی کوش'  پر آج نئی دہلی کے انڈیا ہیبیٹیٹ سینٹر میں ایک ورکشاپ کا انعقاد کیا گیا۔ اس ورکشاپ میں حکومت، صنعت ، تعلیمی اداروں اور اسٹارٹ اپ ایکوسسٹم کے نمائندوں نے شرکت کی تاکہ آرٹیفیشل انٹیلیجنس کے لیے بھارت کے ڈیٹا کی پوشیدہ صلاحیتوں کو اجاگر کرنے کے اقدامات پر غور و خوض کیا جا سکے۔

انڈیا اے آئی مشن کے ڈائریکٹر جناب محمد وائی سفیر اللہ کے نے اے آئی کوش متعارف کرایا، جس کے بعد سی او او جناب سدیپ شریواستو نے دن کا ایجنڈا پیش کیا۔ اس تقریب میں شرکاء کو اے آئی مشن کی حکمت عملی اور مستقبل کے منصوبوں سے آگاہ کیا گیا، جس کا مقصد تکنیکی ترقی کو فروغ دینا ہے۔

’’قومی سرمائے کے طور پر ڈیٹا: خود مختار اے آئی کے لیے بھارت کی ناگزیر ضرورت‘‘ کے موضوع پر خطاب کرتے ہوئے، انڈیا اے آئی مشن کے سی ای او جناب سوربھ وجے نے بھارت کے خود مختار اے آئی کے عزائم کے لیے ڈیٹا کی اسٹریٹجک اہمیت اور اختراع و قومی ترقی کے لیے ملک کے ڈیٹا کے اثاثوں کی قدر کو بروئے کار لانے کی ضرورت پر زور دیا۔

اے آئی کوش وہ پلیٹ فارم ہے جو بھارت نے اس پورے نظام کو فراہم کیا ہے۔ اگر ہمیں دنیا کے بہترین اداروں یا ممالک کا مقابلہ کرنا ہے، تو اس اقدام کے لیے ہماری اجتماعی ملکیت ہی اسے عالمی معیار تک لے جائے گی۔

- انڈیا اے آئی مشن کے سی ای او، جناب سوربھ وجے

ورکشاپ کا باضابطہ افتتاح شماریات اور پروگرام کے نفاذ کی وزارت (ایم او ایس پی آئی) کے سکریٹری ڈاکٹر سوربھ گرگ نے کیا، جنہوں نے بھارت کے ڈیٹا کے نظام کو مضبوط بنانے اور ابھرتی ہوئی اے آئی کی صلاحیتوں کو فروغ دینے کے لیے ڈیٹا کے ذمہ دارانہ استعمال کو یقینی بنانے کی اہمیت پر روشنی ڈالی۔

سب سے بڑا اور فیصلہ کن چیلنج جسے ہم انڈیا اے آئی مشن کے ساتھ مل کر حل کر رہے ہیں، یہ یقینی بنانا ہے کہ ڈیٹا تمام وزارتوں میں آسانی سے تلاش کے قابل، قابلِ فہم، باہم مربوط اور محفوظ طریقے سے قابلِ رسائی ہو۔

- شماریات اور پروگراموں کے نفاذ کی وزارت کے سکریٹری، ڈاکٹر سوربھ گرگ

اس کے بعد ’’اے آئی کوش کا جائزہ: موجودہ اور مستقبل کا تناظر‘‘ کے موضوع پر ایک پریزنٹیشن پیش کی گئی، جسے انڈیا اے آئی مشن کی جوائنٹ ڈائریکٹر محترمہ شیکھا ڈاہیا اور انڈیا اے آئی مشن کے جنرل منیجر جناب سوادیپ سنگھ نے مشترکہ طور پر پیش کیا۔

ڈیٹا گورننس اور شیئرنگ پر غور و خوض

"پہلا سیشن، جس کا عنوان 'فکری قیادت: بڑے پیمانے پر اے آئی ڈیٹا کو بروئے کار لانا' تھا، اس میں صنعت اور تعلیمی دنیا کے ڈیٹا اور اے آئی ماہرین بشمول گوگل ڈیپ مائنڈ، یو آئی ڈی اے آئی، ورلڈ بینک، آئی آئی ٹی جودھپور، ایک اسٹیپ اور  CoRover.ai کے نمائندوں کو ایک پینل ڈسکشن کے لیے اکٹھا کیا گیا۔ اس بحث کا مقصد ڈیٹا کے قانونی اشتراک، پرائیویسی کو برقرار رکھتے ہوئے اس کے استعمال، اور ڈیٹا کی مخصوص کیٹیگریز کو شیئر کرنے کے حق اور مخالفت میں دلائل پر غور کرنا تھا۔ اس سیشن کی نظامت گیٹس فاؤنڈیشن کے ڈیجیٹل اور اے آئی کے ڈپٹی ڈائریکٹر جناب سہیل بیدانی نے کی، اور سیشن کا اختتام حاضرین کے ساتھ کھلی گفتگو پر ہوا۔

اس سیشن کے بعد تین مختصر کلیدی خطابات ہوئے: نیشنل ای-گورننس ڈویژن (این ای جی ڈی) کے سی ای او جناب نند کمار نے ’حکمرانی میں اے آئی کے لیے ڈیٹا کو بروئے کار لانا‘ کے موضوع پر، یو آئی ڈی اے آئی کی ڈپٹی ڈائریکٹر جنرل محترمہ تنوشری دیب برما نے ’ڈیجیٹل پبلک گڈز کے لیے ڈیٹا کی دستیابی کو وسعت دینا‘ کے موضوع پر، اور سوکیٹ اے آئی کے بانی اور سی ای او جناب ابھیشیک اوپر وال نے ’اوپن ڈیٹا ایکوسسٹم کی ضروریات‘ کے موضوع پر خطاب کیا۔

اے آئی بلڈرس کی ضرورت کو سمجھنا

دوسرا سیشن، جس کا عنوان ’ڈیولپر ایکوسسٹم کی ضروریات‘ تھا، اس میں ماڈل بنانے والوں، شعبہ جاتی اختراع کاروں اور ڈیٹا اکٹھا کرنے والوں کو ایک جگہ اکٹھا کیا گیا تاکہ بھارت کے مخصوص حالات اور تناظر کے مطابق اے آئی ایپلی کیشنز اور بنیادی ماڈلز تیار کرنے کے لیے درکار ڈیٹا سیٹس، پلیٹ فارمز اور ڈیٹا آرکیٹیکچر پر غور و خوض کیا جا سکے۔ اس سیشن کی نظامت پی ڈبلیو سی کے پارٹنر ڈاکٹر سنتوش مشرا نے کی، اور سیشن کا اختتام حاضرین کے ساتھ کھلی گفتگو پر ہوا۔

شعبہ جاتی عمیق مطالعہ: ڈیٹا سے لے کر استعمال کے معاملات تک

دوپہر کے وقت، مندوبین صحت اور لائف سائنسز؛ زراعت اور ذریعہ معاش؛ اور تعلیم، سائنس اور ٹیکنالوجی پر مبنی تین متوازی گول میز (راؤنڈ ٹیبل) مباحثوں میں تقسیم ہو گئے۔ ہر مباحثے کا آغاز صبح کے سیشنز سے حاصل ہونے والے اہم نکات اور ابھرنے والے سوالات پر ایک مختصر پریزنٹیشن کے ساتھ ہوا۔

ان تینوں گول میز مباحثوں کے دوران، شرکاء نے ترجیحی مواقع، انہیں عملی جامہ پہنانے کے لیے درکار ڈیٹا سیٹس، ڈیٹا کے محافظوں کو درپیش اہم چیلنجز، اور ذمہ دارانہ طریقے سے ڈیٹا کے اشتراک کو ممکن بنانے کے لیے ممکنہ طریقہ کار کی نشان دہی کی۔

بھارت کے اے آئی اور ڈیجیٹل عوامی بنیادی ڈھانچہ ایکو سسٹم کو مضبوط کرنے کے لیے مفاہمتی عرضداشتیں

ورکشاپ کے ایک حصے کے طور پر، انڈیا اے آئی، نیشنل ای-گورننس ڈویژن (این ای جی ڈی) اور سینٹر فار ڈیجیٹل پبلک انفراسٹرکچر (سی ڈی پی آئی) نے انٹرنیشنل انسٹی ٹیوٹ آف انفارمیشن ٹیکنالوجی، بنگلورو (آئی آئی آئی ٹی - بی) کے تعاون سے بھارت کے اے آئی اور ڈیجیٹل پبلک انفراسٹرکچر کے نظام کو مضبوط بنانے کے لیے ایک مفاہمتی عرضداشت پر دستخط کیے۔ یہ شراکت داری انڈیا اے آئی اور این ای جی ڈی کو تکنیکی، آرکیٹیکچرل، پالیسی اور علمی مدد فراہم کرے گی، جس میں بڑے پیمانے پر عوام کے لیے اے آئی سے لیس گورننس سلوشنز تیار کرنا اور اے آئی کوش پر اے آئی کے لیے تیار ڈیٹا سیٹس، ماڈلز اور دیگر وسائل کے لیے بلا تعطل اور محفوظ ڈیٹا کے تبادلے کو ممکن بنانا شامل ہے۔

یہ مفاہمتی عرضداشت بھارت کے اے آئی اور ڈی پی آئی کے نظام کو فروغ دینے کے لیے معلومات کے تبادلے، ایکوسسٹم کی شمولیت اور فریم ورکس، ٹیمپلیٹس، ڈیش بورڈز، پروٹوٹائپس اور ٹیسٹنگ ماحول کی تیاری میں بھی سہولت فراہم کرے گی۔

بھارت کے اے آئی مستقبل کی جانب تعاون کو آگے بڑھانے کے لیے انڈیا اے آئی مشن اور ایک اسٹیپ فاؤنڈیشن کے مابین ایک دوسرے مفاہمتی عرضداشت(ایم او یو) پر دستخط کیے گئے۔ اس معاہدے پر انڈیا اے آئی مشن کے سی او او جناب سدیپ شریواستو اور ایک اسٹیپ فاؤنڈیشن کے سی او او جناب جگدیش بابو نے دستخط کیے۔

اس شراکت داری کا مقصد اجتماعی ذہانت، کم لاگت اور بڑے پیمانے پر کام کرنے والے اے آئی آپریٹنگ سسٹمز، اوپن گیٹ ماڈلز، پلیٹ فارمز اور سلوشنز کو فروغ دینا ہے، جو بڑے پیمانے پر سب کے لیے قابلِ رسائی اور اثر انگیز اے آئی اختراع کو ممکن بنانے کے لیے پورے نظام کی صلاحیتوں کو ایک جگہ اکٹھا کرتے ہیں۔

عمل پر مبنی ڈیٹا ایکو سسٹم کی جانب

ورکشاپ کا اختتام ایک جائزہ سیشن کے ساتھ ہوا جس میں ہر بریک آؤٹ گروپ کے ناظمین نے ہونے والی گفتگو کا خلاصہ پیش کیا اور مستقبل کے اقدامات تجویز کیے۔ آنے والے وقت میں جن اہم شعبوں پر کام کرنے کے لیے نشان دہی کی گئی ان میں اعلیٰ قدر والے ڈیٹا سیٹس کو ترجیح دینا، ڈیٹا کی ہم آہنگی کو مضبوط بنانا، پرائیویسی کو برقرار رکھنے والے تبادلے کی صلاحیتوں کو تیار کرنا، ڈیٹا کے نگرانوں کے خدشات کو دور کرنا، اور اے آئی کوش پر شامل کرنے کے لیے ڈیٹا اسٹریمز کی شناخت کرنا شامل تھا۔

اجلاس کا کلیدی خطاب پیش کرتے ہوئے، الیکٹرانکس اور اطلاعاتی تکنالوجی کی وزارت(ایم ای آئی ٹی وائی) کے سکریٹری جناب ایس کرشنن نے بھارت کے اے آئی عزائم کو آگے بڑھانے کے لیے ڈیٹا کے ذمہ دارانہ اور اثر انگیز استعمال کی خاطر ایک سازگار نظام کی تعمیر کی اہمیت پر روشنی ڈالی۔

"کسی بھی ٹیکنالوجی کا سب سے اہم پہلو معاشرے پر اس کا پڑنے والا اثر ہے، یہ کس طرح زندگی کے معیار کو بہتر بناتی ہے، اور ملک کے عوام کو کیا پیش کرتی ہے۔ بھارت کے لیے، یہ واقعی مصنوعی ذہانت جیسی ایک وسیع اور ہر شعبے پر محیط ٹیکنالوجی کا فائدہ اٹھانے کا ایک بہترین موقع ہے تاکہ یہ یقینی بنایا جا سکے کہ ملک 2047 تک 'وکست بھارت' بننے کی راہ پر مضبوطی سے گامزن ہے۔"

- الیکٹرانکس اور اطلاعاتی تکنالوجی کی وزارت کے سکریٹری، جناب ایس کرشنن

یہ ورکشاپ بھارت کے ڈیٹا کے نظام کو مضبوط بنانے اور بڑے پیمانے پر اے آئی اختراع کو فروغ دینے کی خاطر ڈیٹا کے نگرانوں، ٹیکنالوجی ڈیولپرز اور اداروں کے مابین باہمی شراکت داری اور شمولیت کو بڑھانے کی طرف ایک اہم قدم ہے۔

اے آئی کوش کے بارے میں

انڈیا اے آئی مشن کے تحت 'اے آئی کوش' ڈیٹا سیٹس، اے آئی ماڈلز اور متعلقہ وسائل کے لیے ایک قومی پلیٹ فارم ہے، جسے بھارت کے اے آئی نظام کے لیے اے آئی کے لیے تیار وسائل کی آسان تلاش، رسائی اور ذمہ دارانہ استعمال کو ممکن بنانے کے لیے ڈیزائن کیا گیا ہے۔ اے آئی کوش پر اس وقت 15,000 سے زائد ڈیٹا سیٹس، 300 اے آئی ماڈلز اور 30 ٹول کٹس دستیاب ہیں، جو محققین، اسٹارٹ اپس، ڈیولپرز اور طلبہ کو قابلِ اعتماد قومی وسائل کا استعمال کرتے ہوئے اے آئی سلوشنز تیار کرنے کے قابل بناتے ہیں۔

انڈیا اے آئی مشن کے بارے میں

الیکٹرانکس اور اطلاعاتی تکنالوجی(ایم ای آئی ٹی وائی) کے تحت انڈیا اے آئی مشن کمپیوٹ کی صلاحیت، ڈیٹا سیٹس اور ماڈلز، اختراع، اے آئی ایپلی کیشنز، مستقبل کی مہارتوں، اسٹارٹ اپ فنانسنگ، اور محفوظ و قابلِ اعتماد اے آئی پر محیط اقدامات کے ذریعے بھارت کے اے آئی نظام کو آگے بڑھا رہا ہے۔

**********

 (ش ح –ا ب ن)

U.No:2396

(रिलीज़ आईडी: 2301739) आगंतुक पटल : 5