கடுமையான நிதி நெருக்கடியை எதிர்கொள்ளும் பெண்களுக்கு, வாழ்வாதார வாய்ப்புகளுக்கான அணுகலும், சரியான நேரத்தில் கிடைக்கும் நிதி உதவியும், அவர்கள் தங்கள் குடும்பங்களின் பாதுகாப்பான எதிர்காலத்தைக் கட்டமைப்பதற்கு உதவும்.

பொருளாதார நெருக்கடியைச் சமாளிக்க ஒரு குடும்பத்திற்கு வாழ்வாதார உதவி எவ்வாறு உதவும் என்பதற்கு உதாரணமாக, பீகாரின் வைஷாலி மாவட்டத்தில் உள்ள ஹாஜிபூர் தாலுகாவின் கரன்புரா கிராமத்தைச் சேர்ந்த, பட்டியல் வகுப்பைச்சேர்ந்த 32 வயதான ரூபி தேவி விளங்குகிறார்.

அவர் 8-ம் வகுப்பு வரை படித்துவிட்டு, தற்போது ஒரு மளிகைக் கடையை நடத்தி வருகிறார். நிலையான வாழ்வாதாரத் திட்டத்தில் பயன்பெறுவதற்கு முன்பு, ரூபி ஒரு தினக்கூலித் தொழிலாளியாகப் பணிபுரிந்தார்.

2016-ல், ரூபியின் கணவர் கடுமையாக நோய்வாய்ப்பட்டு, முறையான சிகிச்சை கிடைக்காததால் காலமானார். இரண்டு சிறு குழந்தைகளைப் பராமரிக்க வேண்டியிருந்ததாலும், குடும்பத்திடமிருந்து பெரிய ஆதரவு இல்லாததாலும், அவர் வீட்டைத் தனியாகவே நிர்வகிக்க வேண்டிய நிலைக்குத் தள்ளப்பட்டார். குடும்பத்தின் பொருளாதார நிலை மிகவும் நலிவடைந்தது, ஒரு நாளைக்கு இரண்டு வேளை உணவு ஏற்பாடு செய்வது கூட கடினமாக இருந்தது.

அந்தச் சூழலில் நிலையான வாழ்வாதாரத் திட்டத்தில் பயன்பெற ரூபி தேர்ந்தெடுக்கப்பட்டபோது, ​​அவருடைய சூழ்நிலைகள் மாறத் தொடங்கின. சங்கம் ஜீவிகா மகளிர் கிராம சங்கம் மூலம், ஒரு மளிகைக் கடையை அமைக்க அவருக்கு ஆதரவு கிடைத்தது.

தனது வணிகத் திறன்களை வலுப்படுத்த, ரூபி மூன்று மாத இடைவெளியில் மூன்று முறை பயிற்சி பெற்றார். மேலும், அவர் பிரதமரின் அஜய் என்ற உதவித் திட்டத்தின் கீழ் ரூ.17,000 உதவித்தொகையைப் பெற்றார். இது அவரது வணிக, வாழ்வாதார நடவடிக்கைகளை மேலும் வலுப்படுத்தவும் விரிவுபடுத்தவும் உதவியது.

ரூபி இப்போது தனது மளிகைக் கடையை விரிவுபடுத்தவும், ஒரு பெரிய, நிலையான வணிக நிறுவனத்தை நிறுவவும் விரும்புகிறார்.

தன் பிள்ளைகளுக்கு அடிப்படைத் தேவைகளை வழங்கப் போராடிய ஒரு தினக்கூலித் தொழிலாளியாக இருந்து, மாதம் ரூ.15,000–ரூ.20,000 சம்பாதிக்கும் ஒரு தன்னம்பிக்கையான கடை உரிமையாளராக ரூபி தேவி மாறிய பயணம், பெண்கள் பொருளாதார நெருக்கடிகளைக் கடந்து முன்னேற முடியும் என்பதை எடுத்துக்காட்டுகிறது.

மேலும் விவரங்களுக்கு இந்த ஆங்கிலச் செய்திக் குறிப்பைக் காணவும்: https://www.pib.gov.in/PressReleaseDetail.aspx?PRID=2300194&reg=48&lang=1

****

SS/PLM/RJ

(வெளியீட்டு அடையாள எண்: 2300238) வருகையாளர் எண்ணிக்கை : 63