’سوریہ پتھ ترنگا‘ عالمی ریلے کے تحت ہندوستان کے یوم آزادی کی منفرد عالمی تقریب جاری ہے، جس میں طلوع آفتاب کے راستے ترنگا دنیا بھر کا سفر کررہا ہے۔

’سوریہ پتھ ترنگا‘ کا سفر ہندوستانی وقت کے مطابق رات 1:30 بجے فجی کے شہر سووا سے شروع ہوا، جہاں ریلے کے پہلے مقام پر ترنگا لہرایا گیا۔ فجی کے بعد طلوع آفتاب کے راستے مغرب کی جانب بڑھتے ہوئے یہ علامتی سفر نیوزی لینڈ، آسٹریلیا، جاپان، جمہوریہ کوریا، چین، انڈونیشیا، ویتنام، سنگاپور، ملائیشیا، تھائی لینڈ اور میانمار سے گزرا۔ ہر ہندوستانی مشن اور پوسٹ پر قومی پرچم لہرایا گیا اور مختلف ٹائم زونز و براعظموں میں ترنگے کا ایک مسلسل بصری ریلے تشکیل پاتا گیا۔

صبح 8 بجے تک یہ سفر بنگلہ دیش پہنچا، جس کے بعد بھوٹان، نیپال، سری لنکا اور مالدیپ میں بھی ترنگا لہرایا گیا اور خطے بھر میں ہندوستان کے وقار اور اتحاد کا پیغام پہنچایا گیا۔

یہ ریلے مغرب کی جانب بڑھتے ہوئے ازبکستان اور عمان سے گزرا اور صبح 9:45 بجے متحدہ عرب امارات جبکہ 10:30 بجے ہندوستانی وقت پر قطر پہنچا۔ صرف نو گھنٹوں میں ترنگے نے بحرالکاہل میں دن کی پہلی روشنی سے مغربی ایشیا تک علامتی سفر کیا اور 21 ممالک اور ہندوستانی مشنز و پوسٹس کو ایک قومی علامت کے ذریعے جوڑ دیا۔

وزارت ثقافت کے سکریٹری وویک اگروال نے کہا کہ ’سوریہ پتھ ترنگا‘ ہندوستان کی طاقتور قومی علامت ترنگے کے ذریعے ہندوستان کے جذبے کو پوری دنیا تک پہنچاتا ہے۔ طلوع آفتاب کے راستے آگے بڑھنے والا یہ منفرد ریلے ہندوستانی مشنز اور بیرون ملک ہندوستانی برادری کو ہندوستان کی یکجہتی، ورثے اور جمہوری اقدار کے مشترکہ جشن میں جوڑتا ہے۔

’سوریہ پتھ ترنگا‘ کا سفر مغربی ایشیا، افریقہ، یورپ اور امریکہ تک جاری

صبح 10:45 بجے سے ’سوریہ پتھ ترنگا‘ نے مغرب کی جانب اپنا سفر جاری رکھا اور کویت، سعودی عرب، ایتھوپیا، روس، کینیا، اسرائیل، مصر اور جنوبی افریقہ تک پہنچا۔ ہر مقام پر ترنگا لہرانے کے ساتھ یہ ریلے ایک نئے ٹائم زون اور جغرافیائی خطے سے گزرتا رہا اور ہندوستان کے یوم آزادی کا جذبہ مغربی ایشیا، افریقہ اور یوریشیا تک پہنچاتا رہا۔

دوپہر 12:30 بجے تک ریلے پریٹوریا پہنچ چکا تھا، جہاں افریقی براعظم کے متنوع علاقوں اور برادریوں کے ساتھ ہندوستانی ترنگے کو علامتی طور پر جوڑا گیا۔

اس کے بعد یہ سفر یورپ میں داخل ہوا جہاں ترنگا یکے بعد دیگرے لاتویا، جرمنی، اٹلی، بیلجیم، نیدرلینڈز، فرانس، برطانیہ، اسپین، مراقش اور آئس لینڈ میں لہرایا گیا۔ ریگا میں 12:45 بجے سے ریکیاوک میں 3 بجے تک ہندوستانی وقت کے مطابق یہ ریلے یورپ بھر میں تقریبات کی ایک شاندار زنجیر بناتا رہا اور ہندوستانی پرچم کی عالمی رسائی اور بیرون ملک ہندوستانی مشنز و برادریوں کے جوش و خروش کو ظاہر کیا۔

سوریہ پتھ ترنگا کے مزید مغرب کی جانب بڑھنے کے ساتھ یہ سفر بحر اوقیانوس کو عبور کرکے امریکہ کے براعظموں کی طرف گیا، جہاں اگلے مقررہ مقامات برازیلیا، برازیل میں شام 4:30 بجے اور پیراماریبو، سرینام میں شام 4:45 بجے تھے۔ فجی میں رات 1:30 بجے پہلی بار ترنگا لہرائے جانے سے لے کر امریکہ کی جانب اس کے سفر تک، سوریہ پتھ ترنگا نے سورج کی حرکت کو حب الوطنی کے ایک طاقتور عالمی ریلے میں تبدیل کردیا ہے۔ ایک پرچم علامتی طور پر براعظموں کا سفر کرتے ہوئے یوم آزادی کے موقع پر دنیا بھر میں ہندوستانیوں اور ہندوستان کے دوستوں کو جوڑ رہا ہے۔

وزارت خارجہ کے ایکسٹرنل پبلک ڈپلومیسی ڈویژن کے ایڈیشنل سکریٹری رندھیر جیسوال نے کہا کہ سوریہ پتھ ترنگا مہم دنیا بھر میں آزادی کا جشن منانے کا ایک منفرد طریقہ ہے۔ انہوں نے کہا کہ یہ خصوصی عالمی ریلے فجی سے شروع ہوکر سرینام تک پہنچ چکا ہے اور آخرکار امریکہ کے سان فرانسسکو میں اختتام پذیر ہوگا۔ انہوں نے ہندوستانی سفارت خانوں، قونصل خانوں اور دنیا بھر کے لوگوں کی شرکت اور جوش و خروش کو اس سفر کی خاص کامیابی قرار دیا۔

Follow the LIVE RELAY https://harghartiranga.com/suryapath

************

ش ح ۔   م    د۔  م  ص

(U : 2165 )

(रिलीज़ आईडी: 2299997) आगंतुक पटल : 7