गोव्यात केंद्र सरकारच्या संस्थांचा ‘हर घर तिरंगा’ अभियानात उत्स्फूर्त सहभाग

सांस्कृतिक मंत्रालय

गोव्यात केंद्र सरकारच्या संस्थांचा ‘हर घर तिरंगा’ अभियानात उत्स्फूर्त सहभाग

Posted On: 14 AUG 2026 4:26PM by PIB Mumbai

गोवा, 14 ऑगस्ट 2026

भारताचा 80वा स्वातंत्र्यदिन आणि राष्ट्रीय गीत ‘वंदे मातरम्’च्या 150 वर्षांच्या स्मरणानिमित्त गोव्यातील विविध केंद्रीय सरकारी संस्था आणि आस्थापनांनी ‘हर घर तिरंगा’ अभियानात उत्स्फूर्त सहभाग नोंदवला आहे. विविध स्पर्धा, सांस्कृतिक कार्यक्रम आणि देशभक्तीपर उपक्रमांच्या माध्यमातून राष्ट्रप्रेम, राष्ट्रीय एकात्मता आणि तिरंग्याबद्दलचा अभिमान जागवण्यात येत आहे.

राष्ट्रीय जलक्रीडा संस्था आणि भारतीय पर्यटन व प्रवास व्यवस्थापन संस्था, गोवा यांच्यावतीने अभियानांतर्गत विविध उपक्रम आयोजित करण्यात आले आहेत. यामध्ये ‘वंदे मातरम्’ आणि राष्ट्रगीताचे गायन, रांगोळी स्पर्धा, रील मेकिंग तसेच राष्ट्रीय एकात्मतेवर आधारित पथनाट्यांचा समावेश आहे. विद्यार्थी, शिक्षक आणि कर्मचारी ‘तिरंग्यासोबत सेल्फी’ या उपक्रमातही उत्साहाने सहभागी होत आहेत.

मुरगाव बंदर प्राधिकरणात 11 ऑगस्ट रोजी ‘हर घर तिरंगा’ अभियान आणि ‘वंदे मातरम्’च्या 150 वर्षांच्या स्मरणार्थ वक्तृत्व स्पर्धा आयोजित करण्यात आली. या स्पर्धेत अधिकाऱ्यांनी राष्ट्रीय गीताचे महत्त्व, नागरिकांची कर्तव्ये आणि ‘हर घर तिरंगा’ अभियानाचे महत्त्व यावर आपले विचार मांडले.

दूरदर्शन गोवानेही या अभियानात सहभाग घेतला असून 9 ते 15 ऑगस्टदरम्यान विविध विशेष कार्यक्रम प्रसारित केले जात आहेत. यामध्ये ‘हर घर तिरंगा’ आणि ‘वंदे मातरम्’ या विषयांवरील विशेष मुलाखती तसेच लोकमान्य हायस्कूल, फोंडा आणि स्वामी विवेकानंद उच्च माध्यमिक विद्यालय, बोरीम येथील विद्यार्थ्यांनी सादर केलेल्या देशभक्तीपर गीतांचा समावेश आहे.

गोवा आंतरराष्ट्रीय विमानतळ, दाबोळी येथेही 80व्या स्वातंत्र्यदिनानिमित्त टर्मिनल इमारतीत आकर्षक देशभक्तीपर सजावट आणि माहितीपर क्रिएटिव्ह्ज लावण्यात आले आहेत. त्यामुळे विमानतळ परिसरात स्वातंत्र्यदिनाचा उत्साह दिसून येत असून राष्ट्रध्वजाच्या महत्त्वाचा संदेशही प्रवाशांपर्यंत पोहोचवला जात आहे.

प्रेस इन्फॉर्मेशन ब्युरो आणि केंद्रीय संचार ब्युरो, गोवा यांनीही आपल्या कार्यालयांमध्ये ‘हर घर तिरंगा’ अभियान साजरे केले. अधिकारी आणि कर्मचाऱ्यांनी ‘तिरंग्यासोबत सेल्फी’ या उपक्रमात उत्स्फूर्त सहभाग घेतला. तसेच ‘हर घर तिरंगा’च्या अधिकृत पोर्टलवर ‘वंदे मातरम्’चे गीत अपलोड करून अभियानात सहभाग नोंदवला.

गोव्यातील विविध केंद्रीय संस्था आणि आस्थापनांचा हा उत्स्फूर्त सहभाग देशप्रेम, राष्ट्रीय एकात्मता आणि तिरंग्याबद्दलचा अभिमान अधिक दृढ करणारा ठरत आहे. या उपक्रमांमुळे स्वातंत्र्यदिनाच्या उत्सवाला व्यापक लोकसहभागाची जोड मिळत आहे.