Ka Central Bureau of Communication (CBC), Shillong, Tnad Information and Broadcasting, Sorkar India, ryngkat ka jingiatreilang bad ki bor pyniaid District, Eastern West Khasi Hills, ki la pynlong ia ka Integrated Communication and Outreach Program (ICOP) halor ka Campaign Har Ghar Tiranga bad ka Nasha Mukt Bharat Abhiyan ha Mairang Presbyterian Higher Secondary School, Mairang mynta ka sngi. La pynlong ia ka Tiranga rally kum shi bynta jong kane ka prokram, kaba la pyniasoh lang ia ki samla pule, ki heh sorkar bad ki paidbah ha ka jingrakhe kaba iphuh iphieng ia ka jingieid ri, ka jingiatylli jong ka ri bad ka jingkitkhlieh ha ka imlang sahlang.

La pynsdang Ïa ka rally da u Additional Deputy Commissioner Bah M. Diengdoh ha ka jingïadonlang u Assistant Director, CBC u Gopajit Das; u Principal Bah C. War; ki ophisar na ka tnad Pulit, ki bor pyniaid distrik bad ka CBC; ki nonghikai, ki paidbah; bad shibun ki khynnah skul kiba la iashim bynta shitrhem.

Kane ka rally ka la sdang na katei ka skul haduh ka ïew kaba don marjan, ha kaba ki khynnah skul ki la rah ïa ka khubor jong ka Har Ghar Tiranga, ka jingïatylli ha ka jingiar bad ka Nasha Mukt Bharat sha ka imlang sahlang. Ka jingïashim bynta shitrhem jong ki samla pule bad ki paidbah ka la ai ïa kane ka rally ïa ka jingïalang kaba khlaiñ bha ha kaba iadei bad ka jingiashim bynta ka imlang sahlang bad ka la pynskhem ïa ka bynta jong ki samla ha kaba pynsaphriang ïa ki khubor ba bha ha ka imlang sahlang.

Kane ka rally ka ban jur ïa ka jingdonkam ban pyni da ka jingsngew sarong ïa ka Lama jong ka Ri kum shi bynta ka Campaign Har Ghar Tiranga bad ban rakhe ïa ka mynsiem ieid ri bad ka jingïatylli jong ka ri ha ki jingrakhe ïa ka Sngi Laitluid. Ki khynnah skul ki la ïashim bynta shitrhem ha ka jingïalang, da kaba rah ïa ka khubor jong ka Lama jong ka ri Shabar jong ki phyllaw skul bad pynshlur ïa ki paidbah ban ïasnohkti lang ha ka campaign.

Haba ai jingkren ha ka jingialang, u ADC Bah M. Diengdoh u la kyntu ia ki samla pule bad ki nongshong shnong ban iashim bynta shitrhem ha ka Campaign Har Ghar Tiranga da kaba wah ia ka Lama jong ka ri ha ki iing ki sem, ki skul, ki ophis treikam bad kiwei kiwei ki jaka ba kongsan. U la batai ia ka Lama jong ka Ri kum ka dak kaba khlain jong ka jingiatylli jong ka India ha ka jingiar bad u la pynshlur ia ki samla ban don ia ka mynsiem ieid ri ha ka jingim jong ki kaba man ka sngi bad ban nohsynniang sha ka jingtei ia ka ri kaba khlain bad kaba iatylli.

Haba kren halor ka Nasha Mukt Bharat, u Bah Diengdoh u la pynshlur ïa ki samla pule shim ia ki rai kiba don ka jingbahkhlieh bad kiba wan na ka jingsngewthuh. U la kren shaphang ka jingdonkam jong ka jingpyniaid ia la ka jingim, ka jingktah kaba bha jong ki paralok bad ka jinglong jingman kaba kyrshan ha kaba iarap ia ki samla ban sngewthuh ia la ki jong ki sap. U la kyntu ia ki samla pule ba kin long ki nongkit khubor jong ka jingkylla kaba bha bad ban pynsaphriang ia ka khubor jong ka rukom im kaba koit ba khiah bad kaba lait na u drok hapdeng ki longiing, ki paralok bad ki shnong ki thaw.

U Principal Bah C. War u la iaroh ia kane ka sienjam bad u la ban jur ia ka bynta kaba kongsan jong ki jaka pule ha kaba kyntiew ia ki samla nongshong shnong kiba don ka jingkitkhlieh, kiba sngewskhem bad kiba sngewthuh ia ka imlang sahlang. U la kren ruh shaphang ka jingiar jong ka India bad ka jingdonkam ban pynkhlain ïa ka mynsiem jong ka jingïatylli ha ka ri hapdeng ki pateng kiba hadien.

U Resource Person SI E. Marbaniang u la ai ia ki samla pule ia ka jingtip kaba bniah shaphang ki jingdih pynbuaid bad ka jingktah ia ki briew, ki longiing bad ka imlang sahlang. U la batai ia ki jingma kiba iadei bad ki jait drok bapher bapher bad u la ban jur ia ka jingdonkam ban ithuh kloi ia ki dak bad ban wad ia ka jingkyrshan ha ka por kaba biang. U la pynshlur ia ki samla pule ban long kiba husiar, ban kyrshan ia ki paralok bad ban shim ia ki rai kiba don jingkitkhlieh kiba iada ia ka koit ka khiah, ka jingpule bad ka lawei jong ki.

Ka jingiakop shad ieid ri ka la long ka jingpynbyrngia ha kane ka prokram. Ki samla pule ki la pyni ia ki jingshad kiba itynnad bad kiba iphuh iphieng kiba rakhe ia ka jingiatylli, ka jingiar bad ka mynsiem ieit ri jong ka India. Lyngba ka jingrwai, ka jingshad bad ka jingsaindur, ki nongiashim bynta ki la pynpaw ia ka jingieid jong ki ia ka ri bad ia ka khubor jong ka jingiatylli ka ri. Ki jingshad ki la ioh ia ka jingiaroh na ki paidbah bad ki la wanrah ia ka jinglong kaba itynnad bad kaba lehkmen ia ka prokram.

Ha kane ka prokram la pyni ruh ïa ki jingïakop saindur bad quiz, kiba la ailad ïa ki samla pule ban ïatreilang bad ki phang pdeng jong ka jingieid ri, ka jingïatylli jong ka ri bad ka India kaba lait na u drok. La pynkup burom ia ki nongjop bad ki nongiashim bynta da ki khusnam, da kaba pynshlur ia ka jingiashim bynta kaba kham bun bad pynskhem ia ki khubor ba kongsan jong ka prokram.

La pynkut ia ka prokram da ka khubor kaba khlain jong ka jingsngew sarong ia ka Lama jong ka ri, ka jingiatylli ha ka jingiar bad ka jingkitkhlieh lang ban tei ia ka ri kaba koit ba khiah bad ka Nasha Mukt Bharat. Ka Tiranga rally bad ki prokram pynsaphriang jingtip bapher bapher ki la pynshlur ïa ki khynnah skul ban rah ïa kine ki khubor na skul jong ki sha ki ïing ki sem bad ki shnong ki thaw jong ki bad ban long ki samla kiba pynsaphriang ia ka khubor jong ka jingieit ri, ka jinglong babha bad ka jingkitkhlieh ha ka imlang sahlang.

****

(रिलीज़ आईडी: 2299193) आगंतुक पटल : 5