بھارت سرکار نے قومی تعلیمی پالیسی (این ای پی) 2020 کو سیکھنے والے پر مرکوز اور ٹکنالوجی سے بااختیار تعلیم کو مضبوط بنانے کے وژن کے ساتھ تشکیل دیا ہے۔ اس وژن سے ہم آہنگ، بھارت سرکار نے تمام طلبہ کے لیے لچک دار تعلیم فراہم کرنے کی غرض سے ایک ڈیجیٹل یونیورسٹی پلیٹ فارم کے قیام کا تصور کیا ہے۔

الیکٹرانکس اور اطلاعاتی ٹکنالوجی کی وزارت (میٹی) کے تحت نیشنل انسٹی ٹیوٹ آف الیکٹرانکس اینڈ انفارمیشن ٹکنالوجی (این آئی ای ایل آئی ٹی) نے اکتوبر 2025 میں ”این آئی ای ایل آئی ٹی ڈیجیٹل یونیورسٹی (این ڈی یو) پلیٹ فارم“ کا اِفتتاح کیا تاکہ سیکھنے والوں کے لیے ڈیجیٹل سیکھنے کے مواقع تک رسائی کو آسان بنایا جا سکے، جن میں دیہی، دور دراز اور قبائلی علاقوں کے لوگ بھی شامل ہیں۔ این ڈی یو ابھرتی ہوئی ٹکنالوجی کے شعبوں جیسے کہ مصنوعی ذہانت، سائبر سیکیورٹی، کلاؤڈ کمپیوٹنگ، انڈسٹری 4.0 اور دیگر جدید شعبوں میں آن لائن اور بلینڈڈ، ہنر پر مبنی کورسز فراہم کرتا ہے۔

این ڈی یو پلیٹ فارم ملک کے 750 سے زیادہ اضلاع کے سیکھنے والوں تک پہنچ چکا ہے، جس میں 2.70 لاکھ سے زیادہ رجسٹریشنز ہیں، اور فی الحال مختلف شعبوں میں 100 سے زیادہ کورسز پیش کرتا ہے۔ یہ پلیٹ فارم سیکھنے والوں کو این آئی ای ایل آئی ٹی ایلومنائی کم پلیسمنٹ پورٹل پر رجسٹر کرنے کا اختیار بھی فراہم کرتا ہے، جس سے انھیں روزگار کے مواقع اور رہ نمائی کی سہولیات تک رسائی حاصل ہوتی ہے۔ اکتوبر 2025 سے اب تک 35,000 سے زیادہ سیکھنے والے اور 190 سے زیادہ بھرتی کرنے والے ایلومنائی پورٹل پر رجسٹر ہو چکے ہیں۔

اس کے علاوہ، قومی تعلیمی پالیسی 2020 کے مقاصد سے ہم آہنگ، وزارتِ تعلیم اطلاعات اور مواصلاتی ٹکنالوجی (این ایم ای آئی سی ٹی) اسکیم کے ذریعے تعلیم پر قومی مشن کو نافذ کر رہی ہے۔ یہ اسکیم تعلیم کے تمام عمل میں ٹکنالوجی کے استعمال کو فروغ دیتی ہے۔

صنعت اور تعلیمی اداروں کے روابط کو مضبوط بنانے اور سیکھنے والوں کی روزگار کی صلاحیت کو بڑھانے کے لیے، این ایم ای آئی سی ٹی اسکیم کے تحت سویم پلس پلیٹ فارم کا اِفتتاح کیا گیا ہے۔ یہ پلیٹ فارم 500 سے زیادہ روزگار پر مرکوز کورسز پیش کرتا ہے۔ یہ کورسز 15 شعبوں میں 80 سے زیادہ صنعتی شراکت داروں سے تیار کیے گئے ہیں، جن میں اطلاعاتی ٹکنالوجی، مصنوعی ذہانت، سیمی کنڈکٹر مینوفیکچرنگ، اور جدید مینوفیکچرنگ وغیرہ شامل ہیں۔ اب تک، 6 لاکھ سے زیادہ سیکھنے والوں نے اپنی ہنر مندی میں اضافہ کرنے کے لیے سویم پلس پلیٹ فارم پر اندراج کیا ہے۔

یہ معلومات آج راجیہ سبھا میں ایک تحریری جواب میں وزیرِ مملکت برائے تعلیم، ڈاکٹر سُکانتا مجومدار نے دی۔

***

(ش ح - ع ا)

U.No. 1973

(रिलीज़ आईडी: 2298591) आगंतुक पटल : 6