ہنرمندی کی تربیت اور کاروباری صلاحیتوں کے فروغ  کی وزارت نے ہنرمندی کے فروغ سے متعلق قومی  کارپوریشن کے اشتراک سے ہنرمندی کے نتائج کا فنڈ  شروع کیا  ہے۔ یہ نتائج پر مبنی ایک جدید سرکاری و نجی مشترکہ مالیاتی نظام ہے، جس کے لیے 530 کروڑ روپے کے فنڈ جاری کیا ہے۔ اس میں سے 225 کروڑ روپے وزارت فراہم کرے گی، جبکہ 305 کروڑ روپے نجی شعبے سمیت  کارپوریٹ سماجی ذمہ داری اور فلاحی اداروں سے حاصل کیے جائیں گے۔ اس فنڈ کے تحت مالی معاونت کا طریقہ کار سرگرمی یا ابتدائی وسائل کی بنیاد سے تبدیل کرکے نتائج کی بنیاد پر کر دیا گیا ہے۔ فہرست میں شامل تربیتی اداروں کو ادائیگی براہِ راست پہلے سے طے شدہ روزگار سے متعلق مراحل کے حصول اور آزادانہ تصدیق سے منسلک ہوگی۔

ہنرمندی کے نتائج کے فنڈ میں شمولیت پر خصوصی توجہ دی گئی ہے، تاکہ خواتین امیدواروں اور کم آمدنی والے گھرانوں کے نوجوانوں جیسے ترجیحی سماجی گروپوں کو جوڑ  کر معاونت فراہم کی جا سکے۔ اس کے علاوہ، پسماندہ علاقوں میں امیدواروں تک رسائی، ان کی شمولیت اور تربیتی مراکز کی تقسیم کو بھی ترجیح دی جائے گی، تاکہ سماجی اور جغرافیائی اعتبار سے متنوع علاقوں کا احاطہ یقینی بنایا جا سکے۔

اس فنڈ کے تحت ادائیگی کے نظام میں امیدوار کے داخلے کے وقت تربیتی اداروں کو کوئی پروگرام سے متعلق ادائیگی نہیں کی جائے گی۔ اس کے بجائے، فی امیدوار طے شدہ مجموعی تربیتی لاگت کو تین تصدیق شدہ مراحل میں تقسیم کیا جائے گا: تربیتی سند کا حصول 30 فیصد، ملازمت ملنا 40 فیصد اور تین ماہ تک ملازمت برقرار رہنا 30 فیصد۔ اگرچہ اخراجات کو بہتر بنانے کے لیے ادائیگی کے مراحل تین ماہ تک ملازمت برقرار رہنے سے منسلک ہیں، تاہم ہنرمندی کے نتائج کا فنڈ طویل مدتی نتائج کی نگرانی کے لیے مضبوط اعداد و شمار کے نظام کو بھی شامل کرتا ہے۔

روایتی ہنرمندی کے پروگراموں سے ہٹنے کے لیے، جن میں ملازمت کی یقینی فراہمی کے بغیر تربیت شروع کر دی جاتی ہے، ہنرمندی کے نتائج کا فن مانگ پر مبنی اور آجر کی قیادت میں تربیت کا نظام متعارف کراتا ہے۔ اس کے تحت تربیتی شراکت دار حقیقی بازار میں دستیاب ملازمتوں کی بنیاد پر تربیت کا منصوبہ تیار کریں گے۔ تربیتی شراکت داروں کے مفادات کو آجروں اور صنعت کے ساتھ ہم آہنگ کیا جائے گا، تاکہ تربیت اور سند حاصل کرنے والے امیدواروں کے لیے روزگار کے مواقع بہتر بنائے جا سکیں۔

اس کے علاوہ، کوشل میلوں اور پی ایم  نیشنل اپرنٹس شپ میلوں جیسے موجودہ نظام بھی سند یافتہ امیدواروں کے لیے ملازمت اور تربیتی عملی کے مواقع فراہم کرنے میں مدد کریں گے۔ ہنرمندی کی ترقی کی وزارت کا اسکل انڈیا ڈیجیٹل ہب بھی ہنر میں اضافے کے لیے ایک جامع اور آسان رسائی والا پلیٹ فارم ہے، جہاں ملک کے نوجوانوں کے لیے صنعت کی ضرورت کے مطابق ہنرمندی کے کورسز، روزگار کے مواقع اور کاروباری معاونت دستیاب ہے۔ اسے محنت اور روزگار کی وزارت کے قومی کیریئر سروس پورٹل سے مربوط کیے جانے کے بعد امیدوار اپنی پسند کے علاقوں میں ملازمت اور تربیتی عملی کے مواقع تک رسائی حاصل کر سکیں گے۔

یہ جانکاری ہنرمندی کی ترقی اور کاروباری صلاحیتوں کی ترقی کی وزارت کے وزیر مملکت (آزادانہ چارج) جناب جینت چودھری نے آج راجیہ سبھا میں ایک تحریری جواب میں دی۔

*******

 (ش ح۔ع ح۔م ذ)

U.R .1925

(रिलीज़ आईडी: 2298372) आगंतुक पटल : 10