مرکزی حکومت 'پروٹیکشن آف سول رائٹس (پی سی آر) ایکٹ، 1955' (قانونِ تحفظِ شہری حقوق) اور 'دی شیڈیولڈ کاسٹس اینڈ دی شیڈیولڈ ٹرائبز (پریوینشن آف ایٹروسٹیز) ایکٹ، 1989' (درج فہرست ذاتوں اور درج فہرست قبائل کے لیے قانونِ تدارکِ مظالم) کے نفاذ کی مشینری کو مضبوط بنانے کے لیے 'مرکز کے ذریعہ  اسپانسر شدہ اسکیم' نافذ کر رہی ہے۔ اس اسکیم کے تحت، ان قوانین کے مؤثر نفاذ اور مظالم کے متاثرین کو امداد فراہم کرنے کے لیے اتر پردیش سمیت تمام ریاستوں اور مرکز کے زیرِ انتظام علاقوں کو 'مرکزی اعانت' جاری کی جاتی ہے۔

سماجی انصاف اور تفویضِ اختیارات کے وزیرِ مملکت شری رام داس اٹھاولے نے راجیہ سبھا میں پروفیسر منوج کمار جھا کے ایک تحریری جواب میں یہ تفصیلات شیئر کیں۔ ایوان کو مطلع کیا گیا کہ سال 2019-20 سے 2025-26 کے درمیان اتر پردیش کو کل 747.17 کروڑ روپے کی مرکزی اعانت جاری کی گئی ہے۔ اس مدت کے دوران، اس اسکیم کے تحت 1,43,543 مظالم کے متاثرین کو امداد فراہم کی گئی۔

تحریری جواب میں مزید بتایا گیا کہ سال 2019-20 کے دوران 141.36 کروڑ روپے جاری کیے گئے جس سے 23,866 متاثرین مستفید ہوئے، اس کے بعد 2020-21 میں 23,592 متاثرین کے لیے 113.03 کروڑ روپے، 2021-22 میں 20,278 متاثرین کے لیے 126.72 کروڑ روپے، 2022-23 میں 11,54 کروڑ روپے جاری کیے گئے جس سے 23,828 متاثرین کو فائدہ پہنچا، 2023-24 میں 19,240 متاثرین کے لیے 97.95 کروڑ روپے، 2024-25 میں 20,074 متاثرین کے فائدے کے لیے 89.49 کروڑ روپے، اور 2025-26 کے دوران 87.08 کروڑ روپے جاری کیے گئے، جس کے تحت 12,665 متاثرین کو امداد فراہم کی گئی ہے۔

ایوان کو یہ بھی مطلع کیا گیا کہ نیشنل کرائم ریکارڈز بیورو (این سی آر بی) کے مطابق، اتر پردیش میں ایس سی/ایس ٹی ایکٹ کے تحت درج فہرست ذاتوں کے خلاف درج کیے گئے مقدمات کی تعداد 2019 میں 11,829 سے بڑھ کر 2024 میں 14,642 ہو گئی۔ اسی مدت کے دوران، اتر پردیش میں سزا سنانے کی شرح مستقل طور پر قومی اوسط سے زیادہ رہی، جو کہ 2019 اور 2024 کے درمیان بالترتیب 66.1 فیصد، 70.3 فیصد، 76.3فیصد، 80.2 فیصد، 70.0فیصد اور 73.3فیصد درج کی گئی، جبکہ اس کے مقابلے میں قومی اوسط بالترتیب 32.1 فیصد، 42.5 فیصد، 36.0 فیصد، 34.1 فیصد، 32.4 فیصد اور 33.9فیصد تھی۔

اتر پردیش میں اس ایکٹ کے تحت درج فہرست قبائل کے خلاف درج مقدمات کے سلسلے میں، تحریری جواب میں بتایا گیا کہ 2019 میں 36 مقدمات درج کیے گئے، جس کے بعد 2020 میں 3، 2021 میں 4، 2022 میں 5، 2023 میں 6 اور 2024 میں 8 مقدمات درج ہوئے۔ 2019 اور 2020 میں سزا سنانے کی شرح 100 فیصد تھی، جبکہ 2021 سے 2024 تک کی مدت کے دوران سزا سنانے کا کوئی بھی معاملہ سامنے نہیں آیا۔

معاوضے سے متعلق سوال کا جواب دیتے ہوئے، ایوان کو مطلع کیا گیا کہ اگرچہ وزارت ریاستوں اور مرکز کے زیرِ انتظام علاقوں کو مرکزی اعانت جاری کرتی ہے، لیکن اس اسکیم کا نفاذ اور امداد کی تقسیم متعلقہ ریاستی حکومتوں کی ذمہ داری ہے۔ وزارت نے مزید بتایا کہ وہ جاری کردہ مرکزی اعانت میں سے متاثرین کو ادا کی جانے والی معاوضے کی اصل رقم کا ڈیٹا مرکزی سطح پر نہیں رکھتی ہے۔

**********

(ش ح –ا ب ن)

U.No:1447

(रिलीज़ आईडी: 2295218) आगंतुक पटल : 3