زراعت بھارت کی دیہی معیشت کی ریڑھ کی ہڈی ہے، لیکن فصلوں کی کٹائی کے بعد مناسب بنیادی ڈھانچے کی کمی کے باعث اکثر کسانوں کو نمایاں نقصانات کا سامنا کرنا پڑتا ہے اور ان کی آمدنی بھی محدود ہو جاتی ہے۔ جدید کولڈ اسٹوریج کی سہولیات زرعی پیداوار کو محفوظ رکھنے، اس کے معیار کو بہتر بنانے اور اس کی مدتِ استعمال بڑھانے میں اہم کردار ادا کرتی ہیں، جس سے کسانوں کو اپنی پیداوار کی بہتر قیمت حاصل کرنے میں مدد ملتی ہے۔ بروقت ادارہ جاتی تعاون سے دیہی کاروباری اداروں میں آنے والی مثبت تبدیلی کی ایک مثال پیش کرتے ہوئے، محترمہ اے اموتھا دیوی کے زیر انتظام میناکشی دیوی ہائی-ٹیک ایگرو انڈسٹری پرائویٹ لمیٹڈ نے تمل ناڈو کے تریچیرپلی میں ایک جدید کولڈ اسٹوریج سہولت قائم کرکے زرعی بنیادی ڈھانچے کی ترقی میں اہم کردار ادا کیا ہے۔

زرعی ویلیو چین کو مضبوط بنانے اور دیہی روزگار پیدا کرنے کے منصوبے کی صلاحیت کو مدنظر رکھتے ہوئے، وزارت سماجی انصاف و عطائے اختیارات کے تحت درج فہرست ذاتوں کے لیے وینچر کیپیٹل فنڈ (وی سی ایف-ایس سی) نے 2017 میں ایکویٹی اور اختیاری طور پر قابل تبدیل ڈیبینچر پر مشتمل وینچر کیپیٹل امداد کے ذریعے 4.95 کروڑ روپے کی مالی امداد فراہم کی۔ اس مالی تعاون سے کمپنی کو 5,000 میٹرک ٹن سالانہ (ایم ٹی پی اے) گنجائش کا کولڈ اسٹوریج یونٹ قائم کرنے میں مدد ملی، جس میں 1,000 میٹرک ٹن کی گنجائش والے پانچ چیمبر شامل ہیں۔ اس سے خطے میں فصلوں کی کٹائی کے بعد ذخیرہ کرنے کی صلاحیت میں نمایاں اضافہ ہوا ہے۔

 

زرعی ترقی کے لیے جدید کولڈ اسٹوریج کا بنیادی ڈھانچہ

 

اس منصوبے نے وسائل کے بہترین استعمال کو یقینی بنانے کے ساتھ ساتھ زرعی پیداوار کے بہتر معیار اور طویل مدتِ استعمال کو ممکن بنایا ہے۔ قابلِ اعتماد ذخیرہ کاری کا بنیادی ڈھانچہ فراہم کرکے اس کاروباری ادارے نے کسانوں کو اپنی پیداوار کی مناسب قیمت حاصل کرنے کے قابل بنایا ہے، جس سے انہیں مجبوری میں کم قیمت پر اپنی پیداوار فروخت کرنے سے بچنے میں مدد ملی ہے۔ اس اقدام سے دیہی علاقوں میں روزگار کے مواقع بھی پیدا ہوئے ہیں، بالخصوص کمزور طبقات سے تعلق رکھنے والے افراد کے لیے، جس سے جامع دیہی ترقی کو فروغ ملا ہے۔

 

 

اپنے کاروباری سفر کے بارے میں محترمہ اے اموتھا دیوی نے کہا:

”وزارت سماجی انصاف و عطائے اختیارات کے درج فہرست ذاتوں کے لیے وینچر کیپیٹل فنڈ (وی سی ایف-ایس سی) کے تحت حاصل ہونے والی مدد نے ہمیں ایک جدید کولڈ اسٹوریج سہولت قائم کرنے میں مدد دی ہے، جس سے کسانوں اور دیہی برادریوں کو فائدہ پہنچ رہا ہے۔ اس منصوبے نے پروموٹر کے ساتھ ساتھ کارکنوں، بالخصوص درج فہرست ذاتوں سے تعلق رکھنے والے کارکنوں کے معیارِ زندگی کو بہتر بنایا ہے اور پائیدار زرعی ترقی میں بھی اپنا کردار ادا کیا ہے۔“

میناکشی دیوی ہائی-ٹیک ایگرو انڈسٹری پرائویٹ لمیٹڈ کی کامیابی اس بات کی عکاسی کرتی ہے کہ درج فہرست ذاتوں کے لیے وینچر کیپیٹل فنڈ کے تحت ہدف پر مبنی مالی امداد کس طرح درج فہرست ذاتوں سے تعلق رکھنے والے کاروباری افراد کو ایسے پائیدار کاروباری ادارے قائم کرنے کے قابل بنا رہی ہے جو زرعی بنیادی ڈھانچے کو مضبوط کرتے ہیں، دیہی روزگار پیدا کرتے ہیں اور کسانوں کی آمدنی میں اضافہ کرتے ہیں۔ صنعت کاری کو فروغ دے کر اور بنیادی ڈھانچے کی ترقی میں معاونت فراہم کر کے، وزارت سماجی انصاف و عطائے اختیارات ملک بھر میں کاروباری افراد کو بااختیار بنانے، ذریعۂ معاش پیدا کرنے اور پائیدار مستقبل کی تعمیر کے لیے مسلسل کام کر رہی ہے۔

************

ش ح۔ ف ش ع

                                                                                                                                       U: 1323

(रिलीज़ आईडी: 2294615) आगंतुक पटल : 4