جوہری توانائی محکمہ (ڈی اے ای) طبی اور زرعی شعبوں میں جوہری ٹیکنالوجی کے پُرامن استعمال کو فروغ دے رہا ہے۔

طبی شعبے میں جوہری ٹیکنالوجی:

طبی شعبے میں، خاص طور پر سرطان (کینسر) کے علاج کے لیے، تشخیص اور علاج سے متعلق امور میں نیوکلیئر میڈیسن اور ریڈیو آئسوٹوپس کا وسیع پیمانے پر استعمال کیا جاتا ہے۔

جوہری توانائی محکمہ کا  ایک ذیلی  ادارہ بھابھا ایٹمی تحقیقی مرکز (بی اے آر سی) باقاعدگی سے ریڈیو آئسوٹوپس اور استعمال کے لیے تیار ریڈیو فارماسیوٹیکلز تیار کرتا ہے۔ ان کی فراہمی جوہری توانائی محکمہ کے صنعتی ادارے بورڈ آف ریڈی ایشن اینڈ آئسوٹوپ ٹیکنالوجی (بی آر آئی ٹی) کے ذریعے ملک بھر کے نیوکلیئر میڈیسن مراکز کو کی جاتی ہے، تاکہ تشخیصی اور علاجی مقاصد کے لیے ان کی بروقت دستیابی یقینی بنائی جا سکے۔ درآمد شدہ ریڈیو فارماسیوٹیکلز کے کم لاگت والے مقامی متبادل فراہم کرنے کے مقصد سے ڈی اے ای نے ریڈیو فارماسیوٹیکلز اور ان سے متعلق مصنوعات کی مقامی تیاری کے لیے اہم اقدامات کیے ہیں۔

ریڈیو آئسوٹوپس کی مقامی تیاری تحقیقی ری ایکٹروں اور سائیکلوٹرونز کے ذریعے کی جاتی ہے۔ روتھینیم-106، سیزیم-137 اور اسٹرونشیئم-90 سے حاصل ہونے والا یٹریئم-90 جیسے ریڈیو آئسوٹوپس اعلیٰ سطحی مائع فضلے (ایچ ایل ایل ڈبلیو) کی دوبارہ پروسیسنگ کے ذریعے حاصل کیے جاتے ہیں۔

ڈی اے ای ممبئی میں واقع ریڈی ایشن میڈیسن سینٹر (آر ایم سی) اور کولکاتا میں واقع ریڈی ایشن میڈیسن ریسرچ سینٹر (آر ایم آر سی) کے ذریعے بھی نیوکلیئر میڈیسن کے شعبے میں اہم خدمات انجام دے رہا ہے، جہاں سرطان کے علاج کے لیے تشخیصی اور علاجی سہولیات فراہم کی جاتی ہیں۔ آر ایم آر سی، کولکاتا، ممبئی کے بھابھا ایٹمی تحقیقی مرکز (بی اے آر سی) کے زیرِ نگرانی مشرقی بھارت میں قائم ایک جدید ترین نیوکلیئر میڈیسن سہولت ہے۔ یہ مرکز جنوری 2024 سے کام کر رہا ہے اور مشرقی و شمال مشرقی ہندوستان کے مریضوں کو جدید اور کم لاگت والی نیوکلیئر میڈیسن پر مبنی تشخیص اور معالجے  کی خدمات فراہم کر رہا ہے۔

گزشتہ چند برسوں کے دوران جوہری توانائی محکمہ نے سرطان کے خلاف قومی کوششوں کے تحت، خاص طور پر جدید علاج اور تحقیق کے شعبے میں، کئی اہم نیوکلیئر میڈیسن لِگینڈز اور ہدفی علاج (ٹارگٹڈ تھراپیز) تیار کیے ہیں۔ ڈی اے ای نے پروسٹیٹ کینسر کے علاج کے لیے پیپٹائڈ پر مبنی لِگینڈ پی ایس ایم اے-617 تیار کیا ہے۔ محکمہ کی جانب سے مقامی طور پر تیار کردہ177 ایل یو -پی ایس ایم اے-617 نیوکلیئر میڈیسن لِگینڈ کی فراہمی بورڈ آف ریڈی ایشن اینڈ آئسوٹوپ ٹیکنالوجی (بی آر آئی ٹی) کے ذریعے ملک بھر کے اسپتالوں کو باقاعدگی سے کی جا رہی ہے۔

حال ہی میں ڈی اے ای نے پی ایس ایم اے-11 نامی ایک اور نیوکلیئر میڈیسن لِگینڈ بھی تیار کیا ہے، جو 68جی اے-پی ایس ایم اے--11 کی تیاری کے لیے درآمدات کا  گھریلو متبادل ہے۔ 68جی اے-پی ایس ایم اے-11 کا استعمال پروسٹیٹ کینسر کی تشخیص میں کیا جاتا ہے۔

 سال 2014سے ہندوستان میں دستیاب ریڈیوآئسوٹوپس اور ریڈیو فارماسیوٹیکل مصنوعات کی فہرست، ان کے طبی استعمال کے ساتھ، ذیل میں دی گئی ہے:

زرعی شعبے میں جوہری ٹیکنالوجی:

زرعی شعبے میں جوہری توانائی محکمہ (ڈی اے ای) نے بھارتی زرعی تحقیقاتی کونسل (آئی سی اے آر) اور ریاستی زرعی یونیورسٹیوں کے تعاون سے تابکاری سے پیدا ہونے والی جینیاتی تبدیلی (ریڈی ایشن انڈیوسڈ میوٹاجنیسس) اور کراس بریڈنگ تکنیک کا استعمال کرتے ہوئے 72 جدید فصلوں کی اقسام تیار کی ہیں، جنہیں ملک بھر میں تجارتی کاشت کے لیے جاری اور منظور کیا گیا ہے۔ان اقسام میں چاول، سرسوں، تل، مونگ پھلی، اڑد، مونگ، ارہر، جوار، لوبیا، گندم، سویابین، سورج مکھی، کیلا، السی اور پٹ سن شامل ہیں۔ان فصلوں کی اہم خصوصیات میں زیادہ پیداوار، بیجوں کا بہتر سائز اور معیار، جلد پکنے کی صلاحیت، موسمی حالات کے مطابق قوت مدافعت، جیسے خشک سالی، زیادہ درجۂ حرارت اور نمکیات کو برداشت کرنے کی صلاحیت، نیز بیماریوں کے خلاف قوت مدافعت شامل ہیں۔ان میں سے کئی اقسام کسان برادری میں بہت مقبول ہیں اور ملک بھر میں بڑے پیمانے پر کاشت کی جا رہی ہیں۔

ڈی اے ای خوراک اور زرعی مصنوعات کے تحفظ کے لیے تابکاری ٹیکنالوجی کے استعمال کو فروغ دے رہا ہے۔ اس مقصد کے لیے زرعی اجناس کی تابکاری کے ذریعے پروسیسنگ کے لیے معیاری عملی طریقۂ کار (ایس او پی) تیار کیے جا رہے ہیں، خوراک کی تابکاری سے متعلق معیارات اور رہنما خطوط وضع کیے جا رہے ہیں، جدید تابکاری سہولیات تیار کی جا رہی ہیں اور تابکاری پر مبنی خوراک کے تحفظ کی ٹیکنالوجیز کو تجارتی استعمال کے لیے نجی کاروباری اداروں کو منتقل کیا جا رہا ہے۔تابکاری کے ذریعے پروسیسنگ سے جلد خراب ہونے والی زرعی پیداوار کی ذخیرہ کرنے کی مدت میں اضافہ ہوتا ہے، فصل کٹائی کے بعد ہونے والے نقصانات میں کمی آتی ہے، اناج اور مصالحوں کا کیمیائی مواد سے پاک تحفظ ممکن ہوتا ہے اور برآمدات کے لیے بین الاقوامی پودوں سے متعلق حفظانِ صحت کے معیارات (فائٹو سینیٹری ریکوائرمنٹس) کو پورا کرنے میں مدد ملتی ہے۔اب تک ملک میں 42 غذائی تابکاری مراکز قائم کیے جا چکے ہیں، جن میں سرکاری اور نجی دونوں شعبوں کے مراکز شامل ہیں۔

کوبالٹ-60 (سی او-60) پر مبنی تابکاری آلات کا استعمال طبی مصنوعات کو جراثیم سے پاک کرنے اور زرعی و سمندری مصنوعات کی ذخیرہ کرنے کی مدت بڑھانے کے لیے کیا جاتا ہے۔ سیزیم (سی ایس) کا استعمال خون کو تابکاری کے ذریعے محفوظ بنانے والے آلات میں خون کی تابکاری کے لیے کیا جاتا ہے۔ جوہری توانائی محکمہ (ڈی اے ای) کی تیار کردہ ٹیکنالوجیز نجی کاروباری اداروں کو غیر خصوصی بنیادوں پر معمولی فیس کے عوض ٹیکنالوجی کی منتقلی کے لیے دستیاب کرائی جاتی ہیں۔

خوراک کی پروسیسنگ میں تابکاری ٹیکنالوجی کے استعمال کو مزید فروغ دینے کے لیے حکومت نے مالی سال 2024-25 میں پردھان منتری کسان سمپدا یوجنا (پی ایم کے ایس وائی) کے تحت ‘‘مربوط کولڈ چین اور ویلیو ایڈیشن انفراسٹرکچر’’ اسکیم کے تحت ملک بھر میں کثیر مصنوعات والی غذائی تابکاری یونٹس قائم کرنے کے لیے مراعات کا اعلان کیا ہے۔

 

یہ معلومات وزیرِ اعظم کے دفتر، عملہ، عوامی شکایات و پنشن، جوہری توانائی اور خلائی امور کے وزیرِ مملکت ڈاکٹر جتیندر سنگھ نے آج راجیہ سبھا میں ایک تحریری جواب  میں فراہم کیں۔

********

ش ح۔  ع و۔ش ب ن

U-NO-1185

(रिलीज़ आईडी: 2293693) आगंतुक पटल : 4