محترمہ سوارنلاتا نیتی پوڈی

اختراع، صنعت کاری اور بروقت ادارہ جاتی تعاون نے متعدد ابھرتے ہوئے صنعت کاروں کو ایسے کاروبار قائم کرنے کے قابل بنایا ہے جو ہندوستان کی اقتصادی ترقی اور ماحولیاتی پائیداری میں اہم کردار ادا کر رہے ہیں۔ اس کی ایک نمایاں مثال سورناکرونا پرنسٹن ربڑ انڈسٹریز پرائیویٹ لمیٹڈ ہے، جو آندھرا پردیش کے وشاکھاپٹنم میں قائم ایک کمپنی ہے اور جسے درج فہرست ذات سے تعلق رکھنے والی پہلی نسل کی خاتون صنعت کار محترمہ سورن لتا نیتی پوڈی نے قائم کیا۔ ان کا کاروباری سفر سماجی انصاف و تفویض اختیارات کی وزارت کے تحت درج فہرست ذاتوں کے لیے وینچر کیپیٹل فنڈ (وی سی ایف-ایس سی) کے مثبت اثرات کی عکاسی کرتا ہے۔

سورناکرونا پرنسٹن ربڑ انڈسٹریز پرائیویٹ لمیٹڈ نے ضائع شدہ ٹائروں کو 10 میش سے 40 میش معیار کے اعلیٰ درجے کے کرمب ربڑ پاؤڈر میں تبدیل کرنے کے لیے ایک خودکار ربڑ ری سائیکلنگ پلانٹ قائم کیا ہے، جس کی سالانہ پیداواری صلاحیت تقریباً 6,000 میٹرک ٹن ہے۔ یہ ماحول دوست منصوبہ ضائع شدہ ٹائروں کو ٹھکانے لگانے کے مسئلے کا حل پیش کرنے کے ساتھ ساتھ قدر میں اضافہ شدہ صنعتی خام مال کی تیاری کے ذریعے سرکولر اکانومی کو بھی فروغ دیتا ہے۔

منصوبے کی صلاحیت کو دیکھتے ہوئے درج فہرست ذاتوں کے لیے وینچر کیپیٹل فنڈ (وی سی ایف-ایس سی) نے سال 2023 میں کمپنی کو 5 کروڑ روپے کی مالی معاونت فراہم کی، جس میں ایکویٹی اور اختیاری طور پر قابلِ تبدیل ڈیبینچرز کے ذریعے وینچر کیپیٹل امداد شامل تھی۔ اس تعاون کی بدولت کمپنی ایس آئی ڈی بی آئی سے دوسری مرتبہ مالی اعانت حاصل کرنے میں بھی کامیاب ہوئی، جس سے اس کی ترقی کو مزید تقویت ملی۔

 

خودکار ربڑ ری سائیکلنگ مرکز

مالی معاونت کی بدولت کمپنی جدید کرمب ربڑ مینوفیکچرنگ بنیادی ڈھانچہ قائم کرنے، دو لاکھ سے زائد ضائع شدہ ٹائروں کی ری سائیکلنگ کرنے، مقامی افراد کے لیے روزگار کے مواقع پیدا کرنے اور ماحول دوست فضلہ بندوبست کے طریقوں کو فروغ دینے میں کامیاب ہوئی۔ کمپنی نے ٹی وی ایس سندرم اور ہنکول سمیت متعدد معروف اداروں کے ساتھ مضبوط صنعتی روابط بھی قائم کیے، جس سے اس کی مارکیٹ تک رسائی اور طویل مدتی استحکام کو تقویت ملی۔

اس اقدام کے نتائج نمایاں رہے ہیں۔ آج کمپنی نے 15 افراد کو براہِ راست روزگار فراہم کیا ہے، جن میں 5 درج فہرست ذاتوں اور 10 دیگر طبقات سے تعلق رکھنے والے ملازمین شامل ہیں۔ کمپنی نے تقریباً 8 کروڑ روپے مالیت کے اثاثے قائم کیے، 2.09 کروڑ روپے کی خالص مالیت حاصل کی، 4.36 کروڑ روپے کی آمدنی درج کی اور 4.60 کروڑ روپے کا منافع کمایا۔ یہ منصوبہ ضائع شدہ مواد کو قیمتی صنعتی مصنوعات میں تبدیل کرتے ہوئے روزگار کے مواقع پیدا کرنے اور پائیدار مینوفیکچرنگ کو فروغ دینے کے باعث ماحول دوست صنعتی ترقی کی ایک نمایاں مثال بن کر ابھرا ہے۔

سورن لتا نیتی پوڈی، پروموٹر

اپنے سفر پر روشنی ڈالتے ہوئے سورن لتا نیتی پوڈی نے کہا:

"سماجی انصاف و تفویض اختیارات کی وزارت کے تحت درج فہرست ذاتوں کے لیے وینچر کیپیٹل فنڈ (وی سی ایف-ایس سی) کی مالی معاونت نے ہمیں ایک ماحولیاتی چیلنج کو پائیدار کاروباری موقع میں تبدیل کرنے کے قابل بنایا۔ آج سورناکرونا پرنسٹن ربڑ انڈسٹریز ضائع شدہ ٹائروں کو قیمتی صنعتی مصنوعات میں تبدیل کر رہی ہے، روزگار کے مواقع پیدا کر رہی ہے، سرکولر اکانومی کو فروغ دے رہی ہے اور ایک صاف ستھرے اور سرسبز ہندوستان کی تعمیر میں اپنا کردار ادا کر رہی ہے۔"

خودکار ربڑ ری سائیکلنگ مرکز

سورناکرونا پرنسٹن ربڑ انڈسٹریز پرائیویٹ لمیٹڈ کی کامیابی اس بات کا ثبوت ہے کہ درج فہرست ذاتوں کے لیے وینچر کیپیٹل فنڈ (وی سی ایف-ایس سی) کے تحت ہدفی مالی معاونت، درج فہرست ذاتوں کے صنعت کاروں کو ابھرتے ہوئے شعبوں میں اختراعی ادارے قائم کرنے، پائیدار روزگار پیدا کرنے اور ماحول دوست صنعتی ترقی کے ہندوستان کے وژن کو عملی جامہ پہنانے میں مدد دے رہی ہے۔ صنعت کاری کو فروغ دینے اور جامع اقتصادی ترقی کی حوصلہ افزائی کے ذریعے سماجی انصاف و تفویض اختیارات کی وزارت اختراع کاروں کو بااختیار بنانے، روزگار کے مواقع پیدا کرنے اور ملک کے لیے ایک سرسبز اور پائیدار مستقبل کی تعمیر میں اپنا کردار ادا کر رہی ہے۔

***

ش ح ۔   م  د ۔  م  ص

U : 1161

(रिलीज़ आईडी: 2293499) आगंतुक पटल : 6