مئی 2023 میں گزٹ کے ذریعے مطلع کیے گئے قومی بجلی منصوبہ (پیداوار) کے مطابق، سال 2026-27 اور 2031-32 تک بیٹری توانائی ذخیرہ نظام (بی ای ایس ایس) کی متوقع نصب شدہ صلاحیت بالترتیب 8.68 گیگا واٹ (جی ڈبلیو) / 34 گیگا واٹ گھنٹے (جی ڈبلیو ایچ) اور 47.24 گیگا واٹ / 236 گیگا واٹ گھنٹے ہوگی۔ اس مقصد کے لیے 2031-32 تک تقریباً 3.49 لاکھ کروڑ روپے کی سرمایہ کاری کا تخمینہ لگایا گیا ہے۔

سال 2026-27 اور 2031-32 تک پمپڈ اسٹوریج پلانٹس (پی ایس پی) کی متوقع نصب شدہ صلاحیت بالترتیب 7.45 گیگا واٹ / 47 گیگا واٹ گھنٹے اور 26.69 گیگا واٹ / 175 گیگا واٹ گھنٹے ہوگی، جس کے لیے 2031-32 تک تقریباً 1.29 لاکھ کروڑ روپے کی سرمایہ کاری کا تخمینہ ہے۔

نیتی آیوگ نے فروری 2026 میں جاری اپنی رپورٹ "شعبہ جاتی بصیرت: بجلی (جلد 7)" میں کہا ہے کہ قابلِ تجدید توانائی کو برقی نظام میں شامل کرنے سے پیدا ہونے والے اتار چڑھاؤ کو مؤثر انداز میں سنبھالنے کے لیے توانائی ذخیرہ مستقبل کی ایک ناگزیر ضرورت بن جائے گا۔ حکومت پہلے ہی توانائی ذخیرہ نظام (ای ایس ایس)، بشمول بیٹری توانائی ذخیرہ نظام (بی ای ایس ایس)، کی ترقی اور استعمال کو فروغ دینے کے لیے پالیسی، ضابطہ جاتی، طلب سے متعلق اور رسد سے متعلق متعدد مربوط اقدامات کر چکی ہے۔ ان اقدامات کی تفصیلات درج ذیل ہیں۔

پالیسی اور ضابطہ جاتی اقدامات

1. دسمبر 2022 میں بجلی قواعد میں ترمیم کر کے توانائی ذخیرہ نظام (ای ایس ایس) کو برقی نظام کا ایک لازمی حصہ تسلیم کیا گیا، جس کے نتیجے میں انہیں بجلی کی پیداوار، ترسیل اور تقسیم سے متعلق تمام سرگرمیوں میں حصہ لینے کی اجازت دی گئی۔
2. اکتوبر 2022 میں وزارتِ خزانہ کی ہم آہنگ بنیادی ڈھانچہ ماسٹر فہرست میں توانائی ذخیرہ نظام کو شامل کیا گیا، جس سے انہیں طویل مدتی اور کم لاگت والی مالی اعانت تک رسائی حاصل ہوئی۔
3. جون 2023 میں حکومت نے ریاستی بجلی اداروں کے لیے وسائل کی کفایت کے منصوبے تیار کرنے سے متعلق رہنما خطوط جاری کیے، جن کے تحت توانائی ذخیرہ کو زیادہ طلب کے اوقات میں بجلی کی ضروریات پوری کرنے اور برقی نظام کی قابلِ اعتماد کارکردگی برقرار رکھنے کے لیے ایک اہم منصوبہ بندی کے وسیلے کے طور پر شامل کیا گیا۔
4. ستمبر 2023 میں توانائی ذخیرہ نظام کے فروغ کے لیے قومی فریم ورک جاری کیا گیا، جس میں ذخیرہ ٹیکنالوجیوں کے فروغ، انہیں بجلی کی منڈی سے مربوط کرنے اور ان کے لیے ضابطہ جاتی سہولت فراہم کرنے کا جامع لائحۂ عمل پیش کیا گیا۔
5. مرکزی بجلی اتھارٹی کے (حفاظتی اقدامات اور برقی فراہمی سے متعلق) (پہلی ترمیم) ضوابط، 2025 کو 30 مارچ 2026 کو مطلع کیا گیا، جن میں بیٹری توانائی ذخیرہ نظام (بی ای ایس ایس) کے لیے حفاظتی تقاضے شامل کیے گئے ہیں۔
6. اسی طرح مرکزی بجلی اتھارٹی کے (برقی تنصیبات اور برقی لائنوں کی تعمیر کے تکنیکی معیارات) ترمیمی ضوابط، 2026 بھی مطلع کیے گئے ہیں، جن میں بیٹری توانائی ذخیرہ نظام (بی ای ایس ایس) کی تعمیر سے متعلق تکنیکی معیارات مقرر کیے گئے ہیں۔

II۔ طلب سے متعلق سہولتیں اور منڈی کی ترقی کے اقدامات

7. بین الریاستی ترسیلی نظام (آئی ایس ٹی ایس) کے محصولات میں چھوٹ: جون 2025 تک شروع ہونے والے بیٹری توانائی ذخیرہ نظام (بی ای ایس ایس) منصوبوں کے لیے بین الریاستی ترسیلی نظام کے محصولات میں 100 فیصد چھوٹ دی گئی ہے، جس کے بعد اس چھوٹ میں ہر سال 25 فیصد کمی کی جائے گی۔ اسی طرح ہائیڈرو پمپڈ اسٹوریج منصوبوں (پی ایس پی) کے لیے، جن کے تعمیراتی کام کا ٹھیکہ جون 2028 تک دیا جائے گا، 100 فیصد چھوٹ برقرار رہے گی۔ شریکِ مقام بیٹری توانائی ذخیرہ نظام (کو-لوکیٹڈ بی ای ایس ایس) منصوبوں کے لیے بھی جون 2028 تک شروع ہونے والے منصوبوں پر 100 فیصد چھوٹ کا اطلاق ہوگا۔ اسی طرح شریکِ مقام پمپڈ اسٹوریج منصوبوں (کو-لوکیٹڈ پی ایس پی) کے لیے، جن کے تعمیراتی کام کا ٹھیکہ جون 2028 تک دیا جائے گا، 100 فیصد چھوٹ فراہم کی گئی ہے۔
8. جنوری 2022 میں مرکزی بجلی ضابطہ کار کمیشن (سی ای آر سی) نے ذخیرہ پر مبنی وسائل کو معاون خدمات فراہم کرنے کی اجازت دی، جن میں ثانوی اور ثالثی ذخائر بھی شامل ہیں۔ اس اقدام سے توانائی ذخیرہ نظام (ای ایس ایس) کو روایتی بجلی گھروں کے ساتھ مل کر حقیقی وقت میں برقی گرڈ کا توازن برقرار رکھنے میں معاونت کا موقع ملا۔
9. بیٹری توانائی ذخیرہ نظام (بی ای ایس ایس) اور پمپڈ اسٹوریج منصوبوں (پی ایس پی) کی خریداری کے لیے محصول کی بنیاد پر مسابقتی بولی (ٹی بی سی بی) سے متعلق رہنما خطوط مطلع کیے جا چکے ہیں، جن کے ذریعے بڑے پیمانے پر توانائی ذخیرہ نظام کی خریداری کے لیے ایک شفاف طریقۂ کار قائم کیا گیا ہے۔
10. بجلی (صارفین کے حقوق) قواعد، 2020 میں دسمبر 2022 میں کی گئی ترمیم کے تحت ڈیزل جنریٹر سیٹ استعمال کرنے والے صارفین کو پابند کیا گیا ہے کہ وہ متعلقہ ریاستی کمیشنوں کی مقرر کردہ مدت کے اندر زیادہ صاف ستھرے متبادل بیک اَپ ذرائع، بشمول توانائی ذخیرہ نظام، اختیار کریں۔
11. بیٹری توانائی ذخیرہ نظام (بی ای ایس ایس) سے فراہم کی جانے والی بجلی کو اعلیٰ قیمت یومِ پیشگی منڈی میں شرکت کی اجازت دی گئی ہے، جس کا آغاز مارچ 2023 میں کیا گیا تھا۔ اس سے توانائی ذخیرہ نظام کو قدرتی گیس پر مبنی بجلی گھروں کی طرح زیادہ طلب اور بلند قیمت کے اشاروں کے مطابق فوری ردِعمل دینے کی سہولت حاصل ہوئی ہے۔
12. 43.8 گیگا واٹ گھنٹے صلاحیت کے بیٹری توانائی ذخیرہ نظام (بی ای ایس ایس) کی ترقی کے لیے قابلیت کے فرق کی مالی معاونت فراہم کی جا رہی ہے۔
13. بند چکر آف-اسٹریم پمپڈ اسٹوریج منصوبوں کو مرکزی بجلی اتھارٹی سے پیشگی منظوری حاصل کرنے کی شرط سے مستثنیٰ قرار دے دیا گیا ہے۔

III۔ رسد سے متعلق اور گھریلو مینوفیکچرنگ کے فروغ کے اقدامات

14. بھاری صنعتوں کی وزارت، 18,100 کروڑ روپے کی لاگت سے پروڈکشن لنکڈ انسینٹو (پی ایل آئی) اسکیم نافذ کر رہی ہے، جس کا مقصد 50 گیگا واٹ گھنٹے صلاحیت کے جدید کیمیائی سیل (اے سی سی) تیار کرنے کی پیداواری صلاحیت قائم کرنا ہے۔ اس میں سے 10 گیگا واٹ گھنٹے صلاحیت برقی گرڈ کے لیے مستقل توانائی ذخیرہ نظام کے لیے مختص کی گئی ہے۔
15. ہائیڈرو پمپڈ اسٹوریج منصوبوں کے لیے 200 میگا واٹ تک کے منصوبوں کو فی میگا واٹ ایک کروڑ روپے کے حساب سے بنیادی ڈھانچے کی معاونت فراہم کی گئی ہے۔ 200 میگا واٹ سے زیادہ صلاحیت والے منصوبوں کے لیے 200 کروڑ روپے کے علاوہ فی میگا واٹ 75 لاکھ روپے کی اضافی معاونت دی جاتی ہے۔
16. مرکزی بجلی ضابطہ کار کمیشن (سی ای آر سی) نے غیر شمسی اوقات میں الگ سے برقی گرڈ سے رابطے کی اجازت دی ہے، جس سے موجودہ گرڈ ذیلی مراکز پر اضافی قابلِ تجدید توانائی کی صلاحیت شامل کرنا ممکن ہو گیا ہے، نیز توانائی ذخیرہ نظام کے ذریعے بجلی کو شام اور رات کے اوقات میں منتقل کر کے استعمال میں لانے کی سہولت بھی میسر آئی ہے۔
17. ستمبر 2025 میں بجلی قواعد میں کی گئی ترمیم کے ذریعے توانائی ذخیرہ نظام کو صارفین کے ذریعے تیار کرنے، اس کی ملکیت رکھنے، لیز پر لینے یا اس کا انتظام کرنے کی اجازت دے دی گئی ہے، جس سے ملکیت اور کاروباری نمونوں کے دائرہ کار میں نمایاں توسیع ہوئی ہے۔
18. فروری 2025 میں مرکزی بجلی اتھارٹی (سی ای اے) نے شمسی توانائی کے منصوبوں کے ساتھ توانائی ذخیرہ نظام کی مشترکہ تنصیب کے بارے میں ایک مشاورتی ہدایت نامہ جاری کیا، جس میں سفارش کی گئی کہ ذخیرہ کی صلاحیت کم از کم نصب شدہ شمسی صلاحیت کے 10 فیصد کے برابر ہو اور اس کی مدت کم از کم دو گھنٹے ہو، تاکہ شمسی توانائی کی فراہمی کو زیادہ مؤثر اور قابلِ اعتماد بنایا جا سکے۔

یہ معلومات آج راجیہ سبھا میں توانائی کی وزارت کے مرکزی وزیرِ مملکت جناب پد نائک نے ایک سوال کے تحریری جواب میں فراہم کیں۔

******

ش ح۔ ش ا ر۔ ول

Uno- 687

(रिलीज़ आईडी: 2290159) आगंतुक पटल : 7