ગુજરાતના વિસ્તારો અને દાદરા અને નગર હવેલીના કેન્દ્રશાસિત પ્રદેશમાં સતત અવિરત વરસાદથી ઉદ્ભવેલી પૂરની પરિસ્થિતિનો ઝડપથી પ્રતિસાદ આપતા, ભારતીય સેનાએ, સધર્ન કમાન્ડના તત્વાવધાન હેઠળ, 23 જુલાઈ 2026ની સાંજે માનવતાવાદી સહાય અને આપત્તિ રાહત (HADR) કામગીરી શરૂ કરી હતી. પ્રભાવિત વસ્તીને મદદ કરવા માટે NDRF, SDRF, નાગરિક વહીવટીતંત્ર અને અન્ય એજન્સીઓ સાથે ગાઢ સંકલનમાં રહીને રાહત અને રેસ્ક્યૂ કામગીરી ચાલુ છે.

સેનાએ પ્રભાવિત વિસ્તારોમાં એન્જિનિયર અને મેડિકલ ટીમો સહિત સાત રાહત અને રેસ્ક્યૂ કોલમ તૈનાત કર્યા છે. હાલમાં, બે કોલમ નવસારીમાં, એક વલસાડ-વાપી વિસ્તારમાં, ત્રણ અમદાવાદમાં, જેમાં અમદાવાદ શહેર, અમદાવાદ ગ્રામીણ અને અમદાવાદ-રાજકોટ હાઇવેને આવરી લેવામાં આવ્યા છે અને એક કોલમ દાદરા અને નગર હવેલીના કેન્દ્રશાસિત પ્રદેશના સિલવાસામાં કાર્યરત છે. આ ઉપરાંત, કોઈપણ ઉદ્ભવતી કટોકટીનો તાત્કાલિક પ્રતિસાદ આપવા માટે વડોદરા, અમદાવાદ અને જામનગર સહિતના મુખ્ય સ્થાનો પર વધારાની રાહત અને રેસ્ક્યૂ કોલમ સ્ટેન્ડબાય પર રાખવામાં આવી છે.

કામગીરીની શરૂઆતથી, સેનાની ટીમોએ જળબંબાકાર અને અગમ્ય વિસ્તારોમાં સતત રેસ્ક્યૂ અને રાહત મિશનો હાથ ધર્યા છે, જેમાં અત્યાર સુધીમાં અટવાયેલા 355 નાગરિકોનું સુરક્ષિત રીતે સ્થળાંતર કરવામાં આવ્યું છે. પૂર પ્રભાવિત ઇમારતો અને અલગ-અલગ રહેણાંકોમાં લાંબા સમયથી ફસાયેલા નાગરિકોના સ્થળાંતર સહિત, પડકારજનક પરિસ્થિતિઓમાં ઘણીવાર રેસ્ક્યૂ કામગીરી હાથ ધરવામાં આવી છે. મેડિકલ ટીમોએ સહાયની જરૂરિયાત ધરાવતા લોકોને તાત્કાલિક આરોગ્ય સંભાળ પૂરી પાડી છે, જ્યારે રાહત ટીમોએ સ્થળાંતર અથવા સામાન્ય સંપર્ક પુનઃસ્થાપિત થવાની રાહ જોઈ રહેલા પ્રભાવિત રહેવાસીઓને ખોરાક, પીવાનું પાણી અને અન્ય આવશ્યક ચીજવસ્તુઓનું વિતરણ કર્યું છે.

  

પ્રભાવિત જિલ્લાઓમાં સમયસર રેસ્ક્યૂ, રાહત અને માનવતાવાદી સહાય સુનિશ્ચિત કરવા માટે નાગરિક વહીવટીતંત્ર, નેશનલ અને સ્ટેટ ડિઝાસ્ટર રિસ્પોન્સ ફોર્સિસ, પોલીસ અને અન્ય હિતધારકો સાથે સીમલેસ સંકલનમાં કામગીરી હાથ ધરવામાં આવી રહી છે.

 

IJ/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(रिलीज़ आईडी: 2289315) आगंतुक पटल : 36