సీఎస్ఐఆర్ - ఎన్ఈఈఆర్ఐ డైరెక్టర్ డాక్టర్ ఎస్. వెంకట మోహన్ మాట్లాడుతూ, సంక్లిష్టమైన వస్త్ర రంగులు, సేంద్రీయ కాలుష్య కారకాలను సమర్థవంతంగా విచ్ఛిన్నం చేసేందుకు ఈ శుద్ధి వ్యవస్థలో అనేక జీవక్రియ మార్గాలను ఆధునిక బయో ఎలక్ట్రో క్యాటలైటిక్ ప్రక్రియలతో సమన్వయం చేసినట్లు వివరించారు. తక్కువ విద్యుత్ వినియోగం, కనిష్ఠ రసాయనాల వినియోగం, వనరుల సంరక్షణ, నీటి పునర్వినియోగం వంటి సూత్రాల ఆధారంగా ఈ వ్యవస్థను రూపొందించారు. పర్యావరణ ఇంజినీరింగ్, బయోటెక్నాలజీ రంగాల్లోని ఆధునిక సాంకేతికతలను క్షేత్రస్థాయిలో అమలు చేయగల సమర్థవంతమైన పరిష్కారాలుగా మలిచి, కాలుష్య నియంత్రణ, నీటి భద్రత, సర్క్యులర్ ఎకానమీ లక్ష్యాలను సాధించేందుకు ఇది దోహదపడుతుందని నిరూపిస్తోంది. దేశంలో వందల సంఖ్యలో చేనేత, వస్త్ర పరిశ్రమల క్లస్టర్లు ఉన్నాయని, వాటిలో అనేక ప్రాంతాలు రంగుల అద్దకం,  ఇతర ప్రాసెసింగ్ కార్యకలాపాల ద్వారా వెలువడే మురుగునీటి నిర్వహణలో సవాళ్లను ఎదుర్కొంటున్నాయని డాక్టర్ మోహన్ వివరించారు. అందువల్ల సిరిపురం ఈటీపీ నమూనాను గురుత్వాకర్షణ ఆధారిత, రసాయన రహిత, శక్తి సామర్థ్యంతో కూడిన విధానంలో అభివృద్ధి పరిచారు. దేశంలోని వస్త్ర, చేనేత పరిశ్రమల క్లస్టర్లలో అమలు చేసేందుకు, స్థానిక అవసరాలకు అనుగుణంగా మార్చుకునేందుకు విస్తృత అవకాశాలున్న ఆదర్శ ప్రదర్శన కేంద్రంగా ఇది రూపుదిద్దుకుంది. 

దేశంలోని గ్రామీణ ప్రాంతాల కోసం స్వదేశీ హరిత సాంకేతికత

500 కేఎల్‌డీ సామర్థ్యం గల ఈ శుద్ధి కేంద్రం సమగ్ర హైబ్రిడ్ జీవ శుద్ధి విధానాన్ని ఉపయోగిస్తుంది. ఇందులో అనేక జీవక్రియ మార్గాలను  ఆధునిక బయో ఎలక్ట్రో క్యాటలైటిక్ ప్రక్రియలతో సమన్వయం చేసి మురుగునీటి శుద్ధి చేపడుతున్నారు. ఈ స్థాయిలో బయో ఎలక్ట్రో క్యాటలైటిక్ ప్రక్రియలను సమన్వయం చేయడం ద్వారా, వస్త్ర పరిశ్రమల వ్యర్థ జలాలనూ,  గృహ మురుగు నీటినీ కలిపి శుద్ధి చేసే సాంకేతికతకు ఇది క్షేత్రస్థాయిలో ఒక ముఖ్యమైన నమూనాగా నిలుస్తోంది.

సామాజిక, పర్యావరణ ప్రభావం

ఈ శుద్ధి కేంద్రం ద్వారా స్థానిక పర్యావరణ పరిస్థితులు మెరుగుపడటంతో పాటు, సుస్థిర జీవనోపాధులకు తోడ్పాటుతో సిరిపురం గ్రామంలోని దాదాపు 7,000 మంది ప్రజలు ప్రత్యక్షంగా, పరోక్షంగా ప్రయోజనం పొందుతారని అంచనా వేస్తున్నారు. ఈ ప్రాజెక్టు ద్వారా మురుగునీటి వల్ల భూమి, జల వనరులు కలుషితం కాకుండా నివారించడంతో పాటు పారిశుద్ధ్యం, పర్యావరణ నాణ్యత మెరుగుపడుతాయని భావిస్తున్నారు. అలాగే మంచినీటి వనరులపై ఆధారపడటాన్ని తగ్గించి, సంప్రదాయ చేనేత కార్యకలాపాలకు పర్యావరణ పరంగా మరింత సుస్థిరతను అందించడంలో ఇది సహాయపడనుంది. ముఖ్యంగా ఈ కార్యక్రమం పర్యావరణ బాధ్యత కలిగిన వస్త్ర ఉత్పత్తిగా పోచంపల్లి వస్త్రాలకు  ప్రత్యేక గుర్తింపు తీసుకురావడంలో దోహదపడుతుంది. భవిష్యత్‌లో సుస్థిరత ధ్రువీకరణ, పర్యావరణ అనుకూల గుర్తింపు  పొందే ప్రయత్నాలకు ఇది తోడ్పాటు అందించడంతో పాటు దేశీయ, అంతర్జాతీయ మార్కెట్లలో పోచంపల్లి వస్త్రాల విలువనూ , పోటీతత్వాన్నీ పెంచే అవకాశం ఉంది.

***